লমদমসিগী হৌজিক ওইরক্লিবা ফীবমগী মতাঙদা খন্নখ্রে
ইম্ফাল, অক্টোবর ১ : কোলকাতাদা লৈরিবা এম আই কে (মণিপুর ইন কোলকাতা) গী মীহুৎশিংগা এম আই কেগী ওফিসতা অইবা সরতচান্দ থিয়ামগা অখন্নবা উন্নবগী থৌরম অমা হৌখিবা সেপ্টেম্বর ২৭ তা পাঙথোক্তুনা মণিপুরদা হৌজিক ওইরক্লিবা ফীবম অসিগী মতাঙদা খন্নখ্রে।
মীফম অদুদা মরুওইনা হৌজিক থোক্লিবা ঈরাংসিগী মতাঙদা মপান্দা লৈরিবা মণিপুরীশিংগা তোয়না ঈ-পাউ ফাওনদুনা অচুম্বা পাউ খঙহন্নবা হোৎনবা অমদি লমদমসিগী মহৌশাগী পুন্সিরোল অদুদা হঞ্জিনহল্লক্নবগী মতাঙদা কূপ্না খন্নখি হায়রি।
খন্ন-নৈনবগী থৌরম অদুদা সরতচান্দ থিয়াম্না হায়, হৌজিক হৌজিক কোলকাতাদা লৈরিবা মৈতৈশিংনা লৌরিবা থৌদাং অসি য়াম্না চাওই।
মণিপুরদা ইন্তারনেট হেক থিংজিনখ্রবা মতুংদা মণিপুরগী থৌদোক-ৱাথোক ময়াম অসি নেসনেল অমসুং ইন্টারনেসনেলগী মিদিয়াদা য়ৌহন্দুনা মরীক চুম্না খঙহনবা হায়বসি অৱাবা অমা ওইখি। মসিগুম্বা মতাঙ অসিদা মপান্দা লৈরিবা মৈতৈশিংগী দায়িত্ব অসি অদুক্কী মতীক য়াম্না লৈখি। মরম অসিনা মণিপুরগী মনুং অমসুং মপান্দা লৈরিবা মৈতৈশিংগী মরক্তা চূংশিন্নবা অমা য়াম্না দরকার ওইখি হায়না ফোঙদোকখি।
খন্ন-নৈনবা অদুদা শরুক য়ারদুনা এম আই কেগী এদভাইজর লাইশ্রম গোপেশ্বরনা হায়, ঐখোয় কোলকাতাদা লৈরিবা মণিপুরীশিংনা মতম পূম্নমক্তা ইরমদম মণিপুরবু য়েংদুনা লৈখি। ঐখোয়দা নৎতনা কোলকাতাদা লৈরিবা ঐখোয়গী পীক্লিবা ইচা-ইশুশিং ফাওবা মণিপুরগীদমক য়াম্না লাংতক্নখি। ঐখোয়গী খোল্লাওদি শান্তি পাম্মী হায়বসিনি।
লমদমসিগী থোক্লিবা ঈরাং অসিগী মতাঙদা ঐখোয় নীংহন্নবা লৈতনা মালেমদা লৈরিবা মণিপুরী দাইস্পোরা খূদীংমক্না শীনবা থৌরম কয়াদা শরুক য়াখি। লোয়ননা মণিপুরদসু থোরক্তুনা তোঙান-তোঙানবা রিলিফ কেম্প কয়াদা লাঞ্জেন্নদুনা অৱাবা তারবা মৈতৈ ইচীন-ইনাওশিংদা তেঙবাংগী পোৎলম কয়াসু মতেঙ পাংলমখি। ঈরাংসিগী মতাঙদা মিদিয়াদা থোরকপা অচুম-অরানগী অচৌবা লান কয়াদা ঐখোয়সু চাওনা শরুক য়াদুনা অচুম্বা অশেংবদু খঙহন্নবা অঙম্বা থাক্তা হোৎনখি। মদুগী মহয়সু ফংবা ঙমখি হায়না ফোঙদোকখি।
খন্ন-নৈনবগী থৌরম অদুদা এম আই কেগী প্রেসিদেন্ত রোসন খুমুকচম্না হায়, ঐখোয়দা অৱাৎপা অমত্তা লৈতে। ঐখোয়দা মতেঙ পাংগে হায়বা ময়াম অমসু লৈরি। ঐখোয়না মিদিয়াতা ফাইট তৌরিবা অসিসু অশেংবা অচুম্বদু মীয়ামদা শেংনা খঙহন্নবগীদমক্তনি। হৌজিক্তি মীয়াম্না ঐখোয়বু লান্না-লান্না উরম্বদু অচুম্বদু খঙনরক্লবনিনা য়াম্না হন্থরে। ঐখোয়না হোৎনরিবসি মনুং-মপান হায়বা লৈতনা পূন্না থেংনমিন্নবা অসিনি।
থৌরম অদুদা শরুক য়াখিবা পূম্নমক্না হান্নগুম পূন্না নুংশি-চান্ননা হিংমিন্নবা মহৌশাগী পুন্সিরোল অদুদা হঞ্জিল্লক্নবা ৱাফম কয়াসু ফোঙদোক্নখি।
সোর্স: পোক্নফম
0 কমেন্ট:
কমেন্ট তৌবিয়ু