জারিবোন্দা ১৪শুবা সাহিত্য কীর্ত্তন
আগরতলা, ১৪ জুলাই : চহী খুদিং তৌনা হন্দকসু জারিবোন্দা সাহিত্য কীর্ত্তন থৌরম চীংলেম্না পাঙথোকখ্রে। চৎখিবা জুলাই ১০, জারিবোন্দা লৈবা সুব্রাম, সাহিত্য রত্ন, শঙ্গাইদা পাঙথোকখিবা থৌরম অদু সিং এ্যন্ড সন্স পাব্লিকেশনগী প্রেসিডেন্ট অসেম মনিনা থৌরম মপু ওইখি। থৌরমদা চীফ গেষ্ট ওইনা মণিপুরী সাহিত্য পরিষদ, আসামগী প্রেসিডেন্ট ড. ফুরিৎসাবম বীরমনি শরুক য়াখি। অদুগা গেষ্ট অব অনার ওইনা নোংচুপ হারম মণিপুরী অশৈলুপকী প্রেসিডেন্ট আই এস থিংগোম অমসুং বাংলাগী অইবা কল্লোল চৌধুরীনা ডায়েসতা লেঙশিনখি।
থৌরম অসিদা পুন্সিগী অচৌবা শরুক অমা সমাজগী দমক কত্থোক্লবা শক্নাইরবা ইঙুদম বিনোদতা 'অসেম হরিমোহন সিংহ ইমাচাওবী নীংশিং মনা' পীদুনা ইকাইখুম্নখি। শক্নাইরবা অইবা মোইরেংজম দেব সিংহ (ময়ান্না সুব্রাম হায়না খঙনরবা) গী মপোক নুমিৎকা মরী লৈননা হন্দক্কী ১৪শুবা সাহিত্য কীর্ত্তন খুদোল পোৎ পীখিবগী মনুংদা নোংচুপ হারম মণিপুরী অশৈলুপকী মাইকৈদগী সাইটেশন অমসুং ফি-গী খুদোল পোৎ তমখি। নুমিৎ অদুদা ফোঙখিবা লাইরিক অহুম অদুদি হাওবম অতোম্বগী 'মঙলান অমা মাংখি মৈখুরক্তা' কে নীলকুমার গী 'অহিংগী পিরাং' অমসুং পি হেমন্তগী "তাকথোক্লুনু হায়দোক্লুনু' হায়বা লাইরিক অহুম মায়খুম হাংদোকখি। থৌরমগী অরোইবদা ঙাঙোম বসন্ত কুমারনা মোডেরেটর ওইদুনা মণিপুরী য়াওনা বাংলা, নেপালী লোলগী কবিশিং শরুক য়াদুনা শৈরেং শৈদিন্নখি।
সোর্স - মরূপ
0 কমেন্ট:
কমেন্ট তৌবিয়ু