রাজর্ষিগী চহী ২৮৬ শুবা মপোক কুমওন ত্রিপুরাগী মফম অনীদা পাঙথোকখ্রে
আগরতলা, জুন ২৫ : অৱাং জিলাগী ধর্মনগরদা রাজর্ষি ভাগ্যচন্দ্র কালচারেল ফাউন্ডেশন মণিপুর অমসুং ২৮৬ বার্থ এনিভার্সারী কমিটি নর্থ ত্রিপুরা ডিস্ট্রিক্টনা শীন্দুনা নুমিৎ নিনি চুপ্পা ভাগ্যচন্দ্রগী মপোক কুমওন থৌরম পাঙথোকখ্রে। ধর্মনগর মীতমদা হৈকৎ লৈকৎ তম্বা, রাজবাড়ী-মনতলাদা খিন্না লৈবা ভাগ্যচন্দ্রগী দা সেমিনার, জিলা অসিগী শক্নাইরবা অমদি কলচরেল এক্টিভিষ্ট মীওই ৪০ রোমদা ইকাইখুম্নবা, কলচারেল প্রোগ্রাম নচিংবা মখল মথেল কয়াগী থৌরম পাঙথোকখি। পনবা য়াবদি ধর্মনগরগী লৈখিদ্রবা স্নাখ্যা নরেন্দ্রজিৎকী থৌশীল মখাদা ইং ২০০৯ দা মনতলাদা ত্রিপুরাদা ইহান হানবা ওইনা ইনিংথৌ মহারাজ ভাগ্যচন্দ্রগী মীতম অসি খিনখিবনি। মীতম অসি স্নাখ্যাগী মচা নুপা অহল আর্টিষ্ট মানবেন্দ্র রাজকুমারনা শাবনি।
চহী ২৮৬ শুবা মপোক কুমওন থৌরমগী অহানবা নুমিৎ জুন তাং ২০ রাজবাড়ীদা সেমিনার পাঙথোকখি। মদুদা ত্রিপুরাগী খুমন্থেম চনু অনীমা, খাংজ্রাকপম সুদেষনা, মণিপুরগী ককচিংতাবম ব্রজমনি শর্মা, খুন্দোংবম কুমার সিংহ, মাখোনমনি মোংশাবা, তখেল্লম্বম ইরাবত সিংহ, পুখ্রম্বম জেমস অমসুং আসামদগী ড. এইচ রাজমনিনা পেপার পাথোকখি। সেমিনারদা এল উপেন্দ্র শর্মা অমসুং ডব্লিউ বীরমঙ্গল মোডেরেটরগী থৌদাং লৌখি। মপোক কুমওনগী নিনি চনবা অরোইবা নুমিৎকী থৌরম অয়ুক্তা মনতলাদা খিন্না লৈবা রাজর্ষি ভাগ্যচন্দ্রগী মীতমদা হৈকৎ লৈকৎ তম্বগা লোয়ননা থাং-তানা সেল্যুট পীখি।
মথং রাজবাড়ীদা কৈলাশহরগী এম.এল.এ য়েলাম বীরজিৎ সিংহনা মৈরা চুখতুনা হৌদোকখিবা থৌরমদা পাথারকান্দি বি.ই.ডি কলেজগী পোত্থারবা ওজা মোইরাংথেম লোকেন্দ্র, ফাউন্ডেশনগী প্রেসিডেন্ট রাজকুমার জীতেন্দ্রজিৎ সিংহ, নেশনেল এৱার্ডি ড. আরকে ইন্দিরা, কোন্থৌজম রবীন্দ্র সিংহ, মণিপুর ইউনিভার্সিটিগী পোত্থারবা ওজা মাখোনমনি মোংশাবা, ত্রিপুরা লৈঙাকী পোত্থারবা ডেপুটি ড্রাগ
কন্ট্রোলার য়েলাম ওংবী কাঞ্চন সিংহ, এডভাইজর ডব্লিউ বীরমঙ্গল সিংহ, পেত্রিওটিক রাইটার্স ফোরমগী ষ্টেট প্রেসিডেন্ট ক্ষেত্রিময়ুম মাধবী, শ্রীশ্রী গোবিন্দজিউ টেম্পল বোর্ডকী মেম্বর অশেম নাওবা নচিংবা মীওইশিং শরুক য়াখি।
অরোইবদা দি অল মণিপুর গৌরাঙ্গ লীলা ষনশেম্বা আর্টিষ্ট এসোশিয়েশননা গৌড়লীলা শান্নখি অমসুং ত্রিপুরাগী আর্টিষ্ট শিংনা মখল কয়াগী কলচারেল প্রোগ্রাম পাঙথোকখি।
রাজর্ষি ভাগ্যচন্দ্রগী পোকপা নুমিৎ জুনগী তাং ২১ অসিমক্তদা আগরতলা শহরদগী কিঃমিঃ ৬ রোম নোংপোক রোমদা রাণীর বাজারগী মৈতৈ খুঙ্গং সনা খুন্দসু (বৃদ্ধনগর) শ্রদ্ধাঞ্জলি কৎপগা লোয়ননা নৈন থৌরম অমসু পাঙথোকখি। অরোইবদা মখল মথেল কয়াগী কলচারেল প্রোগ্রামসু পাঙথোকখি। পনবা য়াবদি হায়রিবা বৃদ্ধনগর মৈতৈনা সনা খুন হায়রগা খঙনরিবা খুল অসি তখেন মহারাজ বীরচন্দ্র (১৮৬২-৯৬) গী মতমদা মন্ত্রি ওইরম্বা অহানবা মৈতৈ মচা নরধ্বজ ঠাকুর (মহাকপু কোকচাওস্না হায়রগা খঙনৈ) গী খুলনি। মদুদগী সনা খুল হায়না খঙনবা হৌখি।
রাজর্ষি ভাগ্যচন্দ্রগী ২৮৬ শুবা মপোক কুমওনগা মরী লৈননা জুন তাং ২৩, রাধানগর মান্ডপ মমাংদা খিন্না লৈবা রাজর্ষি ভাগ্যচন্দ্র গী মীতমদা লৈ কৎতুনা খুরুম্নখি।
সোর্স - মরূপ
0 কমেন্ট:
কমেন্ট তৌবিয়ু