ত্রিপুরাদা লময়ানবা হিজম ইরাবতকী ১২৭ মপোক কুমওন থৌরম পাঙথোকখ্রে
আগরতলা, অক্টোবর ০১ : লময়ানবা হিজম ইরাবতকী মমা লৈবাক নুংশিবা অমদি মরমদম খুন্নাই মীয়ামগীদমক খঞ্জবা ৱাখল্লোনশিং অদুবু নীংশিংদুনা মণিপুর অমদি অতোপ্পা ষ্টেটশিংদা লময়ানবা হিজম ইরাবতকী ১২৭ শুবা মপোক নুমীৎ থৌরম পাক শন্না পাঙথোক্নখ্রে।
মণিপুরী লিটরেরি এন্দ কালচারেল ফোরাম ত্রিপুরা অমসুং পুথিবা ওয়েলফেয়ার এন্দ কালচারেল সোসাইটি অনীনা পুন্না শীন্দুনা আগরতলাগী অভয়নগরদা লৈবা ইপুধৌ পুথিবা মান্দপতা ১২৭ শুবা নীংতম লাম্মী হিজম ইরাবতকী মপোক কুমওন থৌরম পাঙথোকখ্রে হায়না ফোরাম অসিগী মায়কৈদগী থাদোরকপা চেরোল অমনা ফোঙদোরক্লি।
থৌরম অদুদা জৱাহরলাল নেহেরু য়ুনিভার্সিটি দিল্লীগী এসোসিয়েট প্রোফেসর ড. অঙোমচা বিমোল অকোইজমনা অথোইবা মীথুং ওইনা শরুক য়াদুনা মৈরা চুখত্তুনা পাঙথোকখিবা থৌরম অদুদা মহাক্না হায়খি, লময়ানবা ইরাবত খুন্নাইগী য়াইফনবা খনবা লৈবাক মীয়ামগী লুচিংবনি। মণিপুরদা হৌজিক হৌজিক থোক্লিবা কাঙলুপকী ঈরাং অসিনা লৈবাক্কী মীচম-মীয়াম পুম্নমকপু ৱাহল্লে। ইরাবত গুম্বা পুকচেল শেংবা লুচিংবা অমা লৈরম্লবদি ঙসি মণিপুরদা অসুম্না থোক্লম্লোইদবনি হায়নসু ফোঙদোকখি।
ড. অঙোমচা বিমোল অকোইজমনা মৈরা চুখত্তুনা থৌরম হৌদোকপগী তাংফম অমা
থৌরম অদুদা ড. বিমোল অকোইজমবু মণিপুরী লিটরেরি এন্দ কালচারেল ফোরাম ত্রিপুরা অমসুং পুথিবা, মরুপ পাউচে, লময়ানবা অমদি তখেল লৈমা তেংবাঙ লূপকী মায়কৈদগী তোঙান তোঙানবা খুদোলপোৎশিং তমদুনা ঈকায় খুম্নবা উৎখি।
থৌরম অদুদা ওর্গানাইজিং কম্মিটিগী কনভিনর নিরঞ্জন, নেসনেল ইন্সটিট্যুট ওফ টেক্নোলোজি আগরতলাগী প্রোফেসর ড. অনুরাধা নোংমাইথেম, আই সী এ আর আগরতলাগী সাইন্টিষ্ট ড. হুইরেম ভারত্তি, দি এম য়ুনিভার্সিটি ইম্ফালগী এসিষ্টেন্ট প্রোফেসর ড. নোনি অরাম্বম অমদি এদভোকেট লাইশ্রম মেমোসু শরুক য়ারদুনা লময়ানবা ইরাবতকী ফোটোদা হৈ-লৈ কৎপগা লোয়ননা মিনিট অনী তুমীন্না লেপ্তুনা ঈকায় খুম্নবা উৎখি। থৌরম অদুদা অনুরাধা নোংমাইথেমনা ইরাবতকী পুন্সি অমসুং থবক হায়বা হীরমদা ৱা ঙাংখি।
থৌরম অদুগী শরুক অমা ওইনা মরুপ চয়োলগী পাউচেগী জোইন্ট এদিটর আর কে তরুঞ্জিৎ, মণিপুরগী ৱাংমদা নুপীলক্তগী অহানবা সাহিত্য একাদেমী নিউ দিল্লী মণিপুর লেংগ্বেজ বোর্দকী মেম্বার খোইস্নাম বিরোলাবু হরাও তয়াম্না খুদোলপোৎ তমদুনা ওকখি। অহানবা ওইনা ত্রিপুরাদা ষ্টেটকী থাক্তা পাঙথোকপা লময়ানবা ইরাবতকী মপোক নুমীৎ থৌরম পাঙথোকপা অসিদা তখেল্লৈমা তেংবাঙলুপ, মরুপ পাউচে, লময়ানবা সোসিও কালচারেল ওর্গানাইজেসন, ত্রিপুরা মৈতৈ এসোসিয়েসন অমসুং টি এম সী চাউখৎ খোঙথাং লূপনচিংবনসু মতেং পাংবীরকখি হায়রি।
0 কমেন্ট:
কমেন্ট তৌবিয়ু