• 50
• ২৭শে জুন ২০২৬ ইং
• Share on:

স্নাখ্যা আর কে কমলজিৎ সিংহদা 'তখেল রত্ন এৱার্ড' (পোষ্ট্যুমাস)

 আগরতলা, জুন ২৬ : তখেলগী মণিপুরী মহৈরোলগী ৱারী লেপখৎপীরম্বা শক্নাইরবা এক্টিভিষ্ট লৈখিদ্রবা স্নাখ্যা রাজকুমার কমলজিৎ সিংহদা হন্দক চহী 'তখেল রত্ন এৱার্ড' (পোষ্ট্যুমাস) পীরগনি। মণিপুরী লিটরেরী এ্যন্ড কলচারেল ফোরাম, ত্রিপুরা অমদি তেংবাং লুপ (তখেল লৈমা) অনীনা পুন্না শীন্দুনা লাক্লিবা জুলাই তাং ২৬ দা আগরতলা সুকান্ত একাডেমি ওডিটোরিয়ামদা পাঙথোক্কদবা থৌরম অমদা লেমজনিংঙাই ওইরবা মনা অসি লৈখিদবগী ইমুং মনুংদা লান্থোক্কনি হায়রি।

চৎখিবা নোংমাইজিং নুমিৎ জুন ২১, লুপ অনীগী অপুনবা মীফম অমদা লেপখিবা ৱারেপ মতুং ইন্না ত্রিপুরা লমদমগী শক্নাইরবা সোসেল এক্টিভিষ্ট অমদি হিস্টোরিয়ান লৈখিদ্রবা স্নাখ্যা কমলজিৎ সিংহনা মপুন্সি চুপ্পা মাংজিল থানা মণিপুরী খুন্নাইগীদমক্তা মশাবু কথোকচখিবা অদুবু তৌবিমল খঙবা উৎপা ওইনা হন্দক চহী পোষ্ট্যুমাস (Posthumous)ওইনা মনা অসি লৈখিদ্রবা মহাক্কী মফমদা পীরগনি হায়রি। সোসেল এক্টিভিষ্ট কন্থৌজম ওংবী শ্রীতি শর্মা, নিউ দিল্লীনা মনা অসি কৎপনি। মনা অসিদা শাল, শক্তাকচে, মেমেন্টো, শেল ওইনা লুপা লীশিং মঙা অমসুং খুদোলপোৎ কয়া য়াওরি হায়না মণিপুরী লিটরেরী এ্যন্ড কলচারেল ফোরাম ত্রিপুরানা থাদোরকপা চেরোল অমদা হায়রি। চেরোল অদুদা অসুন্না পল্লি-ত্রিপুরানা ভারত্তা তিনশিন্দ্রিঙৈ মমাং অমদি মতুংদা লমদম অসিদা চোংথোরকথিবা লুচিংবশিংগী মনুংদা স্নাখ্যা রাজকুমার কমলজিৎ সিংহ তোপ তোপ্পা মজাতিগী দমক্তা ৱাজবা, হেন্না ৱাখল খনবা মীশক অমা ওইনা থোরকখি। মহাক ত্রিপুরাদা মণিপুরীশিংবু মীকপ থোকহনবদা অচৌবা থৌদাং লৌবিখি। লমদম অসিদা মণিপুরী ফুরূপকী মৈহৌরোনগী ৱারী শিংবুল খোমজিন্দুনা মীরোল ঙাংবশিংদা ঐখোয়বু মশক তাকপদা অচৌবা থৌদাং লৌবিখি। খুঙ্গং খুদিং চৎতুনা মণিপুরীগী অপুনবা মশক অমা শাগৎনবা হোৎনখি অমসুং জাতিগী ইস্যু খুদিং মহাক্না মাংজিল থানা লৈঙাক্কী মীৎয়েং চিংশিন্দুনা আন্দোলন তৌখি। মহাক্না মকোক চিংদুনা ত্রিপুরাদা অহানবা মণিপুরী সেন্সাস পাঙথোকথি। মহাক্না পুথোকপীরম্বা মণিপুরী পাউচে 'মরূপ' ঙসিসু ত্রিপুরাদা মণিপুরীবু শক্তাকপীরি। মহাক ইং ১৯৬৩ দা ত্রিপুরা টেরিটোরিয়েল কাউন্সিলদা মেম্বর অমসুং ইং ১৯৬৭ দা ত্রিপুরা বিধানসভাদা অহানবা নোমিনেটেদ এম এল এ অমা ওইনা লৈঙাক্তা য়াওশিন্দুনা মণিপুরীগী ৱা ঙাংখি। মণিপুরী লোন ভারত সংবিধানগী ৮শুবা তাংকক্তা চনবা, ত্রিপুরাদা মণিপুরীবু এস.টি লিষ্টতা চনবা, ইমালোন মণিপুরীনা প্রাইমারী থাক্তা তন্বীবা হৌদোকপা অমসুং মণিপুরী জগোই ঈশৈ শন্দোকপদা লৈঙাক্না থৌদাং লৌবিবা অসিনচিংবা দাবী কয়া তান্দুনা মহাক্না লুচিংদুনা অকনবা খোঙথাংদা চঙশিনখি। অসিগী দমক্তা মহাক্না মণিপুরী শিক্ষা সমিতি, লোন্দানবা কমিটি, ত্রিপুরা মণিপুরী অপুনবা কমিটি, মণিপুরী কালচারেল সেন্টরগী লুচিং পুরেল ওইনা মণিপুরী ফুরূপকী শক্তাক্কী ঈহৌ শাগৎখি। মহাক মণিপুরী সাহিত্য পরিষদ ত্রিপুরাগী ফাউন্ডার সেক্রেটারী মথংদা প্রেসিডেন্ট ওইনা মতম শাংনা লুপ অসিবু নুংশিনা নাউকোনবিদুনা লমদম অসিদা লোন অমসুং মণিপুরী সাহিত্য চাওখৎহন্নবা হোৎনবিরমখি। মহাক্না মতম শাংনা ময়ামগী লুচিংবা অমা ওইনা মীরোল ঙাংবা লমদম অসিদা মণিপুরীবু শক্তাক পীরম্বগী দমক তৌবিমল খঙবা উৎপা ওইনা লেমজনিংঙাই ওইরবা 'তখেল রত্ন' (পোষ্টমাস) এৱার্ড অসি হন্দক চহী মহাকপু পীবা হায়না খনখিবনি। লৈখিদ্রবা মতুংদা মনা পীদুনা ইকাইখুম্নবা উৎপসি ত্রিপুরাদা মসিনা অহানবা ওইগনি।
ফোরাম অমসুং তেংবাং লুপনা আগরতলাদা পাঙথোক্কদবা থৌরমদা চহী অসিগী ওইনা লান্থোক্কদবা নেশনেল অমসুং ষ্টেটকী থাক্তা পীগদবা অতৈ মনা মথুমশিং য়াম্না থুনা লাওথোক্লগনি হায়না ফোরামগী সেক্রেটারী খোইস্নাম মংগলনা থাদোরকপা চেরোল অদুদা পল্লি।

সোর্স - মরূপ