থিয়েটার আর্টিষ্ট অনীদা শ্যামদেব শর্ম্মা মেমোরিয়েল এৱার্দ লান্থোকখ্রে
ইম্ফাল, নবেম্বর ৪ : মণিপুরগী শক্নায়রবা থিয়েতার আর্টিষ্ট ২ মথংশীৎনা লাইময়ূম গুনবতি দেবী অমসুং হিজম শ্যামধনি সিংহদা লৌবুকতোংবম শ্যামদেব শর্ম্মা মেমোরিয়েল এৱার্দ-২০২৩ লান্থোক্তুনা ইকায় খুম্নবা ঊৎখ্রে।
ঙসি এম ৱাই সি ও (মণিপুর য়ুথস্ কালচারেল ওর্গানাইজেসন) না শীন্দুনা জে এন এম দি এ (জৱাহরলাল নেহেরু মণিপুর দান্স একাদেমী), ইম্ফালগী ওদিতোরিয়ামদা পাঙথোকখিবা এৱার্দ অসি লান্থোকপগী থৌরম অদুদা দি এম য়ুনিভার্সিতিগী ভাইস চাঞ্চেল্লর প্রোফেসার এন রাজমোহন্না চীফ গেস্ত, রঙ্গনিকেতনগী দিরেক্তর অজিৎ দাসনা প্রেসিদেন্ত, সঙ্গীত নাটক একাদেমী এৱার্দি শৌগ্রাকপম হেমন্তনা গেস্ত ওব ওনার অমসুং থিয়েতার দিরেক্তর লোইতোংবম ব্রজমোহন্না স্পিসিয়েল গেস্ত ওইনা শরুক য়াখি।
এম ৱাইসি ও (মণিপুর য়ুথস কালচারেল ওর্গানাইজেসন) না চহী ২৫ মপূং ফারকপগী হৌখিবা সেপ্তেম্বর ২৯ দগী হৌদুনা চহী অমা চূপ্না চত্থরক্লিবা সিলভার জুবিলি সেলেব্রেসনগী মনুং চন্না পাঙথোকখিবা থৌরম অদুগী লোইশিল্লকপদা মিনিস্ত্রী ওব কালচারগী সি এফ পি জি এস স্কিমগী মখাদা চহী অসিগী হৌখিবা আগস্ত ১৯ দগী সেপ্তেম্বর ১৮ ফাওবা থাবূম অমা চূপ্না চত্থখিবা থিয়েতার ৱার্কশোপ কম প্রদাক্সনদা পুথোকখিবা কালচারেল ওর্গানাইজেসন অসিগী ‘কুরঙ্গনয়নি’ হায়রিবা লীলা অসিসু ঊৎখি।
লৌবুকতোংবম শ্যামদেব শর্ম্মা মেমোরিয়েল এৱার্দ ২০২৩ ফংলবী লাইময়ূম গুনবতি দেবী-ইং ১৯৫৫ গী ফেব্রুয়ারী ২৩ দা ইম্ফাল ওয়েষ্টকী মনুং চনবা শীংজমৈ মখা থোঙাম লৈকায়দা পোকই। মহাক লাইময়ূম দাওজী শর্ম্মা অমসুং লাইময়ূম ওংবী ইবেতোন দেবীগী অমত্তা পোকচবী মচানুপীনি। মহৈগী থাক্না গুৱাহাতি য়ুনিভার্সিটিগী মখাদা পোলিটিকেল সাইন্স গ্রেজুয়েটনি।
মহাক্না কলেজ তম্লিঙৈদগী ইং ১৯৭২ দা মৈতৈ আর্তিস্ত য়ুনিয়ন, মোংশাঙ্গৈগী আর্তিস্ত অম ওইনা থিয়েতারগী লমসিদা খোঙদাবা হৌরকখি। মণিপুর স্তেত কলা একাদেমীনা শীন্দুনা পাঙথোকপা ওল মণিপুর দ্রামা ফেস্তিবেলদা ৩ লক বেস্ত এক্ত্রেস তাদুনা গোল্ড মেদল ফংখি। থিয়েটারদা নৎতনা ভিদিও ফিল্ম অমসুং মণিপুরী ফিচার ফিল্ম কয়াদসু তোঙান-তোঙানবা রোল লৌদুনা কুমখি। ইং ১৯৯৫ দা নেসনেল এৱার্দ ফংখিবা ফিল্ম ‘মায়োফিগী মচা’, ইং ১৯৯২ দা ইন্দিয়ান পেনোরামাগী সেলেক্সন ফংখিবা ‘খোন্থাং’ হায়রিবা ফিচর ফিল্ম অনী অসিদসু সার্পোর্তিং এক্ত্রেস ওইনা শরুক য়াখি। মহাক ওল ইন্দিয়া রেদিও ইম্ফালগী বি-হায় আর্তিস্ত অমসুনি।
এৱার্দ অসি পীদুনা ইকায় খুম্নবা ঊৎখিবা হিজম শ্যামধনি সিংহ-ইং ১৯৪৪ গী মার্চ ১ দা চীংঙামথকনা মৈরাকপম লৈকায়দা পোকই। হিজম থশ্বালঙৌ অমসুং হিজম ওংবী মৈপাকপী অনীগী মচানুপানি। ইং ১৯৫৮ মহাক্না হায় স্কুল তম্লিঙৈদগী হৌনা নেসনেল তুরিং দ্রামা পার্তিদা য়াওদুনা তোঙান-তোঙানবা রোল কয়া লৌদুনা লমদম অসিগী কাচিন-কোয়া থুংনা দ্রামা ঊৎপদা শরুক য়ারকই। ইং ১৯৬১ দা থিয়েতার সেন্তার, মণিপুরদা শীন্দুনা পাঙথোকপা দ্রামা ফেস্তিবেলদা নহা ওইনা বেস্ত সাপোর্তিং এক্তরগী মনা ফংখি।
ইং ১৯৬৮ তগী এম দি য়ু (মণিপুর দ্রামাতিক য়ুনিয়ন) দা য়াওদুনা য়ুনিয়ন অসিগী ওজা কয়াগী মখাদা থিয়েতারগী অকূপ্পা জ্ঞান কয়া তমশিনখিবদা নৎতনা ফোল্ক দ্রামা, সোসিয়েল দ্রামা অমসুং পৌরানিক প্লে ৫০ গী মথক্তসু শরুক য়াখ্রে। লোয়ননা থিয়েটার দিরেক্তর অমা ওইনসু প্লে কয়া দিরেক্সন পীখ্রে। মণিপুরী ফিচর ফিল্ম ৫০ হেন্না শরুক য়াদুনা মনা-মথুং কয়াসু ফংখ্রে। ইং ২০০১ দা মণিপুর স্তেত কালা একাদেমি এৱার্দ, ইং ২০১১ দা মণিপুর সাহিত্য পরিষদনা পীবা ‘নাট্যভূষন এৱার্দ, ইং ২০২১ দা পান্থোইবী নাট্য মন্দীরনা পীবা ‘মিংলেন খোংঙা এৱার্দ, ইং ২০১৫ দা রূপমহল থিয়েতারনা পীবা ‘মৈত্রম বীর থিয়েটার এৱার্দ অসিনচিংবা মনাশিং অসি ফংখ্রে। হৌজিক হৌজিক মহাক ওল ইন্দিয়া রেদিওগী এ-গ্রেদ আর্টিস্ত অমা ওইনা লৈরি।
ঙসি লান্থোকখিবা লৌবুকতোংবম শ্যামদেম শর্ম্মা মেমোরিয়েল এৱার্দ অদু এল ভুবনেশ্বরী দেবী অমসুং মহাক্কী ইমুং-মনুংনা কৎপনি। মনা অসিদা শেল ওইনা লুপা লীশীং ২০, শাল অমদি সাইতেসনসু য়াওখি।
সোর্স: পোক্নফম
0 কমেন্ট:
কমেন্ট তৌবিয়ু