হৈক্রুজম শ্যামসুন্দরদা নোংথোম্বম কুঞ্জমোহন ত্রান্সলেসন এৱার্দ ২০২৩ পীখ্রে
ইম্ফাল, সেপ্তেম্বর ৩০ : চহী ২/২ লৈরগা পীবা নোংথোম্বম কুঞ্জমোহন ত্রান্সলেসন এৱার্দ ২০২৩ হন্দক্কী ওইান হৈক্রুজম শ্যামসুন্দরদা পীখ্রে। ঙসি সাহিত্য থৌপাং লূপ (সাথৌলুপ) না শীন্দুনা এৱার্দ অসিগী দোনর ওইরিবী উরেোক য়াম্বেম লৈকায়দা লৈবা নোংথোম্বম নন্দরানী দেবীগী ময়ূমদ পাঙথোকখিবা থৌরম অমদা এৱার্দ দোনর নন্দরানীনা ত্রান্সলেতর হৈক্রুজম শ্যামসুন্দরদা এৱার্দ অসি লান্থোকখি। এৱার্দ অসিদা কেশ ওইনা লুপা লীশীং ১০, সাইতেসন ১ অমদি শাল ১ য়াওরি।
চহী অনী খুদিংগী পীবা নোংথোম্বম কুঞ্জমোহন ত্রান্সলেসন এৱার্দ অসি ফংখ্রবা ত্রান্সলেতর শ্যামসুন্দর অসি মণিপুর সাহিত্য পরিষদ, রাইটার্স ফোরাম ইম্ফাল অমদি দা কালচারেল ফোরাম মণিপুরগী লাইফ মেম্বারনি। মহাক্না ইং ২০১২ দা আর্নেস্ত হেমিংওয়েগী ‘দ ওল্ড মেন এন্দ দ সি’ বু ‘অহল ওইরবা নুপা অমদি সমুদ্র’ ইং ২০১৫ দা আর কে নরায়নগী ‘দ ভেন্দর ওব স্বিত্স’ পু ‘অথূম অহাও য়োনবা নুপা’, ইং ২০২১৯ দা রাজা রাওগী ‘কান্থপুরা’ বু মমিং অসিমক্তদা ত্রান্সলেসন তৌদুনা ফোঙখি। মসিদা নত্তনা মণিপুরগী ইহান হানবা ক্লাইমেতকী লাইরিক ‘কেরেক্তরিস্তিক্স ওব ক্লাইমেত ওব মণিপুর’ অমদি লমকোয়বশিংদা মণিপুরবু মশক তাকপা ওইন ‘মণিপুর-লেন্দ ওব ব্লু এন্দ গ্রীন মাউন্তেন্তস’ হায়রিবা লাইরিক অসিসু ফোঙখি। মণিপুরী খোরিরোলদা মহাক্না লৌরিবা থৌদাং কয়া অসিগীদমক মহাকপু শকখঙবা অমদি ইকায় খুম্নবা উৎতুনা এৱার্দ অসি মঙোন্দা লান্থোকখিবনি।
থৌরম অদুগা মরী লৈননা সাথৌলূপকী এদভাইজর শরতচান্দ থিয়ামনা, হৌজিক্কী মতম অসিদা ত্রান্সলেসন অসি য়াম্না মরু ওই। অমগা অমগগী মরক্তা ত্রান্সলেসন অসিনা থোং ওইদুনা লোন অদুবু চাওখৎনবা অচৌবা থৌদাং লৌরিবনি। ত্রান্সলেসন তৌরিবমখৈ ঐখোয়গী সাহিত্য অসি মালেমদা হেন্না খঙহনবা ঙমগদৌরিবনি হায়খি।
সোর্স: পোক্নফম
0 কমেন্ট:
কমেন্ট তৌবিয়ু