বাংলাদেশতা `মণিপুরী ভাষা উৎসব ২০২৬' পাঙথোকখ্রে
সিলেট, এপ্রিল ১১ : বাংলাদেশ মণিপুরী সাহিত্য সংসদ (বামসাস) না হৌখিবা চহী কয়াদগী বাংলাদেশতা ইমালোন মৈতৈলোনবু মহৈরোয়শিংদা শন্দোকপগীতমক চহী খুদিংগী পাংথোক্তুনা লাকপগুম হন্দকসু 'মণিপুরী ভাষা উৎসব ২০২৬' ঙরাং এপ্রিলগী তাং ১০দা আদমপুর বাজার, কমলগঞ্জ, মৌলভীবাজারদা লৈবা তেতইগাঁও রশিদ উদ্দিন হাই স্কুলগী কনফারেন্স হোলদা পাংথোকখ্রে হায়না বামসাসকী মায়কৈদগী খংহনলকখি। পনবা য়াবদি, নৈনবা থৌরম অমদি মহৈরোয়শিংগী চাংয়েং হৌদ্রিঙৈদা মৈতৈ অমসুং মৈতৈ পাঙাল মহৈরোয়শিং অমসুং থৌরম অদুদা শরুক য়াখিবা মীথুংলেনশিংনা শরুক য়াদুনা মচুনাইরবা রেলি অমা পুথোকখি অমসুং তেতইগাঁও রশিদ উদ্দিন হাই স্কুল শহীদ মিনারদা লৈ কৎতুনা লোলগীদমক থৱাই কৎখিবা অথৌবশিংগী মফমদা ইকাইখুম্নবা উৎখি।
ইমালোল ঙাংবদা ঙমলবসু ইবা-পাবদা অৱাবা কোকহন্নবগী অমদি মৈতৈ ময়েক মশক খঙহন্নবগী পান্দমদা "ইমালোল ঙাংসি, ইমালোলনা ইসি, ইমালোল নুংশিসি" হায়বা ৱাখল্লোন অসিদা বামসাসনা শিন্দুনা পাংথোকখিবা ইমালোল উৎসব অদুগী মনুং চন্না মহৈরোয় মরিফুমঙা (৮৫)রোমনা মৈতৈ ময়েক অমদি বাংলা ময়েকনা মনিপুরী লোলদা পাংথোকখিবা চাংয়েংদা শরুক য়াখি।
বামসাসকী ভাইস প্রেসিডেন্ট লৈচোম্বম প্রশান্ত কুমারনা থৌরম মপু ওইদুনা পাংথোকখিবা নৈনবা থৌরম অদুদা Patriotic Writers Forum (PAWF) মনিপুরগী সেক্রেটারি রাকেশ নাওরেম, নবকুমার ওইনাম, ৱাই. ভাগ্যচন্দ্র, সি. এইচ. সঙ্গীতা, শকনাইরবা ফোক সিঙ্গার বিনীতা লাইশ্রম অমদি সিনিয়র টিচার ৱাই. রঞ্জিত নচিংবা অখন্নবা মীওইশিংনা থৌরম অদুদা শরুক য়াখি।
বামসাসকী জেনারেল সেক্রেটারি নামব্রম শংকরনা কন্ডাক্ট তৌবা নৈনবা থৌরম অদুদা বামসাসকী জয়েন্ট সেক্রেটারি কেএইচ সমেন্দ্র সিংহ, হৈরোন ফাউন্ডেশনগী শিল্পী কোনথৌজম, মনিপুরী লাইব্রেরী এণ্ড রিসার্চ সেন্টারগী ফাউণ্ডার অয়েকপম অঞ্জু, বামসাস কমলগঞ্জ ব্রাঞ্চকী জেনারেল সেক্রেটারি হামোম প্রবিদ অমদি অতোপ্পা মশক নাইবা স্কলার কয়া না ৱা ঙাংখি।
থৌরমগী অনিশুবা তাংকক্তা মহৈরোয়শিংগী একজামদা মকোক-মথং তারবশিংদা মনা-মথুম পীদুনা ইকাইখুম্নখি হায়রি।
0 কমেন্ট:
কমেন্ট তৌবিয়ু