শক্নাইরবী ফোক্ সিংগার বেনিতা লাইশ্রম বাংলাদেশতা তরাম্না ওকখ্রে
সিলেট , এপ্রিল ০৮ : মণিপুরগী শক্নাইরবা ফোক্ সিংগার বেনিতা লাইশ্রম ঙরাং (এপ্রিল ০৭) মণিপুরী লাইব্রেরি এন্দ রিসার্চ সেন্টর (এমএলআরসি) বাংলাদেশনা শিন্দুনা লক্ষ্মীনারায়ণ মান্ডপ, ভানুবিল মীতৈ খুঙ্গংদা হরাও তরাম্না ওকপগী থৌরম অমা পাঙথোকখ্রে।
তরাম্না ওকপগী থৌরম অদুদা রিসার্চ সেন্তর অদুগী প্রসিদেন্ট লৈচোম্বম দিগেন্দ্র, পেত্রিওতিক রাইটর্স ফোরম মণিপুরগী সেক্রেতরি রাকেস নাওরেম, বাংলাদেশকী শক্লাইরবা অইবা অমসুং কবি এ কে শেরাম অমদি মণিপুরদগী ইনাৎ লাইনিংলোই চোংথাম সঙ্গিতাসু শরুক য়াখি। এমএলআরসিগী মায়কৈদগী ইন্তরনেসনেল ফোক্ সিংগার বেনিতা লাইশ্রমগী মফমদা বাংলাদেশকী ইয়োংদা শাবা ফি অমদি মেমেন্তো পিদুনা ইকায় খুম্নবা উৎখি। থৌরম অদুদা শরুক য়াখিবা বেনিতা লাইশ্রমনা ফোঙদোকখিবদা, ঙসি মহাকপু মণিপুরী লাইব্রেরি এন্দ রিসার্চ সেন্টর (এমএলআরসি)না তরামনা ওকপীবা অসি অপেনবা পোকই। অদুবু মণিপুরদা হৌজিক থোক্লিবা তমথিরবা থৌদোকশিং, তংদু লৈতাদবা ফিভমশিং অসিনা মরম ওইরগা নুংঙাইফম খঙদে হায়খি।
বেনিতা লাইশ্রমগা বাংলাদেশকী মীয়ামগা ইন্তরেক্সন প্রোগ্রাম অমসু পাঙথোকখি। বাংলাদেশকী লৈমাইদা হেক খোংদাবা মীকুপ্তা পুক্লিংদা করি ফাওখিবগে হায়না হংবা ৱাহং অমগী পাউখুমদা বেনিতা লাইশ্রমনা ফোঙদোকখিবদা, মহাক্না বাংলাদেশকী লৈমাইদা হেক খোঙদারকপা মীকুপ্তা লৈশাবী মচা ময়াম অমা উনখি। বাংলাদেসকী লৈশাবীমচাশিং অসি মশাদা ফি মচা অমমম লোইনা য়ানবা উখি। মণিপুরদদি ময়ুম পাল্লিবী মৌশিংখক্তনা ফি য়ানবগী চৎনবী লৈরি। মহাকসু লৈশাবী অমা ওইরুবনা মহাক্লা মশাদা ফি অমত্তা য়ান্দনা বাংলাদেসকী লৈশাবীশিং মমাংদা লেপ্পা মীকুপ্তা ইথন্থা ইকায়বা ফাওজখি হায়বা ৱাফম থমখি।
সেন্তর অসিগী ফাউন্দর অয়েকপম অঞ্জুনা তরামা ওকপগী ৱারোল থম্লদুনা হায়, মণিপুরদগী লাক্লিবা শক্নাইরবা ফোক্ সিংগার বেনিতা লাইশ্রমনা বাংলাদেশ লৈবাক্তা খোঙদারকপা অসি য়াম্না মমল লৈরবা খোঙচৎ অমনি। মহাক্না বাংলাদেশ লৈবাক্তা খোঙদারকপা অসিমক লৈবাক অসিদা খুন্দারিবা মীতৈশিংগী ওইনদি য়াম্না চাওথোকচবা ফাওই হায়খি।
0 কমেন্ট:
কমেন্ট তৌবিয়ু