নাউরেম রোশিবিনানা কেজি ৬০গী ৱুশু সান্দাদা সিলভর লৌখে, মণিপুরগী মীয়ামগী কত্থোকখ্রে
হাংজো, সেপ্টেম্বর ২৮ঃ চাইনানা য়ুম্বু ওইদুনা হাংজোদা চখরিবা ১৯ শুবা এসিয়ন গেমসকী শগোলশেল নুমিত্তা মণিপুরগী নাউরেম রোশিবিনা দেবিনা নুপীগী কেজি ৬০ ৱুশু সান্দা ইভেন্টতা সিলভর লৌখিবগা লোয়ননা মহাক্কী মেদল অদু মণিপুরগী মীয়ামদা কত্থোকখ্রে ।
রোশিবিনা দেবিনা মহাক্কী ফাইনেলদা দিফেন্দিং চেম্পিয়ন ওইনা শরুক য়াখিবী চাইনাগী ৱু জাওৱৈগী মখুৎতা ২-০দা মায়থীহৌখি। রোশিবিনানা সেমি- ফাইনেলদা ভিয়েটনামগী থি থু থু ঙুয়েনবু ২-০দা মায়থীবা পীরমখিবগা লোয়ননা ক্বাটর-ফাইনেলদনা কজাকষ্টানগী এমান কাশির্গাবু মায় পাকা লাকশিকল্লমখিবনি।
মদুগা লোয়ননা রোশিবিনা দেবিনা এসিয়ান গেমসকী পুৱারিদা রুশুগী ফাইনেল চঙবা অনীশুবা ইন্দিয়ান ওইদুনা অনৌবা পুৱারি অমসু শেমখি । মহাক্কী মমাঙদা মণিপুরগী অতোপ্পা প্লেয়ার ৱাংখেম সন্ধ্যারানি দেবিনা কুমজা ২০১০গী গ্বাংজো এসিয়ান গেমসতা ৱুশুগী ফাইনেল চঙখিবনি।
নাউরেম রোশিবিনা দেবিনা কুমজা ২০১৮গী ইন্দোনেসিয়ানা য়ূম্বু ওইদুনা জকার্টাদা পাঙথোকখিবা এসিয়ান গেমসকী অরোয়বা ইদিসন্দসু চপ মান্নবা কেজি কাঙলুপ্তা ব্রোঞ্জ মেদল অমা ফংখিবনি ।
মদুগী মথক্তা রোশিবিনানা কুমজা ২০১৯গী কাথমন্দু-পোখারাদা পাঙথোকখিবা সাওথ এসিয়ান গেমসতসু চপ মান্নবা কেজি কাঙলুপ অসিদা গোল্ড মেদল লৌখি।
রোশিবিনা দেবিনা মহাক্কী সিলভর মেদল অদু ফংখ্রবা মতুংদা হায়, ‘ঐনা সিলভর মেদল অসি ফংবদা নুংঙাইবা ফাওবা অদুবু গোল্ড মেদল লৌবা ঙমদবদা খরসু নুংঙাইতবা পোকই । ঐনা মসিগী সিলভর মেদল অসি মণিপুরগী মীয়ামদা কত্থোক্লি। ঐনা গোল্ড মেদল লৌনবা লৈজবা পুম্নমক পুথক্তুনা হোৎনখি। ঐনা মেটচ অসিদগী অশোয়বা অদু চুমথোত্তুনা হেন্না ফজনা শান্ননবা হোৎনগনি। ঐনা নবেম্বর থাদা পাঙথোকদবা ৱাৰ্ল্ড চেম্পিয়নশিপ্পকী হেন্না কন্না হোৎনগনি।' নাওরেম রোশিবিনা দেবিনা কুমজা ২০১৬কী জুনিয়র ৱাৰ্ল্ড চেম্পিয়নশিপ্সতা ব্রোঞ্জ মেদল লৌদুনা মালেমগী ৱুশুদা মহাক্কী মশক তাকপা হৌরকখি। মহাক্না কুমজা ২০২৩গী মোঙ্গো ৱুশু ষ্টার চেম্পিয়নশিপতা গোল্ড মেদল অমদি ২০১৭কী এসিয়ান জুনিয়র ৱুশু চেম্পিয়নশিপসু গোল্ড মেদল লৌখি।
সোর্স: সঙাই এক্সপ্রেস
0 কমেন্ট:
কমেন্ট তৌবিয়ু