• 488
• ২৬শে এপ্রিল ২০২১ ইং
• Share on:

রাজেশ্বরী য়েংখোমগী ৱারীপিকত্রু চরোং অমা – ০২

[মখন মথেলগী ৱারীমচাগী (জেনর মখল অমা) মনুংদা ৱারীপিকত্রুসু মখল অমনি। তেনতক তেনতক তৌবা ৱারীমচাগী মখল অসিবু মণিপুরী সাহিত্যদা ৱারীপিকত্রু হায়না খংনৈ। অতৈ অতৈ মমিংদা কৌবসু থেংনজৈ। ইংরেজীদা “dribble”, “flash fiction”, “micro-story”, “drabble”, “micro fiction” হায়না খংনৈ। য়ুকিপিদিয়া (Wikipedia)গী মতুং ইন্না ৱাহৈ ৫০গী (50 words) মনুংদা ইবা ৱারীমচা অদুবু “dribble” (কনা কনা গুম্বনা “minisaga”সু কৌই); ৱাহৈ ১০০গী (100 words) মনুংদা ইবা ৱারীমচা অদুবু “drabble” (কনা কনা গুম্বনা “microfiction”সু কৌই); ৱাহৈ ১০০০গী (1,000 words) মনুংদা ইবা ৱারীমচা অদুবু “flash fiction” (কনা কনা গুম্বনা “micro-story”সু) কৌই। বাংলাদা ঐখোয়না অনু গল্প (ইংরেজী micro-story গী ট্রান্সলেশন ) হায়না খংনৈ। মীতৈলোনদা ৱারীপিকত্রু মওংদা য়াম্না তেনবা, অপিকপা ৱারীমচা ইবা কয়া থেংনদে, অদুবু লৈতবদি নত্তে। সাহিত্যগী চেফোংদা, সোসেল মিডিয়াদা, নুত্তিগী ফোংবা চেফোংদা, লাইরিক ওইনা অমা অনি থেংনখ্রে। মশিং লিকপনা ওইরমগনি খল্লি, নত্রগা ঐনা থিজনবা ৱাৎপনসু ওইরম্বা য়াই। মণিপুরদগী ইরকপা ৱারী পিকত্রু খরা পাখ্রে, অইবগী মমিং অমদি ৱারীগী মমিং নিংশিংদ্রে। বাংলাদেশতা মরূপ শেরাম নিরঞ্জননা ইবা ৱারী পিকত্রু খরসু পাখ্রে। শেরাম নিরঞ্জননা ৱারী পিকত্রুগী মতাংদা ৱারেং অমসু ইখিগুম তৌই,পাখ্রে। হন্দক খরনি (চহী অনি অহুম) মশিং য়ামদ্রবসু ৱারীপিকত্রু কৌবা ৱারী মচাগী মখল অমা ওইনা মণিপুরী সাহিত্যদসু ইনরকই, পাম্নরকই। নোংমা নত্রে নোংমদি ৱারীপিকত্রু কৌবা সাহিত্যগী অনৌবা লৈরাং মখল অসি মকা ফন্দুনা শকাইরক্কনি হায়না আশা থমজরি। ক্ষেনফম অদুতবু ঙাইবা ওইনা রাজেশ্বরী য়েংখোমগী ৱারীপিকত্রু খরা অসিদা থমজরে। ৱারীপিকত্রু (রাজেশ্বরী য়েংখোমনা অসি মখলগী ৱারীমচা অসিবু ৱারী অপিশক হায়না কৌজৈ) ময়াম পাবিয়ু, নৈনবিয়ু।       – হামোম প্রমোদ ]

মরী(৭)

নাইতোম পোকচবী মমোম্না মপাম মায়কৈ পাংলকপা ঙাইরুরি থোঙ্গাল থোক্তুনা। লফুনা চাক্কৌরি ময়ামসু কৌনৈ হায়দুনা । উচিন নাচিন য়ৌরক্লে তম্ফাসনা ।

” ইমানা চাক্কা লোইনা লোয়রবনী , ফি হোংদোক্লো ইমা চাক থিরগে।,”

” লামদ্রিদা ইমা , ইন্দোমচা খোয়দা চঙলুখিগে , অঙাং অচাপোৎ য়াওরকই।”

” হায় কুইরক্কনুকো ”

চাক হেক তোকপগা হায় ” চৎনবা তৌরো , থেঙলগা মীনা করি খনখিনী। পোৎ চৈ খরা হাপ্লবনী ”

মপি ইরা চেল্লী তম্ফা য়ুমদুদা মথন্তা লৈরবী মমাগী খনবদা।

চৎলমদাইদা মেল্লকই ” অৱাং পুপুগী উৎসবতু হংচিৎনী অদুবু নঙদি লাক্লনু ঙসিসু লাক হংচিৎসু লাক … ঐনা ফনবা খুমখ্রগে।”

মচানা চৎখিবা মীৎয়েং থৎখিদ্রিফাও য়েংহৌই ইবেমহল। (৩১-১২-২০১৯)

মরী (৮)

“কাইদনো য়েন্দাসিদা নঙনা থোরক্লিসিনা য়াহৌ ঙনবী”

“হো নয়া থিরুগে নয়া ”

” থিরুরো থিরুরো , চত্তা চৎপিখ্রো হায়রিবনী , মীৎকাসে নারবনী। পূশিল্লক্কদৌবা অমসিনা তাইবং সেবাৎনদুনা লৈরে মতূ থিনি হায়সু কাউরমাল্লে । হনুবী ঐনা থোংবা চাক্তু চাদ্রদি থিবোং থন্নদ্রে । ” ঙাঙনা ঙাঙনা খূত্তী লেপ্তে ঙাঙবী ।

” নোই অদুম ঙাঙনজৌ ঐঙোন্দমুক ওনশিল্লক্কনু। মতাং চারগা থিজনি ।”

” উম , ঙাইয়ু ঙাইয়ু ঙাইয়ুকো ,ঐনা চৈশু শুরগা বর মমানিকাইনা কুজবা য়াবদু য়েংগে হায়বা নত্রো । চহি ৪০ তানখৎলবা চিরাইনা লৱাই কোক্তোন য়ৌরবা নঙনা মতাং চাবা ঙাইরিবশি ঐ শিবা ঙাইবা ওইরিনী।ঙাইয়ু ঙাইয়ু।”

“অস , হোয়দা ঐখোয় ইমাসিদি , নমৌ লাক্লগা নখূত্তা হাম্লগা পিজদোইনিবা। নুপীসুনে নঙনা পাম্বতা লৌদোইনি।”

“হরে হরে নুংঙাইদকো । ইশু পমদনা শিবসু খঙদ্রি। ”

“য়ারেবা ইমা ! দাদাগী পমদ্রসু ঐগী ইচাদুসু নশুনি, অদু কোক পমথোকউ কৈদৌগে।”

” মায়থাবীসিদি । হুজিকপু কাইদনো নোইনি না হৌনরগা থোরক্লিসিনা।”

” বেম্মাগী থবক অমত্তা চৎমিন্নরুগে ইমা, অদুদগী ঐ ওফিসতা অদুম চৎখ্রনি ।”

” ইমা ঐসু য়ুনিভর্সিটিদা অদুম চঙহৌরগে।সেমিনার লৈ থেঙবা নুংঙাইরোই।”

” অদুদি ঐনা থোংলিবা চাকসিদি নোই নপা চানবা তারেদনা ।”

অনীদু নোক নোক্তুনা কারদা কাখৎখ্রে ।

” কৈদৌরে ঙসিগী কুরুক্ষেট্রগী পূংফমসি ঙনখৎলিবসিনা” নোকমি নোকমি তৌই ইবোচৌ । মখূৎনা পায়রকপা ঊকাবি ফ্রিং ফ্রিং চোংবা য়াউবা চেরংদু পিশিল্লী ঙাঙবীদা।

” হুজিকপু ঙা অমুক …”

” ঐ শেম্বীরক্কেদা ঙাদুবুদি …চা অহাউবা অমা লোল্লক্কে হায়রদি ।”মাগী হৌনবী মীৎয়েংদুনি।

” লোন্থোক্কে , চাক থোংলিঙৈ চাসু লোন্থোক্কে।”শাউরংননা হায় ঙাঙবী , মমায়দি হুৎ লৈশিনখি নোকফেৎ তৌখিবা চিনবালদু উখিদনবা ওইরম্বা তাই। (৮-১-২০২০)

মরী (৯)

মমান্নবী তম্ফাগা প্রিয়া শিংজু চারি, নোকলি।মখোয়নিদনী লৈরিবা অদুবু প্রিয়াগী মমা মেম্মীনা অনীরক কৌবা তাদে।

” কৈ হায়গে মামা” প্রিয়ানা তারদুনা খুম্লকই।

“হায়, নঙ সিদা অমুক্তা লাউ”

” হোয় মামা” থোকখি।

” অসিগী ইরাং ফবী , চরাঙনবীসে অমুক লাক্লব্রা ? ময়া ইহি হিগৎলদনা । মমা মপাদুনা মরোল অমা লাইরবদা নত্তে মচাসু ৱারক্তে । মচানুপীসে নোংঙানবদগী কাও থাবগুম থারে গাড়ী মচাসিগা।” খোন্দু তপথরম্বদগী খরা হৌগৎলকই । থৌওইনরা হায়দি খঙদ্রে।

” অস , মামা ! তম্ফাসে থবক্ অচৌবা অমা ফংলে পরিক্ষা ঙমদুনা দিল্লীদা ট্রেনীং চত্তৌরে অদুগী উন্নবা লাকপনী।তপ্না ঙাঙুবা, ইকায়জৈ । ঐখোয়না ঙম্বা নত্তে।”

“এ! মাবো ? ”

“উম”

“ও! মদাউবু ফনা য়ারিনে।” চীনদি পৈতক তৌখি।

তম্ফাদু থোরকই শকফম হঞ্জিল্লপ

” প্রিয়া , ঐ চৎলগে অঙাং ত্যুসন মতম য়ৌরে।”

” চৎলগে হায়রিরো”

” হোয় , নঙগী লুহোংবদু য়াওনীংবনী অদুবু …দাউ য়াদ্রে য়াওবা ফংদ্রে।” মমিত্তী মেম্মীদা য়েংই ।

” মামা চৎলুখিগে”

মেম্মীদু লকক্না “উম” । (১১-১-২০২০)

মরী ( ১০)

“বিমোলা ! তারিব্রা নঙবু”

খুম্লক্তে । অমুকসু কৌই ইবেমহলনা।

” বিমোলা , লৈতব্রনে নঙবো”

” করি হায়গে ইন্দোমচা ” হৈনীংদনা খুম্লকই ফমুংদগী। কালেন নুংশাসু খাঙফম খঙদনা চাক্লি।

” নুংথিল ঙাইহাক তুম্বদা ঐনা হৌদোক্লেদো । নচন নুপীনা আগরাদগী চিঠি থারকই অমুক্তা পাবীয়ু হায়গে তৌনি। চিঠি পাবীনবা কনাসু লৈত্রে নঙগী পাবুংচাসু স্কুলদগী হল্লক্ত্রি।”

” ইন্দোমচা , ঙাইহাক লৈরগা লাকও … …অঙাংসিসু য়াদ্রে থাদোকপা।” উইরুম উইরুম খুম্লকই।

পুঙখায় অমরোম ওইরম্লনী , কৌই ইবেমহলনা।

” বিমোলা নঙবু হৌগৎলব্রো”

খোইদৌ শাউগৎলি বিমোলা মচিন্দা মুরুম মুরুম শোল্লি। খোঞ্জেল থোক্না খুম্লকই ” হো লাক্লগে লাক্লগে”

থোরকই তন্দে মান্দে মীৎ ফাক্লি ফাক্লি।

“সে সে নঙনা কৈনাহনবীগী শিংজু পামজবদুদা লৈরুরিনী , হৈসু য়াউরিবনী মিৎ শিংনবা চাশিল্লু।” ঙাঙনা ঙাঙনা হুমাং তৈথোকই।

” ই ! ইন্দোমচা অদুক লাপ্পদু নুংশা মরকসিদা .. কদায় চিঠিদি ?”

ইবেমহল হুমাং তৈথোক তৈথোক্না ফিরৈদগী চিঠি পুথোক্তুনা পী। বিমোলাদো হায়ফেৎ চিংনৈ ইবেমহল না হুমাং তৈথোকপদা তারক্ত্রিবা মীৎকী পি খরা য়াওখিবরা হায়না। (২৫-০১-২০২০)

মরী (১১)

“ইধৌ! চা সিদা লৈরে।”

” ইশু না লোনব্রা ? অদু নঙগী নবেনপোক্তুবু কদায়দা চৎকনী হায়রম্বগে ?”

” খঙদেয়ে ঐদি ”

” এ ফরে ফরে , য়েংঙু চাসে পুসিনখ্রো ইধৌ হৌজিক থক্নীংদ্রি ঈশিং থকপদা ঙাইরি । ”

থোইবী চঙখিবগা কোন্থোঙদগী থম্বাল চঙলকই। অলু ইরোনবা ফনেক , লৈহাউ মচুগী খুদৈ মতেক কুচুনে কুমেন্নে কনানা থাজগনী চহী ৮০ তানখৎলক্লিবনী থম্বাল । শাজৌনা লোন্না খল্লী ।

” হাইমা , মোয় পাবুংবু ঙরাং খ্বাঙ নায় হায়দাইনে ? ইঙ্খোল চঙলব্রো ? ”

” হায় কৈথেল্লেম্বী ! নঙদি য়েন্দা সিদা কদায়দা ঙাল্লুরিবা ? ”

” করিনো , শীংলূপকী চেঙ শেল থিল্লুবনী । ”

” ফৈ , চৎলু চৎলু , চা কাসু হোতেল দা থক্লক্লবা ওইরিনী ”

” থক্লক্তেদা চাকা অমত্তা । মেমচানা থকখো হায়হৌবনী । মোয় পাবুংদি থক্লব্রো ”

” য়ারে , থক্ত্রসু ” খোন কল্লপ। থবক কনখৎলি শাজৌ।

তুমিন্না চঙখি থম্বাল । চা গ্লাস অমা পুরগা থোরকই।

” চাসি থকপিরো হান্না , ঈংখ্রনি ।” চঙখিগে তৌই চাদু থম্লম্লগা।

” হায় গ্লাসসিদি কনানা পুসিনদোইবা ? থবক য়াম্না চিনবা শাব্রা হায়বু তেংপাক চানি নুপী নঙ।”

” করি ৱাঙাঙনো সিবু , ঐসু চা থক্কে হায়দুনা হৈরগা থম্লম্মী ঈংখ্রনি তৌবনী। ”

” অদু ওইরগনা পুরক্লোদনা সিদা ” তপথরকই খোঞ্জেলদু।

থম্বালদু তপ্লি তপ্লি চঙখি চা লৌবা। (১৫-০৪-২০২০)

মরী (১২)

“ঙসি শোরাৎনী মমাঙ লৈকাই গী অহল লৈতবদুগী ”

” অদু কৈদৌরবা ”

” চৎপিগদোই নত্রা , কাউখিনী হায়বগী নীংশিংবনী”

” ঐনা থবক অমা চৎকে হায়না হেক তৌরদি নঙগীসু অমা হেক্তা হায়জিল্লক্কনী। ঐনা চৎলিবা থবকসে থেঙবা ঙনবা তম্বা ঙমদে । নঙনা চৎলবসু য়াদ্রা লৈকাইদনী অথাপ্পসু নত্তে।”

” য়াই , মোয়’ পাবুং না ফরক তাগনি হায়রবদি ঐ চৎলুগে কৈদৌগে । শাউদ্রসু হায়বা য়াবদুবু । পোৎপাংনা কয়া কমদৌসি হায়বনো ”

” শাউবৈ ৱারো সিবো ? খঙদে , নঙনা থোকপা ফদৌবা অদুম তৌ।ঐ থেঙখ্রে , মীনা ঙাইরগা লৈরবনি। গেট থিংজিনহৌরোলাউ। ”

” হোয়”

থোকখ্রে হোবে হোবে মপুরোইবা। থবা অৱাংগী য়ুমথংনবি মচেম্মদা ফোন তৌই। মাসু চৎকনি শোরাত্তু পূং অমা তাবা দুৱায়দা চৎমিন্নসি হায়নরে।

পূং অমা তাদৌরে থবা লোইশিল্লে। ফি শেৎপা লোইরকপদুদা ফোন তৌরকই মপুরোইবনা

” ঐ লম্বীদা লৈরে ।পূঙ্খায়মুক লৈরদি য়ৌরক্লনী। ফৈজোম পুময়াৎ লৌথোক্লম্মু শোরাৎ চৎনবা, তরা চৎপী অচোইবদুসু য়েংলম্মু।” ফোন থমখ্রে।

পুময়াৎ ফৈজোম লৌথোক্লে। ফক মথক্তা লেংয়ান দুসু থম্লে।

পৈসা অচোইবসু য়াওরে। ঙাইহাক লৈরগা মপুরোইবা ঙাঙ ঙাঙদুনা চঙলকই।

” থবক চৎপদা নে না তাবজাৎ নত্তে , থবক খূদিঙ ঐগী ঙাক্তনি। নোইনা ঐঙোন্দা তৌরিসি … ”

থবা খুমদে। ৱা মচেৎ অমত্তা ঙাঙদে ।

থবানা পূথোক্তুনা থম্লিবা ফিদু তনহোং হোংলগা থোকখি । থবা তপ্না সোফাদা ফমথৈ । (০৭-০৮-২০২০)