image

রাজেশ্বরী য়েংখোমগী ৱারীপিকত্রু চরোং অমা – ০১

[মখন মথেলগী ৱারীমচাগী (জেনর মখল অমা) মনুংদা ৱারীপিকত্রুসু মখল অমনি।  তেনতক তেনতক তৌবা ৱারীমচাগী মখল অসিবু মণিপুরী সাহিত্যদা ৱারীপিকত্রু হায়না খংনৈ। অতৈ অতৈ মমিংদা কৌবসু থেংনজৈ। ইংরেজীদা “dribble”, “flash fiction”, “micro-story”, “drabble”, “micro fiction” হায়না খংনৈ। য়ুকিপিদিয়া  (Wikipedia)গী মতুং ইন্না ৱাহৈ ৫০গী (50 words) মনুংদা ইবা ৱারীমচা অদুবু “dribble” (কনা কনা গুম্বনা “minisaga”সু কৌই); ৱাহৈ ১০০গী (100 words) মনুংদা ইবা ৱারীমচা অদুবু “drabble” (কনা কনা গুম্বনা “microfiction”সু কৌই); ৱাহৈ ১০০০গী (1,000 words) মনুংদা ইবা ৱারীমচা অদুবু “flash fiction” (কনা কনা গুম্বনা “micro-story”সু) কৌই। বাংলাদা ঐখোয়না অনু গল্প (ইংরেজী micro-story গী ট্রান্সলেশন ) হায়না খংনৈ। মীতৈলোনদা ৱারীপিকত্রু মওংদা য়াম্না তেনবা, অপিকপা ৱারীমচা ইবা কয়া থেংনদে, অদুবু লৈতবদি নত্তে। সাহিত্যগী চেফোংদা, সোসেল মিডিয়াদা, নুত্তিগী ফোংবা চেফোংদা, লাইরিক ওইনা অমা অনি থেংনখ্রে। মশিং লিকপনা ওইরমগনি খল্লি, নত্রগা ঐনা থিজনবা ৱাৎপনসু ওইরম্বা য়াই। মণিপুরদগী ইরকপা ৱারী পিকত্রু খরা পাখ্রে, অইবগী মমিং অমদি ৱারীগী মমিং নিংশিংদ্রে। বাংলাদেশতা মরূপ শেরাম নিরঞ্জননা ইবা ৱারী পিকত্রু খরসু পাখ্রে। শেরাম নিরঞ্জননা ৱারী পিকত্রুগী মতাংদা ৱারেং অমসু ইখিগুম তৌই,পাখ্রে। হন্দক খরনি (চহী অনি অহুম) মশিং য়ামদ্রবসু ৱারীপিকত্রু কৌবা ৱারী মচাগী মখল অমা ওইনা মণিপুরী সাহিত্যদসু ইনরকই, পাম্নরকই। নোংমা নত্রে নোংমদি ৱারীপিকত্রু কৌবা সাহিত্যগী অনৌবা লৈরাং মখল অসি মকা ফন্দুনা শকাইরক্কনি হায়না আশা থমজরি। ক্ষেনফম অদুতবু ঙাইবা ওইনা রাজেশ্বরী য়েংখোমগী ৱারীপিকত্রু খরা অসিদা থমজরে।  ৱারীপিকত্রু  (রাজেশ্বরী য়েংখোমনা অসি মখলগী ৱারীমচা অসিবু ৱারী অপিশক হায়না কৌজৈ) ময়াম পাবিয়ু, নৈনবিয়ু।        – হামোম প্রমোদ ]

 

মরী (০১)

থবা অয়ুক্তগী নোমচেন চেন্দুনা হোৎনজৈ। ফি-রোল, অৱাৎ- অপা, চাক- ঈশিং, ধূপ -থাউমৈ ; মপুরোইবা লংফৈ চৎপদা চিত্থ- নান্থ লৈতনবা।

চৎমিন্নগদবা মপাং লাক্লে। মপুরোইবা হন্না য়েংলমদনা গাড়ী তোংখৎখ্রে নাকোংদা ফোন নপ্লগা ৱারী শানা শানা। ৱাহৈ অমত্তসু হায়বা নংহৌদা থবা লেপ্তুনা য়েংজহৌই । শ্বর হোন্দোকচৈ,লাই খুরুমজৈ অশোয় অঙাম থোকহনবীদনবা।

পূংমুক লৈরগা ফোন লাকই মপুরোইবগী,

“ফ্লাইট মনুংদা ফম্লে, চৎলুখিগে” মখা তারক্তে।

চৎমিন্নখিবা মপাংদু মাগী নূপীদা ফোন তৌরিমাল্লে , নুংশিনা পূকমেন পাউমেল্লিবদু থবাসু তায় ,

” হোয়, পাখৎকনু …পাইদৌরে …নীংথিনা লৈরম্মু … হোরেল য়ৌরগা ফোন তৌরক্কে …কুইরোয় থবক থুনা লোইশিল্লগা হল্লক্নবা তৌগে …”  থবা খোন নিক্লপ তপ্না “উম্ ”

ফোন থমখ্রে। (২৩-৮-২০১৯)


 

মরী (০২)

শাউরংননা চা ফাওবা থক্তনা থোকখিবা মপুরোইবনা ফোন তৌরকই থবাদা

” চাক্তু মী অহুমগী হাপ্লম্মু, চমফুৎ খরা ফুৎলম্মু । ঙাদি ঐনা শেমহল্লগা পূরক্লনি … নঙ ওফিস পূং কয়াদা চত্তোইনো ? ”

” ফি হোঙলে, থবক খরা য়াম্বদুদা খিত্তং ঙন্না চৎসিরা হায়দুনা…”

ঙাইহাক লকক তৌখি ” য়ারে য়ারে,” ফোন থমখি।

ফোন পায়খৎলি থবা, খঞ্জান্নৈ কনাদা ফোন তৌসিগে ওফিসতা নত্রগা মপূরোইবদা । (১০-১০-১৯)
 

মরী (০৩)

চাক্কৌবদা ইন্ননবা ফেসবুক্তা উৎলকপা ডিজাইনরগী ফিগে রানি অপাম্বা খনবদা নুমিৎ পুমতা তারগা হল্লকপদা মপূরোইবনা শাউরংননা হায়রকই

” কদাই চৎলুরিনো হুজিকফাও, মিস কোল কয়া লৈগে য়েংউ”

কেথরকই থোইবী ” অস, মোইবা! হঙচিৎ সিনেমা রিলিজ তৌবদা মোইবানা লিৎনবা মেন্ শর্ট ফজবা অমা থিরুবনেবা য়াম পামজবা অমদি লৈহৌই , সাইজ দো ফংদ্রে ।হয়েং পীগে হায়, য়াম পকচনি নঙোন্দা।”

” হেরা, অরৈবা অমা হেক্তা লিৎলসু য়াবসিবু। চা অমত্তা থক্কে।”

চা লোন্না লোন্না ফোন তৌই ” বেবী! হয়েং চৎলুরসি নঙনা হায়বা মন্ত্রী হেন্দলূমগীদূ … হায়নরে হেরোগা … খরা ঙনসিকো হয়েংদি ।”  (১২-১০-১৯)

 

মরী (০৪)

” করি এঞ্ছাংনো”

” শৌগ্ৰিনী” মপুরোইবগী খোঞ্জেলদা ঙক্না খুম্মী ইবেমহল।

” হাউদৌ মাল্লী ”

” তলব শিন্নবিদবা ঐখোয়দি মসিনা মফরে । চাকপু চাবিরক্লব্রো।” চানা চানা হংলকই ।

” আ …হোয়। ”

নূপী অহল গী ৱাহৈদা অতোম্বীগা খৎনরগা চাক চারক্ত্রিবা তোম্বনা তপ্না খুম্মী। মখা তারকই অমুক

” চাক তোক্লগা ঈশিং গ্লাস অচৌবা অমত্তা পীরকউ, থক্নবা।”   (১৩-১০-১৯)

 

 

মরী (০৫)

“থেঙলক্কনুকো মতম ফত্তে, নঙ নুপীনীকো ”

” হোয় ইমা, খঙইবা; ঐবু অঙাংদৌনা ” এম এ লোইবা চহি অনী শুরবী লিন্থোইনা খুম্লকই মমাদা। চৎখ্রে গাড়ী মচাদুদা।

” লিন্থোই লায়রি বোবো সে ঐনা উরিবসি অহুম্লক শুরবনিকো ইতৈমা , স্কুল চৎকনী চৎখ্রগা…মা ঙাওশিন্নবা হৌরবনী ।” মনাওনুপা থোইবনা হায়রকই।

” কৈদৌরম্লগে মানা ”

” রেস্টোরেন্ততগী থোরক্লিনী … নুপীশিংদুসু অমুক্তা মান্নদে।”

” ইমাইপেম্মা, নুপানী কৈনো, ফোর কাপ্লম্বদি নত্তেদনা ।ঐদি ইপা হেক পাখৎলুরে।”

থোইবা ঙাইহাক লেপ্পী, ৱা মখা তারমদনা তপ্না চঙখ্রে। (১৭-১০-১৯)

 

মরী (০৬)

“মোয় মপা! চাক হাপচিল্লবনী রাইস কুকরদা । এঞ্ছাংদি নঙনা ফদৌবা অমা য়েংলগা তৌরো। ঐ ঙসিদি খরা ঙন্দবা য়াদে, মখারোমগী নাওবী অফাওবীনা হানখিবা য়াপোত্তে।”

” কাইদনোনে নঙনা সন্ধ্যাসিদা ? ”

” হৈমা, লগাউ খাওরুদোইনি কৈনো ?”

” চত্তা চৎখো, নখোঙদু থুদেক্কে খঙনী”

” তানীংদেকো! চহী চুপ্পা অমা নঙনা জ্বার শান্নবদা ঐনা করি হায় ? হাপ্তা অমা মঙায় ঐনা পৈশা তালহৌদোয়সি । চৎলমদাইদা দাউ হাৎপা ৱা ঙাঙলক্কনু।”

” মসি কয়াদনো য়েংউকো”

” নাওতোম্বসে লাইহৌ খর লৈবনী হিদাক্তো পিথকউ চাক তোকপদা। থকচিল্লগা ঔরাইরগা লৈরমগনুকো ঐনা হনঞ্জিল্লকপদা।” ঙাঙনা ঙাঙনা থোকখ্রে ঙাঙবী ফিরৈদা য়েপ্পা জর্দা য়াদা হুকচিল্লগা। (২৫-১০-২০১৯)

 

(মথং মথং …)

 

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু