• 25
• ২২শে এপ্রিল ২০২৬ ইং
• Share on:

'চৈরাউবা' - হাওবম প্রিয়ো কুমার

... মথক্কী খরসিনা তাক্লিবদি মণিপুরদা লৈরিবা গৌড়া লাইনীং চৎপা অমদি মীতৈ/মৈতৈ লাইনীং চৎপা কাঙলুপ অনীমক্লা চৎনরিবা কেলেন্ডার অসি গ্রেগ্রোরিয়ান কেলেন্ডার অমদি থা'গী খোঙচৎকা মরী লৈননা শেম্বা লুনার কেলেন্ডার, শজিবু, কালেন... ফাইরেল, লমতানি। কেলেন্ডার অনীসি চৎনরি হায়বসিমদি তশেং তশেংলে, কক্লুবা য়াদ্রে। অদুনা কাঙলুপ অনী অসিনা য়ানরিবা চৎনরিবা লুনার কেলেন্ডার, থাবালোন অসিগী অহানবা থা শজিবুগী অহানবা নুমিৎ নোংমা পানববু কাঙলুপ অনী অসিগী চহী হৌবা নুমিৎনি হায়না লৌফম থোক্লিবনি। লাইনীংদি চৎনীংবা চৎপা য়াই। অদুবু চহী হৌবদি হৌনীংবা নুমিৎ, তাং অমদা হেক্তা হৌবা য়াবা নত্তে। মালেম'সিদা কনানসু য়ারোই, কনানসু তৌনদে।

লমদম অসিগী হৌজিক মপুং ওইরিবা গৌড়া লাইনীং অমদি মীতৈ/মৈতৈ লাইনীং চৎলিবা কাঙলুপ অনীমক্কা য়ানদুনা চৎনরিবা কেলেন্ডার অসিগী থা-গী খোঙচৎকী মতুং ইন্না শেম্বা শজিবু, কালেন... ফাইরেন লমতানি। অতোপ্পা অমনা নুমিৎকা মরী লৈননা শেম্বা গ্রেগোরিয়ান কেলেন্দার জানুৱারী, ফেব্রুৱারী... নবেম্বর ডিসেম্বর অসিনি। হায়বদি পেত্রিওটস ডে, খোঙজোম ডে, নুপী লাল নচিংবা পুম্বা গ্রেগোরিয়ান কেলেন্দারগী মতুং ইন্না পাঙথোক্নরি। লুহোংবা, দেব-কর্ম, থৌরম খুদিংমক্কী চেবাওদসু গ্রেগোরিয়ান কেলেন্দার অমদি ঐখোয়গী থাবালোনতমক শীজিন্নরি। অতোপ্পা কেলেন্দার বেঙ্গলী নচিংবগী কেলেন্দার শীজিন্নরুদ্রি।

তশেংনা ঐখোয়না চৎনরিবা কেলেন্দার অসি নুমিৎ-থা অনীমক্কা মরী লৈননা শেম্বা লুনি-সোলার কেলেন্দার সিষ্টেমনি। অদুনা অমুক অমুক ৱাখল তানদবা য়াওরকই। শজিবুগী নোংমা পানবদগী মথংগী শজিবু নোংমা পানবা ফাওবা মতম লৈবা খিবিক্তা নুমিৎ ৩৬৫ শুদ্রি, চহী ফাদ্রি। অদুনা নুমিৎ মশীং শুদনা মতৌ করম্না শজিবুগী নোংমা পানবদা অনৌবা চহী হৌফম থোক্লিবগে হায়বগী ৱাফম চোংথোরক্লি। অদুগা এপ্রিলগী ১৩/১৪ দগী মথং এপ্রিল ১৩/১৪ ফাওবদা নুমিৎ ৩৬৫ নি শুদুনা মপুং ফারে। অদুনা হায়রিবা তাং অসিদা চৈরাউদুনা অনৌবা চহী হৌগদবনি হায়বসিনা চুম্ফম থোক্লিবরা? নুমিৎকা মরী লৈননা শেম্বা কেলেন্দারগী থা অমা হেক্তা লৌরসি, থা'দুগী তাংসু অমা হেক্তা লৌরগা মথং চহীগী চপ মান্নবা তাং অদু ফাওবদা নুমিৎ ৩৬৫ নি শুদুনা চহী অমা ফাফম থোকই। অদুবু অতম্ননা এপ্রিল ১৩ /১৪ বু ঐখোয়না লামশিল্লুরিবনো? ঐখোয়গী থাবালোনগা মরী লৈনবসু নত্তে, ঐখোয়না চৎনরিবা গ্রেগোরিয়ান কেলেন্দারগসু মরী লৈনরুদ্রি। অদুবু বেঙ্গলী কেলেন্দারগদি চপচানা মরী লৈননা শেম্বনিনা নুমিৎ ৩৬৫ গা পুং ৬ মুক্লা চহী অমা শেম্লি। অদুনা বেঙ্গলগী কেলেন্দারগী অরোইবা থা চৈত্রগী অরোইবা নুমিৎ অদু এপ্রিল ১৩/১৪ তাবনিনা এপ্রিল ১৩/১৪ দা মখোয়গী চহী লোইবগী থৌরম চড়ক পূজাণ্ডম ঐখোয়সু হান্না চৎনরম্বা চহী লোইবগী থৌরম চৈরাউবা অদু পাঙথোকফম থোক্লিবনি। করিগুম্বা চহী মপুং ফাই, মসিনা চুম্নে হায়দুনা এপ্রিল ১৩/১৪ দা চৈরাউবা কাঙলুপকী মীওই অমা শজিবু নোংমা পানবদা লৈতবা য়াওরবদি চহী অমা লৈরগা পাঙথোক্লরিবা ফিরোই মথং চহীগী শজিবু নোংমা পানবদা চহী শুদ্রবসু অনুস্মক পাঙথোক্কনি।

মীতৈ/মৈতৈ কাঙলুপ পুম্বনা য়ানদুনা চৎনরিবা কেলেন্ডারদি থা-গী খোংচৎকা মরী লৈননা শেম্বা লুনার কেলেন্ডারনিনা চহী অমবু নুমিৎ ৩৫৪ রোমনা শারি। অদুবু নুমিৎ ৩৬৫ শুগদবা ৱাৎলিবা নুমিৎ মশীংশিং অদুনা পুনশিল্লগা চহী অহুম খুদিংগী অতোপ্পা থা অমা শেম্লি। চহী অমদা থা ১৩ লৈবদি য়াদবনিনা হেনগৎলক্লিবা থা অদু হান্না লৈজবা থা অমদা পুনশিল্লি। পুনশিল্লিবা থা অদুগী অহানবা থা'দুবু অধিক নৎত্রগা মলা মাস (অমাংবা থা) হায়দুনা অফ-নুংঙাই তানখৎলকপগী থৌরম অমত্তা পাঙথোক্নদ্রি। অদুগা অকোনবা থাদুবুনা নিজা নত্রগা শুদ্ধ মাস হায়না মদুদা পাঙথোক্লরি। মসিসু ঐখোয়না মপান্দগী পুশিল্লক্লিবনি। থা'গী খোঙচৎতা শেম্বা কেলেন্ডার চৎনবা কাঙলুপ খুদিংমক মলা মাস চৎনরি। মসিনা তাক্লিবদি চহী ফাহন্দ্রিবা নুমিৎশিংবু মাঙহন্দ্রি শীজিন্নরি। ৱাফম অমনা মীতৈ/মৈতৈ গৌড়া লাইনীং চৎপা কাঙলুপনা থৱানগী ২৩ নি পানবা নুমিৎপু চহী খুদিংগী শ্রীকৃষ্ণগী মপোক নুমিৎ 'কৃষ্ণ জন্ম' হায়না পাঙথোক্নরি। শজিবু নোংমা পানবা অমদগী মথংগী শজিবু নোংমা পানবা ফাওবদা চহী শুদবগুম থৱানগী ২৩নি পানবদগী মথংগী থৱানগী ২৩ নি পানবা ফাওবদসু চহী শুদ্রি। ইং ২০১৯ গী আগষ্ট ২৪ দা থৱানগী ২৩ নি পানবদা 'কৃষ্ণ জন্ম'গী থৌরম পাঙথোকখি। অদুগা ইং ২০২০ দনা আগষ্ট ১১, থৱানগী ২৩ নি পানবদা 'কৃষ্ণজন্ম'গী থৌরম অসি পাঙথোকখি। হায়বদি কৃষ্ণ জন্মগী থৌরম চহী মপুং ফাদ-ফাদনা পাঙথোক্লি। অমুকসু শিবরাত্রি, য়াউশঙ, কাং, ঝুলন নচিংবা অমদি ঐখোয়গী ইমোইনু ইরাৎপা, লমতা শরোই খাঙবা, হৈক্রু হিদোংবা, নিঙোল চাক্কৌবা নচিংবা খুদিংমক অসি মলা মাস লৈবা চহী নৎতনা চহী ফাদ-ফাদনা পাঙথোরুবা ঙাক্তনি। মসি থাগী খোঙচৎ কী মতুং ইন্না শেম্বা লুনার কেলেন্ডারনা ওইহল্লকপা ঙাক্তনি। 
 

মথক্কী খরসিনা তাক্লিবদি মণিপুরদা লৈরিবা গৌড়া লাইনীং চৎপা অমদি মীতৈ/মৈতৈ লাইনীং চৎপা কাঙলুপ অনীমক্লা চৎনরিবা কেলেন্ডার অসি গ্রেগ্রোরিয়ান কেলেন্ডার অমদি থা'গী খোঙচৎকা মরী লৈননা শেম্বা লুনার কেলেন্ডার, শজিবু, কালেন... ফাইরেল, লমতানি। কেলেন্ডার অনীসি চৎনরি হায়বসিমদি তশেং তশেংলে, কক্লুবা য়াদ্রে। অদুনা কাঙলুপ অনী অসিনা য়ানরিবা চৎনরিবা লুনার কেলেন্ডার, থাবালোন অসিগী অহানবা থা শজিবুগী অহানবা নুমিৎ নোংমা পানববু কাঙলুপ অনী অসিগী চহী হৌবা নুমিৎনি হায়না লৌফম থোক্লিবনি। লাইনীংদি চৎনীংবা চৎপা য়াই। অদুবু চহী হৌবদি হৌনীংবা নুমিৎ, তাং অমদা হেক্তা হৌবা য়াবা নত্তে। মালেম'সিদা কনানসু য়ারোই, কনানসু তৌনদে। গ্রেগোরিয়ান কেলেন্ডার চৎনরিবা কাঙলুপনসু জানুবারী ১৪ দা চহী হৌবা য়াগদ্রা? থা'গী খোঙচৎকা মরী লৈননা শেম্বা কেলেন্ডার চৎনবা কাঙলুপ হিন্দু, তেলেগু নচিংবা অমত্তনসু এপ্রিল ১৩/১৪ দা চহী হৌরোই, নুমিৎ অসিদা থাবালোন, লুনার কেলেন্ডারগী অহানবা থাগী অহানবা নুমিৎ তাশিল্লুবা নত্তনা। চহী হৌবা হায়বসিমক্তবু ঐখোয় ঐখোয়না চৎনরিবা কেলেন্ডার দুগী অহানবা থাগী অহানবা নুমিৎতুদগী চহী হৌগনি।
চৈরাউবগা শাগোন্নদুনা পাঙথোক্লিবা শজিবুগী ৮ নি পানবা নুমিৎতা কোংবা চৈরাউবগা শাগোন্নদুনা পাঙথোক্লিবা লৈথোঙ ফাৎপা, শজিবু লৈখুন ফুনবা হায়বা লৈবাক্কী অফ-ফত্তা, খুদম চাংদম য়েংবগী থৌরম অসি ঙসি ফাওবা কায়দনা চৎথদুনা লাক্লি। অদুবু এপ্রিল ১৩/১৪ দা চৈরাউনরিবা অয়াম্বা শজিবুগী ৮ নি পানবগী মতুংদা লাউনরি। ইং ২০১৯, এপ্রিল ১৪ দা চৈরাউখি।
 

অদুবু শজিবুগী ৯নি পানখি। ইং ২০২০ গী এপ্রিল ১৩ দা চৈরাউবসিদনা শজিবুগী ২১নি পানবা নুমিত্তনি। ইং ২০২২ গী চৈরাউবনা এপ্রিল ১৪ শজিবুগী ১৩নি পানবনি। অদুনদি চৈরাউবগা তৎন-থানবা য়াদ্রিবা শজিবু ৮ নি পানবগী অসুক লুখ্রবা মরু ওইরিবা থৌরম অসিনা কমদৌবা? হায়বদি এপ্রিল ১৩/১৪ দা চৈরাউবা তারবদি চৈরাউবগী মপুং ফাবা ৱাহন্থোক ওইহল্লি। জানুৱারী ১ দগী অমদি বেঙ্গলী কেলেন্দার অহানবা বৈশাখতগী চোন্থখ্রগা চহী হৌরুবা য়াগদ্রা? অসিগুম্লদুনা মীতৈ/মৈতৈ গৌড়া চৎপা অমদি মীতৈ/মৈতৈ লাইনীং চৎপা কাঙলুপ অনীনা য়ানদুনা চৎমিন্নরিবা লুনার কেলেন্দারগী অহানবা থা শজিবুগী অহানবা নুমিৎত্তগী চোন্থরগা চহী হৌরুবা য়াফম থোকতে।

অচম্বা মীৎয়েং অমগী মখাদা মথক্কী খরসি থমজবনি। চহী হৌবগা লাইনীংগা অদুক হকচিন্ননা মরী লৈনফম থোক্তব্রা খল্লি। মীতৈ/মৈতৈ গৌড়া অমদি মীতৈ/মৈতৈ লাইনীং চৎপা কাঙলুপ অনীনা পুন্না লমতা থাদা শরোই খাঙমিন্নবগুম, নিংঙোল চাক্কৌবগুম, ইমা ইমোইনু ইরাৎপগুম কাঙলুপ অনী অসিনা পুন্না চৎনরিবা লুনার কেলেন্দারগী মতুং ইন্না অহানবা থা শজিবুগী নোংমা পানববু চহী হৌবা 'চৈরাউবা' হায়দুনা পুন্না পাঙথোকমিন্নফম থোক্লিবনি। তৌবতবু মাগী মাগী অপাম্বদা হায়বদুদা তারে।

কনাগুম্বা খরনা চৈরাউববু মীতৈ/মৈতৈ চৈরাউবা হায়নবা য়াওরি। মসিমদি হায়হন্নিংদে, চৈরাউবা হায়বা ৱাহৈ (লোন) অসি মালেমদা ঐখোয় নতনা অতোপ্পা অতৈ অমত্তনসু শীজিন্নদ্রি। অদুনা চৈরাউবা হায়বদা ঐখোয়গীনি হায়বসি অদুম খঙদুনা লৈরে। করিগুম্বা মীতৈ/মৈতৈ হাপচিল্লুরবদি মীতৈ/মৈতৈ লাইনীং চৎপা খক্কী ওইনা লৌনখিদুনা অখুবা মীৎয়েং অমা চৎখিবসু য়াই।

কোর্টেসি - মরূপ