মণিপুরগী নুপামচাগী পুমসে গ্রুপ অমসুং হাফিজানা গোল্ড লৌরে
ইম্ফাল, আগস্ত ২০ : মহারাস্ত্রনা য়ূম্বু ওইদুনা ঔরঙ্গবাদকী দিভিজনেল স্পোর্তস কমপ্লেক্স সম্ভাজি নগরদা চত্থরিবা ১৪ শুবা নেসনেল জুনিয়ার ক্যোরুগি অমসুং পুমসে তাইক্বান্দো চেম্পিয়নশিপ ২০২৪ কী ঙসি লোইশিনবা নুমিৎতা মণিপুরনা নুপামচাগী পুমসে গ্রুপ ইভেন্ততা গোল্ড অমসুং ক্যুরোগিগী নুপীমচাগী কেজি ৫৫ গী কাংলূপ্তা হাফিজা খাতুন্না গোল্ড লৌখ্রে।
মফম অসিদা ফংবা পাউনা হায়, নেসনেল চেম্পিয়নশিপ অদুগী ঙসি লোইশিনবা নুমিৎতা মণিপুরগী এল রোহিত সিংহ, বিদ্যানন্দ অমসুং আর কে লোইকান্ত সিংহনা শাবা গ্রুপ্না পুমসে নুপমচাগী গ্রুপকী কম্পিতিসন্দা মকোক ওইদুনা গোল্ড মেদল লৌখি।
ঙসি নুমিদাং অথেংবদা শান্নখিবা ক্যোরুগিগী নুপীমচাগী কেজি ৫৫ গী মখাদা মণিপুরগী হাফিজা খাতুন্না গোল্ড লৌবা ঙমখি।
ঙরাং নেসনেল চেম্পিয়নশিপ অদুগী ক্যোরুগি কম্পিতিসন্দা নুপীমচাগী কেজি ৫৯ মখাগী কাংলূপ্তা মণিপুরগী লক্ষিসনা কোন্থৌজম্না সিলভর লৌখি, অদুগা নুপীমচাগী কেজি ৬৩ গী মখাগী কাংলূপ্তা ঘরলক্সমি ফুরাইলাৎপম্না ব্রোঞ্জ মেদল লৌবা ঙমখি। মণিপুরনা ঔরঙ্গবাদকী নেসনেল চেম্পিয়নশিপ অদুদা গোল্ড অনী, সিলভর অমা অমসুং ব্রোঞ্জ অমা য়াওনা পূন্না মেদল ৪ ফংবা ঙমখি।
চেম্পিয়নশিপ অদুদা ক্যোরোগিগী ওইনা রাজকুমারী হরিপ্যারি দেবী অমসুং নোংথোম্বম সিংহজিৎ সিংহনা তিম মেনেজরশিং, সোরাইসম অনিতা অমসুং শগোলশেম রোজেশনা তিম কোচশিং ওইনা, অদুগা পুমসেগীনা নোংথোম্বম সিংহজিৎ সিংহনা মেনেজর অমসুং রাজকুমারী হরিপ্যারি দেবীনা কোচ ওইনা লুচিংখিবনি।
সোর্স: পোক্নফম
0 কমেন্ট:
কমেন্ট তৌবিয়ু