মিলালনা মণিপুরী লোলগী নুমিৎ থৌরম পাঙথোকখ্রে
ইম্ফাল, আগস্ত ২০ : মীতৈ ইরোল ইয়েক লোইনশিল্লোল অপূনবা লূপ (মিলাল) না শীন্দুনা মণিপুরী লোননা ইন্দিয়ান কন্সতিত্যুসনগী ৮ শুবা সেদ্যুলদা চনখিবা নুমিৎ অদুবু নীংশিংদুনা ঙসি মণিপুরী লোলগী নুমিৎ থৌরম পাঙথোকখ্রে।
ইম্ফালগী কংলাপাৎতা লৈবা মিলালগী ময়ায় লোইশঙদা পাঙথোকখিবা থৌরম অদুদা মিলালগী প্রেসিদেন্ত খাইদেম ইঙোচা মীতৈ, ভাইস প্রেসিদেন্ত ৱাইখোম গোজেন মীতৈ, সেক্রেতরি (ফাইনান্স) মাইবম ইন্দ্রজিৎ মীতৈনা প্রেসিদিয়াম মেম্বার ওইনা শরুক য়াখি।
থৌরম অদুদা মিলালগী প্রেসিদেন্ত খাইদেম ইঙোচানা হায়, ঙসি অসি মণিপুরী লোননা ইন্দিয়াগী ৮ শুবা সেদ্যুলদা চনখিবা নুমিৎ অদুবু নীংশিংমিন্নদুনা মণিপুরগী মপাল য়াওনা লমদম অসিগী তোঙান-তোঙানবা মফমশিংদা হরাও-তয়াম্বা ফোঙদোক্তুনা থৌরম অসি পাঙথোক্নরি। মসিমক য়াম্না নুংঙাইবা অমদি অপেনবা অমা পোকই। মসিনা অমরোমদা থম্লগা, মণিপুরী লোল অমদি ময়েক অসি হেন্না চাওখৎনবা হোৎনগদবা থবক-থৌরম কয়া অমা হৌজিক ঐখোয়গী মাঙদা তাদুনা লৈরি। মসিদা খ্বাইদগী মরুওইবা থৌদাং লৌদুনা লোল, ময়েক চাওখৎনবা হোৎনগদবা গবর্নমেন্তগী মরী লৈনবা দিরেক্তোরেত ওব লেঙ্গুয়েজ প্লানিং এন্দ ইমপ্লিমেন্তেসন অসি মঙম ইশান শান্দবগী মমি উরি। মসিমক য়াম্না লাইবক থীবনি।
রাজ্য সভাগী এম পি নিংথৌ সনাজাওবা লৈশেম্বা অমসুং চীফ মিনিস্তর নোংথোম্বম বীরেন্না পাউ-চে অমদি সোসিয়েল মিদিয়াগী প্লেতফোর্মদা মণিপুরী লোল চাওখৎহন্নবা থবক-থৌরম লৌখৎনবগীদমক সেন্তরনা লুপা কোতি ১৮ কায়থোরক্লে হায়না ফোঙদোকখিবা লৈরে। মসিমক্তি মণিপুর মীয়ামগী ওইনা লাইবক ফবনি। মণিপুরী লোনগীদমক এম পি অমদি চীফ মিনিস্তর অনীনা হোৎনবিরিবা অসিমকা থাগৎনীংঙাইনি হায়নসু ইঙোচনা মখা তানা ফোঙদোকখি।
সোর্স: পোক্নফম
0 কমেন্ট:
কমেন্ট তৌবিয়ু