স্নাখ্যা কমলজিৎ, ঐজ্ঞা কৌশিনিবু ইকাইখুম্নদুনা লক্ষিপুরদা ৩৩শুবা মণিপুরী লোলগী নুমিৎ
শিলচর, আগস্ত ২৫ : মণিপুরী লোলবু ভারত সংবিধানগী ৮ শুবা চনখিবা নুমিৎপু নীংশিংদুনা আগস্ট তাং ২০ লক্ষিপুরদসু ৩৩শুবা মণিপুরী লোলগী নুমিৎ পাউথোকখ্রে। নহরোল খোরিরোল শিল্লুপ, আসাম য়াওনা লুপ মরিনা শীল্লাংদুনা খোরিরোলগী শঙলেন্দা পাঙথোকখিবা থৌরম অদুদা মণিপুরী সাহিত্য পরিষদ, লক্ষিপুর ডিষ্ট্রিক্টকী প্রেসিডেন্ট খাইদেম গৌরহরি, মালাদেশ আসামগী প্রেসিডেন্ট প্রোঃ জি নরহরি শর্মা, মণিপুরী চনুরা খোর্জৈ লুপকী ভিপি থোকচোম অঞ্জনানা মীফম মপু ওইদুনা চত্থখিবা খন্ন নৈনবা থৌরমদা মণিপুরী সোর্ট ষ্টোরি ইন্ডিয়াগী ভিপি খাইদেম কান্তানা অখন্ননা লোলগী নুমিৎগা মরী লৈননা ৱা ঙাংখি। চনুরা খোর্জৈগী ভাইস প্রেসিডেন্ট লাইশ্রম ওংবী বিনোদীনি অমসুং ইঙুদম নীলবির নচিংবনা ইমালোল নুমিৎকা মরীলৈননা ৱা ঙাংখি।
থৌরম হৌগৎলকপদা লোলগী ঈহৌদা চাওনা শরুক য়াখিবা লৈখিদ্রবা অহল লমনশিংগী মফমদা হৈরাং লৈরাং কৎপগা লোয়ননা কোইরু থাউমৈ থান্দুনা ইকাইখুম্নখি। লোল অসিবু ৮ শুবা সেদুল্ডা চলহন্নবা হোৎনবদা থৱায় হকচাং য়াওনা লমজিংবিরম্বা অমদি চহী চামশুবা মপোক কুমওনগা মরী লৈননা লৈখিদ্রবা শক্নাইরবা মীওই অনী ত্রিপুরাগী রাজকুমার কমলজিৎ সিংহ অমসুং আসামগী অরিবাম কৌশিনী শর্মাগী মফমদসু লৈসু কৎতুনা ইকাইখুম্নখি। মখোয় অনীগী মরমদা ইঙুদম বিনোদ অমসুং কব্রবম অনিতা দেবীনা মথং মনাও নায়না ৱা ঙাংখি।
অরোইবদা কবি তাহের সাজবম, কবি আব্দুল আহমেদ, কবি চাংখ্রাময়ুম বিদিত কুমারনা মীফম মপু ওইদুনা শৈরেং শৈদিন্নবগী থৌরম অমসু পাঙথোকখি। থৌরমদা অইবা-অইবী ১৮ না শরুক য়াখি। থৌরম অদু খোর্জৈলুপকী থৌবুরেন অয়েকপম সূর্য্যমুখিনা কন্ডাক থৌবিখি।
সোর্স: মরূপ
0 কমেন্ট:
কমেন্ট তৌবিয়ু