“মালংবনা করি হায়” শৈরেং লাইরিক অসিদা সাহিত্য একাদেমি মনা ২০২০ ফংলবা দাঃ ইরুংবম দেবেন
সাহিত্য একাদেমি মনা ২০২০ ফংলবা দাঃ ইরুংবম দেবেনগা ৱারী শান্নবাঃ তোংব্রম অমরজিৎ
ঐহাকনা থাজবগী মতুং ইন্না পোইত্রি হায়বসিনা খুনাই অমদা খজিক্তা নত্তনা য়াম্না ইনফ্লুয়েন্স তৌবা ঙম্মি হায়বসিদি চুমই। কনাগুম্বশিংনা শৈরেংনা করিসু অহোংবা লাকহনবা ঙমদে মসিদি আর্ত ফোর্ম অমনি হায়বসু য়াওদবা নত্তে অদুবু ঐনা থাজবদি মসি অদুক্কী মতিক মচিন থৌই হায়না খঞ্জৈ। হৌরক্লিবা নহারোল অইবশিংদা হায়জনিংবদি খোরিলোল হায়বসিদা চংদ্রিঙৈদা মসিবু করিনো হায়বসি হান্না মমুৎ তানা খঙবা মথৌ তাই অমদি লাইরিক য়াম্না পাবা অমদি নৈনদুনা মনিপুর মনুং অমসুং মপাল লমদা চেল্লিবা খোরিলোলগী ঈচেল অসিনা করিনো হায়বসিসু খঙজিনবা তঙাইফদে হায়না লৌজৈ।
য়াংনা চেন্থরিবা মতমগী খোঙজেল অসিবুদি কনানা খাম্বা ঙম্লুগনি। তুরেল লাইজগী ঈচেলসু অদুমঙাই। অদুমক চেন্থখি। য়েন্নিংথা অমুক লাক্কনি। নাকেন্থা অমুক থুংলগনি। নোংজু পান্থা লাক্তুনা পুম্নমক অমুক তরু তশেংনা চামথোকলগনি। শিন্থা অমমমদি পাংথোক্তবা ময়াদে। মসি হৌনবীনি তাইবঙপানসিগী। মীওইবা খুনাইদা ৱারী লীজবা, পাউদমজবনা অইবশিংগী নুংঙাইজবনি। অফবা ৱাখল্লোন খরদং শন্দোক্তুনা পুন্সি ঈশৈ শক্লম্বনা মহৈ য়ানগনি খঞ্জৈ শৈরাংবশিংনা। খুনাই অমগী লৈঙাক্লোনগী মশক, কলচর অমদি ত্রেদিসনগী শক্তমশিং, পুন্সি মহিং পুম্নমক খোরিরোলদা মমি তাদনা তোক্তে। মিনিস্ত্রি ওফ কলচরগী, গভর্মেন্ট ওফ ইন্দিয়াগী মখাদা লৈরিবা নেসনেল একাদেমি ওফ লেটর্স, সাহিত্য একাদেমি ১৯৫৪দা লিংখৎখিবদগী হৌনা একাদেমিনা অমদি ইনিদয়ান কন্সতিত্যুসন্না মশক খঙলবা লৈবাক অসিগী লোল ২৪দা লৈরিবা তোঙান তোঙানবা খোরিরোলগী হীরমশিংদা লাইরিক ইরিবা অইবশিংদা চহী খুদিংগী মনা কয়া পীদুনা লাক্লি। একাদেমিগী পান্দমসু কাংলুপ ফুরুপ কয়ানা খুন্দাদুনা লৈরিবা চাওখ্রবা লৈবাক অসিদা মাগী ,মাগী লোল ময়েক, পুৱারী, কলচর, ত্রেদিসন পুম্নমক ঙাকনবা হোৎনবদা অইবশিংনা লৌরিবা থৌদাং অসি ইকায়খুম্নবনি অমদি পুকনিং থৌগৎপনি। পুৱারী শেম্লম্বনি তুংগী মীরোলগীদমক। অসুম্না লেপ্তনা চত্থরকপা থৌরম ওইনা কুমসি চহীগী ওইনা লেমজনিংঙাই ওইরবা সাহিত্য একাদেমি এৱার্দ, ২০২০গী মনিপুরী লোলগী ওইনা দাঃ ইরুংবম দেবেন্না ইবা শৈরেং ৭৯গী খোমজিনবা লাইরিক “মালংবনা করি হায়” হায়বসিদা পীরগনি হায়না লাওথোকখ্রে। অইবসি মমাংদা মনা কয়াসু ফংখিবা লৈরে। হন্দক মনা ফংলিবা লাইরিক অসি মনিপুরী লিটরেরি সোসাইটি, ইম্ফালনা ফোঙবনি। লাইরিক অসি অশৈবনা “নোংম-নোংমগী ওইনা থবক শূ-নোমদুনা ইমুং পুরিবী লমদম অসিগী নুপীশিংগী মফমদা” কৎথোকপা অদুগুম্বা শৈরেং লাইরিকনি। মনা অসিদা শেলগী মনা ওইনা লুপা লাখ অমা অদুগা কোপর কাস্কেট প্লেখ অমা অমদি সাল অমা য়াওরি। মেদিকেল প্রোফেসনদা লৈদুনা কমদৌনা মনিপুরী খোরিলোলদা খোঙদারকখিবগে হায়বসিদা দাঃ ইরুংবম দেবেনগী পুকনিংগী পাউদম অদুম থমজরি।
সাহিত্য একাদেমি, নিউ দেল্লীনা হন্দক্তা লাওথোকখিবা ২০২০গী মনিপুরী লোলগী ওইনা “মালংবনা করি হায়” হায়রিবা শৈরেং লাইরিক অসিদা সাহিত্য একাদেমি এৱার্দ ফংলকপদা পুকনিংদা করি ফাওবীবগে?
য়াম্না তাংনা ফংবা এৱার্দনি অদুনা ঐগীদমক্তদি য়াম্না নুংঙাইজখি।
কমদৌনা হৌরকপা, চাওরকপা মহৈ মশিং তম্লকপা খরদং..
ঐহাক তৌবাল সব দিভিজনগী মনুংদা লৈবা তেন্তা হৈবুংদা পোকখি। বাবাগী মিংনা ইরুংবম তোম্বা কৌই অদুগা ইমাগী মিংনা মোইরাংথেম নিংঙোল ইরুংবম ওংবী মেমচা কোই। লাইরিক লাইশুদি য়ু জে বি স্কুলদগী হৌদুনা তেন্থা খুনৌদা লৈবা হাইস্কুলদা ক্লাস তেন ফাওবা মথং মথং তম্লকখি। মসিগী মতুংদা দি এম কলেজ ওফ সাইন্সতা তমলকখি। প্রি মেদিকেল এন্ত্রান্স একজাম পাস তৌদুনা রিমস্তা মেদিকেল লাইন্দা অমুক তমথখি। এম বি বি এস লোয়রগা থবক পাক হেক ফংখিদে। সরকারগী থবক কয়া কৌখিদে। অহানবা এম পি এস সি না থবক কৌরককখি অদুবু মায় পাকখিদে। কোণ্ণা খরা লৈরগা অমুক থবক কৌরকখি মদুদা একজাম থাখি। মসিগী মমাংদা দেল্লীদা মতম খরা থবক তৌরমখি। ২০০১দা রিমসকি এনাতোমি দিপার্তমেন্টতা থবক হান্না চংদুনা লৈরবা মতমসিদা অমুক এম পি এস সি একজাম থারুবদু খল্লক্তুনা তাকপী তম্বীবগী থবক্তা মায় ওনশিনখি। ইন সার্ভিস্তা মখা তমথদুনা পি জি লোয়দুনা ২০০৬তা এমদি ওইনা থবক মখা তৌখি। হৌজীকনা প্রমোসন কাদুনা এসোসিয়েট প্রোফেসর ওইনা তিচিং লাইন্দা এম বি বি এস মহৈরোইশিং তাকপী তম্বীরি।
করম্বা মতমদগী খোরিলোলদা খোঙদারক্তুনা শৈরেং ইবা হৌরকখিবগে?
হায়স্কুল তম্লকপা মতমদা খোরিলোলগী ওইবা ইথিল অসি লাকখি। লাইব্রেরিদা লৈবা লাইরিকশিং অসি অয়াম্বা পাদুনা লাকখি। লাইরিক পাবগী হৈনবী অমদি য়াওদুনা লাকখি। মতমদুদা লাইব্রেরিদা লৈরিবা লাইরিকসি শৈরেংদি কয়া য়াওদে। দ্রামা ৱারীমচা, নোভেল, ঐনা নীংশিংবদা কৃষ্ণকান্তগী ৱিল, ত্রান্সলেসননি, এলাংবম দিনমনিগী ৱারীমচাগী লাইরিক অসিনচিংবা অসি পারকখি। মতমসিদা তেন্তাদা খোরিলোলগী ওইবা ইহৌ অমদি অদুম লাকপা মতম্নি। চেফোংনচিংবা অদুম ফোঙনবা লৈখি। স্কুলগী চেফোঙদা হাপ্নবা শৈরেংশিং ইবা হৌখি। ইশাগী ওইনা হাপত্রগসু অতোপ্পা মরুপ মপাংগী মিংদা শৈরেং হাপ্পা অদুম চৎনরমখি। অদুবু অদুক য়াম্না কন্নদি ইবা ওইখিদে। ৱারীমচাসু অদুম ইখি। অদুবু থোইদোকনা চেফোঙশিংদা হাপ্পগী খল্লুদে মতমদুদা। কলেজ মতমদদি সাইন্সতা তম্বনিনা অদুক য়াম্না সাহিত্যদা চংশিল্লুবা ঙমখিদে অদুবু লাইব্রেরিদদি লাইরিক অদুম পাখি। কলেজ মেগাজিন্দি অদুম খরদি হাপখি। এম বি বি এস লোয়রবা মতুংদা দেল্লিদা চংখি। কোণোট প্লেস্তা মরক মরক্তা চৎখি। মদুদা লাইরিক খরা খরা অদুম লৈশিনখি। মতমসিদা শৈরেং খরা খরা ইখি। তুমিন তুমিন লৈবা নাইতোম তাবা পুন্সিগী তাংককশিংদা শৈরেং পাখি অমদি ইবসু ইখি। য়ুমদা থোক্লকলবা মতুংদা ১৯৯৯দা ঐগী অহানবা শৈরেংগী লাইরিক ‘মোহিনি’ ফোংখি। মসিগী মতুংদা মরুপ মপাং কয়া, ওজা ইবোপীশকখোয় মথং মথং থেংনখি।
করম্বা কবিগী শৈরেংনা ইথিল পীদুনা শৈরেং ইবসিদা হেন্না মপুং ফানা চংশিল্লকখিবগে অমদি মালেমগী মমিং লৈরবা কবি ময়াম মরক্তা করম্বনা হেন্না খোইদাবগে?
ইংলিসকি কবিশিংগী খোমজীনবা শৈরেং লাইরিক য়াম্না লৈদুনা পাখি অমদি অদুম অশংবা মতমদা পাদুনা লাকই। ইংলিসকি কবিশিংনা ইবদা অমুক য়াম্না লুনা ইবদুদি কয়া পারুদে ফজবা অদুগা ময়ামসিদগী ঐনা পামজবা কবি হায়রগদি পব্লো নেরোদাগী শৈরেংশিং অসিনি। অতৈ মমিং লৈরবা কবিশিংগীসু পাদবদি নত্তে। ওক্তাভিয়ো পাস্ট, পোইট লোরিয়েটশিং, চাইনিস কবি বৈ দাউ, কমলা দাসকী শৈরেং অসিনচিংবা শৈরেং অদুম পাই।
হৌজীক ফাওবদা শৈরেং লাইরিক কয়া য়াম্না ফোঙখ্রবগে অমদি কমদৌনা মতম অসি নীংথিজনা শিজিন্নদুনা মেদিকেল লাইন্দা মহৈরোইশিং তাকপী তম্বীবগী থবক তৌনা তৌনা মনিপুরী খোরিলোলদা অসুক চাওরবা খুদোল ওইনা লাইরিক কয়া ইরিবনো?
হৌজীক ফাওবদা লাইরিক ১০ ফোঙখিবা লৈরে। ঐঙোন্দদি মতম সি কোন্নদে হায়বা য়াই অদুম খরসু ৱাবা থবকনি মরমদি এম বি বি এস তম্লিবা মহৈরোইশিং তাকপী তম্বীবা হায়বসি মসিগী মতম মরাং কায়না কায়থোক্তুনা লাইরিক য়াম্না পাদুনা তাক্কদৌরিবনি। মহৈরোইশিংবু ঐনা খ্বাইদগী হৈহন্নিংই। মসি ঐনা পামজবদুনি। খোরিলোলসু ফগি য়াবা হীরম নত্তে। অহানবদদি ঐখোয়না চংজরুরিবসি খঙদনা পামজবগী চংলুবনি। অদুবু হৌজীক্তি লাইরিক য়াম্না পাবা মথৌ তাই। খোরিলোলগী থবক থৌরমশিং য়াম্না য়াওবা অমদি মশক খঙনবা হোৎনবা তঙাইফদে। শৈরেং ইবসিনা পুকনিংদা ফাওরকপা ইথিলশিং অদু খুদক্তা ইশিনবগী খুদোংচাবা অমদি ফংহল্লি। থবক চৎপা মতমদা, কার থৌরিঙৈদসু নোটবুক মচা অমদি পুদুনা অদুম চৎলি, ওফিস্তা লৈরবসু অদুগা ফমুং নাকলদা নো্ট বুক অমা অদুম থম্মি মসিদা ইথিল লাকপদা অদুম ইশিল্লি। মসি কোন্না অমুক নীংথিজনা ইথোকপগী তাঞ্জা ফংহল্লি।
মপাল লমদা পাঙথোকপা করম করম্বা পোইতস মিটশিংদা শরুক য়ারুবা লৈরবগে? মনিপুরী শৈরেং অমদি খোরিলোলগী থাক অসি কদায়দা লৈরিবগে?
ৱেস্ত বেঙ্গলগী শান্তিনিকেতন্দা ফেব্রুৱারীগী ১২-১৩, ২০১৬দা সাহিত্য একাদেমি, বিস্বভারতি, সংস্কৃতি মন্ত্রক অহুম্না পাঙথোকখিবা কবিতা উৎসবতা শৈরেং পাথোকখি। সাহিত্য একাদেমিনা ডিব্রুগরদা ২০১৬গী সেপ্তেম্বর থাদা পাঙথোকখিবা অভিব্যক্তিদা ‘মাই ৱার্ল্ড মাই রাইটিং’ হায়বা থৌরমসিদা চে পাথোকখি। পঞ্জাবকী জলন্ধরদা পাঙথোকখিবা সেমিনার অমদসু চে পাখিবা লৈরে। মালেমগী ইমালোলগী নুমিৎকা মরি লৈননা নিউ দেল্লীদা অমুকসু শৈরেং পাবা শরুক য়ারুরে। ঐহাকনা থেংনজবদা অমদি খঙজবদা মনিপুরী শৈরেং অসি থাক ৱাংনা লৈবা থেংনৈ। ঐখোয়গী কবিশিং মরু ওইনা অহল ওইরবা কয়াদি মপাল লমদা য়াম্না ইকায়খুম্নৈ। মখোয়গী লৈরিবা খোরিলোলগী পোত্থোকশিং অসি য়ারিমখৈ ত্রান্সলেসন য়াম্না তৌবা অমদি মথৌ তাগনি খল্লি। হৌখিবা অমদি লাক্লিবা চহী খরসিদা ঐখোয়গী অনৌবা অইবশিংনা শৈরেং ইবগী চত্থরিবা খোঙচৎ অসি য়াম্না মতিং লৈবা ওইরক্লি হায়না লৌজৈ।
হৌজীক ফাওবদা ফংখ্রবা এৱার্দশিং করি করি লৈরবগে?
হুইয়েন লানপাউ লিটরেরি এৱার্দ, ২০১৪; জে সি সনসম লিটরেরি এৱার্দ ফোর পোইত্রি, ২০১৮; তয়েঞ্জম জয়ন্তা পোইত্রি এৱার্দ, ২০১৮সু ফংখিবা লৈরে।
শৈরেং অমদি খোরিলোলনা কদায় ফাওবা খুনাই অমবু লমজিংবা য়াগদগে? হৌরক্লিবা নহা অইবশিংদা করি পাউজেল পীনিংবগে?
ঐহাকনা থাজবগী মতুং ইন্না পোইত্রি হায়বসিনা খুনাই অমদা খজিক্তা নত্তনা য়াম্না ইনফ্লুয়েন্স তৌবা ঙম্মি হায়বসিদি চুমই। কনাগুম্বশিংনা শৈরেংনা করিসু অহোংবা লাকহনবা ঙমদে মসিদি আর্ত ফোর্ম অমনি হায়বসু য়াওদবা নত্তে অদুবু ঐনা থাজবদি মসি অদুক্কী মতিক মচিন থৌই হায়না খঞ্জৈ। হৌরক্লিবা নহারোল অইবশিংদা হায়জনিংবদি খোরিলোল হায়বসিদা চংদ্রিঙৈদা মসিবু করিনো হায়বসি হান্না মমুৎ তানা খঙবা মথৌ তাই অমদি লাইরিক য়াম্না পাবা অমদি নৈনদুনা মনিপুর মনুং অমসুং মপাল লমদা চেল্লিবা খোরিলোলগী ঈচেল অসিনা করিনো হায়বসিসু খঙজিনবা তঙাইফদে হায়না লৌজৈ।
মনিপুরী খোরিলোলবু মালেমগী মীয়ামদা মশক তাকনবা হোৎনবদা ত্রান্সলেসন হায়বসি য়াম্না মরু ওই। মসিগী মতাংদা..
য়াম্না চুম্মি ত্রান্সলেসন হায়বসি তঙাইফদবা অদুগা য়াম্না মরু ওইবা ঐখোয়না লায়না লৌবা য়াদবা হীরম অমনি। অদুবু ঐখোয়গী লৈরিবা ত্রান্সলেসনগী থবক অসিদি অদুম মশিং য়াম্না লিকনা লৈরি হায়বা য়াই। অতোপ্পা লোলদগী মনিপুরীদা ত্রান্সলেসন তৌরকপা অসিসু য়াম্না মরু ওই হায়না খঞ্জৈ অদুগা ঐখোয়গী লৈরিবা খোরিলোলগী ফজরবা পোত্থোক কয়া অসি মপাল লমগী লোল কয়াদা ত্রান্সলেসন তৌবা তঙাইফদে।
মখা তানা লাইরিক ফোংবগী থৌরাং তৌবা লৈবীব্রা?
করিগুম্বা লাইরিক অমা ফোঙলগদি ইংলিস্তা ইবা শৈরেং লাইরিক অমা ফোঙশিরা হায়না খল্লি। অদুগা হ্যুমরস ওইবা ৱারীমচাগুম্বসু ফোঙনিংই। ফগি পুবা শৈরেংসু অদুম ইনিংই। অপাবশিংবু নুংঙাইহনবা মখলগী খুৎইদসু চাংয়েং ওইনা ইগে খল্লি।
মনিপুরগী লৈরিবা কবিশিংগী খুৎইদা কনা কনাগীনা হেন্না পামজনা পাবগে ?
মনিপুরদা অইবা কয়া লৈরি। মখোয়না ইবা লাইরিকশিং অয়াম্বা অদুম পাজৈ। ময়াম অসিদগী ওজা নীলকান্তা, লাইশ্রম সমরেন্দ্রা, থাংজম ইবোপীশক, য়ুম্লেম্বম ইবোমচা, আর কে ভুবনসনা, ওজা লনচেনবা, তামো বীরেন্দ্রজিৎ নাওরেম, ইচেম্মা মেমচৌবী অসিনচিংবা কবিশিংগী শৈরেংশিং অদুম পামজনা পাই হায়বা তারে।
শৈরেং হায়বসি করিনি হায়না লৌবা য়াবগে?
শৈরেং হায়বসি পুন্সিনি। পুম্নমক মসিনা লোয়না কোনশিল্লি হায়না খঞ্জৈ।
মালংবনা করি হায়’ লাইরিক অসিদগী শৈরেং খরাঃ
হঙোই
হঙোই অমা
অসুম চোং চোংদুনা চৎলম্বদগী
চপ লেপখি লম্বীগী ময়ায়দা।
তেল্লবা মীৎকুপ অদুদা
উখিমাল্লে মহাকনা
মথংগী মপোক অদো মহাক্কী।
ঊখি মহাকনা অশিববু
চৎলিবা
কন্না থৌরিবা মোতোরসাইকল অমগী
মনীংদা তোংলদুনা।
ঙাইহাক্তং লেপখিগে ইবসি, মরুপ
হিংজখিসনু
মতম খরদংদা ওইরবসু মহাক।
চৈনা
থম্মোয়গী মনুংদা কাচিন অমদগী
খোংলকই চৈনাগী য়েনবারাবা।
পাউখুম ওইনা খোংগে খল্লকই ঐহাকসু
খোংফদে হায়বা কাউথোক্তুনা।
- ট্যাগ:
- Interview
0 কমেন্ট:
কমেন্ট তৌবিয়ু