জিরিবামদা মণিপুরী লোলগী নুমীৎ পাঙথোকখ্রে
ইম্ফাল, আগস্ট ২১ : মণিপুরী সাহিত্য পরিষদ, জিরিবামনা শীন্দুনা ৩১ শুবা মণিপরী লোলগী নুমীৎকী থৌরম জিরি ইমা মৈরা পায়বী অপূনবা লূপ (জিম্পাল) কী হোলদা পাঙথোকখ্রে হায়রি। থৌরম অদুদা মণিপুরী সোর্ট ষ্টোরি সোসাইটি ইন্দিয়াগী প্রেসিদেন্ট লাইশোম গুলাপ, মণিপুরী সাহিত্য পরিষদ জিরিবামগী প্রেসিদেন্ট থা পান্থোই, জিরি ইমা মৈরা পায়বী অপূনবা লূপকী প্রেসিদেন্ট এ অশংবী অমদি জিরি কোলেজগী এসিষ্টেন্ট প্রোফেসর ডা. এন বিজয়ানা মথংশিৎনা চীফ গেষ্ট, প্রেসিদেন্ট অমদি গেষ্ট ওফ ওনার ওইনা শরুক য়াখি।
থৌরম অদুগা মরী লৈননা মণিপুরী লোলদা চঙলক্লিবা ইংলিসকী লোং ৱার্দস হায়বা টোপিক্তা রিটায়ার্দ প্রিন্সিপাল জিরিবাম হায়ার সেকেন্দারি স্কুলগী এল রঞ্জিৎনা রিসোর্স পার্সন ওইনা ৱা ঙাংখি। কাছার, জিরিবাম অমসুং মণিপুরদা ঙাংনরিবা মণিপুরী লোলগী ভেরিয়েশনগী টোপিক্তা জিরি কোলেজগী এসিষ্টেন্ট প্রোফেসর এম কুঞ্জেশ্বরী অমদি মণিপুরী লোলগী হৌরকফম অমসুং মসিগী খোঙচৎ হায়বা টোপিক্তনা মণিপুরী সাহিত্য পরিষদ জিরিবামগী জেনারেল সেক্রেটারি শরত থোকচোমনা রিসোর্স পার্সন ওইনা ৱা ঙাংখি। খন্ন-নৈনবা থৌরম অদুদা ডা. এন বিজয়ানা মোদরেটর ওইখি।
থৌরম অদুগী শরুক অমা ওইনা মখা তারকপদা শৈরেং শৈদিন্নবা অমসুং পাঙথোক্তুনা মশা-মশানা ইজবা শৈরেংশিং মীওই ১৭ না পাথোকখি। শৈরেং শৈদিন্নবগী থৌরম অদুদনা জিরি কোলেজগী এসিষ্টেন্ট প্রোফেসর ডা. এস ইবেমতোম্বীনা মোদরেটর ওইখি হায়রি। থৌরম অদুদা লাইশোম গুলাপনা ইন্দিয়া লৈবাক্কী মনুংদা মণিপুরীগুম্লবা অপীকপা ফুরুপ অমনা মৈতৈ লোলবু ইন্দিয়াগী ৮ শুবা সেদ্যুলদা চনবা হায়বসি লাইবক য়াম্না ফবনি। মরম অদুনা ঐখোয় পুম্নমক্না লোল অসিবু য়োকখৎপা মথৌ তাই হায়খি।
সোর্স: হুইয়েন লানপাউ.
0 কমেন্ট:
কমেন্ট তৌবিয়ু