‘লোইকুম লোইকা’ অমদি ‘ইজনীংই পরেং অমত্তং’ ফোঙখ্রে
ইম্ফাল, আগস্ট ২১ : পুখ্রাম্বম কুঞ্জোনা ইবা ‘লোইকুম লোইকা (খম্বা থোইবী)’ অমদি ‘ইজনিংই পরেং অমত্তং’ হায়না মিংথোনবা শৈরেং লাইরিক ঙসি লাইব্রেরী এন্দ ইনফোর্মেসন সেন্টার ককচিংগী মীপুনশঙদা ফোঙখ্রে। লাইরিক ফোঙবগী থৌরম অদুদা মণিপুর যুনিভার্সিটিগী মণিপুরী দিপার্টমেন্টকী এসিষ্টেন্ট প্রোফেসর ডা. কোইজম শান্তিবালানা অথোইবা মীথুং, সাহিত্য সেবা সমিতি ককচিংগী হান্না প্রেসিদেন্ট ওইরম্বা য়েংখোম ধনঞ্জয়না থৌরম মপু অমসুং ইকনমিক্স প্রোফেসর এম রাজেননা অখন্নবা মীথুং ওইনা শরুক য়াখি।
থৌরম অদুদা অথোইবা মীথুংলেনশিংনা পুখ্রম্বম কুঞ্জোনা ইবা লোইকুম লোইকা (খম্বা থোইবী) অমদি ইজনীংই পরেং অমত্তং হায়না মিংথোনবা শৈরেং লাইরিক অনী মায়খুম হাংদোক্তুনা মীয়ামদা শীন্নখি। লোয়ননা এম য়ুগী প্রোফেসর এন সনাতোম্বনা লোইকুম লোইকা অমসুং থবক্তগী পোত্থারবা জেদ ঈ ও পুখ্রাম্বম নিমাইনা ইজনীংই পরেং অমত্তং লাইরিক মশক তাকখি।
থৌরম অদুদা অইবা পুখ্রম্বম কুঞ্জোনা মহাক্কী ৱারোল পীরদুনা হায়, ঙসি ফোঙজরিবা লোইকুম লোইকা (খম্বা থোইবী) অসি মোইরাং কংলৈরোলগী শাইওন তরেৎ, লাংওন মাপনগী মনুংদা তরেৎশুবনি। মমাঙদা ককয়েন সুজা অথোইবা অমসুং নৱা খুৎচুপ চৈময়াং লাইরিক অনী অসি বেঙ্গোলি ময়েক্তা ফোঙখ্রে। হৌজিক্তি মৈতৈ ময়েক্তা শাইওন পুম্নমক ফোঙলগনি। ঙসি ফোঙলিবা লোইকুম লোইকা অসি মৈতৈ ময়েক্তনি।
মথং য়াম্না থুনা হেঞ্জুনহা মৈতৈ ময়েক্তা পুথোক্লগনি। অসিদসু নত্তনা ইংলিস গ্রামার ফাউন্দেসনশিং মৈতৈ ময়েক্তা অমসুং বেঙ্গোলি ময়েক্তা পার্ট ৱান ফোঙখ্রে। মখা তানা অথুবদা পার্ট ২,৩ অমদি ৪ মথং মথং ওইনা পুথোক্লগনি হায়খি।
সোর্স: হুইয়েন লানপাউ.
0 কমেন্ট:
কমেন্ট তৌবিয়ু