তৎফদ্রবা নুংশিবগী লংলানা চেৎনা পুন্দুনা থম্লিবা মীওইবগী থম্মোয়গী মশক উৎলিবা লাইরিক ‘ইমাগী শালুঙাংবা ফনেক’ লাইরিকসিগী মপাউ -- তোংব্রম অমরজিৎ
লাইরিক্কী মমিং- ইমাগী শালুঙাংবা ফনেক (২০২৬)
অইবী- নিংথৌখোংজম রঞ্জনা দেবী
অফোঙবা- রাইটর্স ফোরম ইম্ফাল
লাইরিক্কী মখল- ৱারীমচা
লাইরিক্কী মমল- লূপা ৪০০/-
লাইরিক্কী ইলুস্ত্রেসন- তোংব্রম অমরজিৎ
কেলিগ্রাফি- নিংথৌখোংজম ইবুংঙোচৌবী
দিজাইন- য়াইচেন কোংবম
অইবী নিংথৌখোংজম রঞ্জনা, নিংথৌখোংজম তোম্বী সিংহ অমসুং অঙোম নিঙোল চিত্তমোহিনি দেবীগী মচানুপীনি। ৱাংখৈ নিংথেম পুখ্রি মপালদা লৈবা মেঘচন্দ্র কোংবমগী লোনবীনি। মচানুপি অমা মচানুপা অনী লৈ। মনিপুর য়ুনিভর্সিতিদগী গ্রেজুয়েট লোইরবা মতুংদা গান্ধীগ্রাম রুরেল ইন্সটিট্যুট, মদুরাইদগী কোওপরেটিব মেনেজমেন্ট সবজেক্তা মাস্টর দিগ্রী ফংই। তুংদা মণিপুর য়ুনিভর্সিতিদগী দোক্তর ওফ ফিলোসোফি দিগ্রী ফংই। ভারত সরকারগী মিনিস্ত্রি ওফ এগ্রিকলচরগী মখাদা লৈবা নেসনেল কাউন্সিল ফোর কোওপরেটিব ত্রেনিংদা ১৯৮৯দা ফেকলতি ওইনা চঙদুনা ইম্ফালগী ইন্সটিট্যুট ওফ কোওপরেটিব মেনেজমেন্টদা প্রিন্সিপাল ওইরম্মী। নিউ দেল্লীদা লৈবা কাউন্সিল অসিদা জোইন্ত দিরেক্তর অমদি দিরেক্তর ওইনা মতম শাংনা থবক পুরম্লবা মতুংদা ইম্ফালদা দিরেক্তর ওইনা লাক্তুনা ইন্সটিট্যুট অসিদগী থবক্তগী পোত্থাখি।
নহা ওইরিঙৈদগী হৌনা সাহিত্যদা থৱায় লুপচদুনা লাকই। অইবীনা ইবা ৱারীমচা, শৈরেংশিং খোরিলোলগী লূপশিংনা ফোঙবা চেফোঙশিংদা মতমগী মতমগী হাপ্তুনা লাকই। অঙাংশিংগী রেদিও দ্রামা ইদুনা আকাশবানি ইম্ফালগী অঙাংশিংগী থৌরমদা শন্দোকখিবা লৈরে। ২০০৫তা রাইটর্স ফোরম ইম্ফালনা অইবীনা ইবা ৱারীমচাগী খোমজীনবা লাইরিক ‘অসুম মমশীনখি’ হায়না মিংথোনবা লাইরিক অসি ফোঙখি। মণিপুরী খোরিলোলগী লূপশিংগী থবক থৌরম কয়াদা শরূক য়াদুনা লাক্লি। রাইটর্স ফোরম ইম্ফাল অমদি লৈমরোল খোর্জৈকোল (লৈকোল)গী লাইফ মেম্বরসু ওইরি।
হন্দক ফোঙলিবা অইবী রঞ্জনাগী অনীশুবা ৱারীমচাগী খোমজিনবা লাইরিক অসিদা পুন্না ৱারীমচা ১৭ য়াওরি। মরু ওইবা থিমশিংদি সোসিয়েল ইসুদা য়ুম্ফম ওইরি। অদুগা হেন্না কুপথনা নৈনরিবনা মীওইবগী থম্মোয়গী ওইবা মরি অদুনি।
লাইরিক অসিগী লমায় ৯দা য়াওরিবা ‘পোৎলুম’ হায়না মিংথোনবা ৱারীমচা অসিদা মোনিকানা করি মরালগীদমক জেলদা লৈরক্লিবা হায়বসিগী ৱারীগী শাগৎলক্লিবা প্লোট অমদি কেরেক্তরাইজেসন অসি চংখোল্লি। য়াইঙংপোকপিদগী মোনিকানা কংলাতোংবীদগী নেপালি নুপা সন্তোসতা কমদৌনা য়ুম পাল্লকখিবা হায়বসিদা উৎনিংলিবসি য়ুম পানবা মতমদা মরি মখোঙ মুন্না খঙদনা হান্না নুপী থিরম্লগা নুপী অদুনা অতোপ্পা নুপাদা ময়ুম পানখ্রবা মতুং সন্তোসনা পাখঙনি হায়দুনা মোনিকা লৌখিবা অসিনা মখোয় অনীগী য়ুম্বাল পুন্সিদা ময়ি লাকনবগী মরম ওইখি। মোনিকাগী নুপানা য়ু ঙাওরগা অহিংদা হঞ্জিল্লক্লগা মাবু ফুবা চৈবা তৌবদা মোনিকানা অশাওবদগী মাগী নুপাবু খুজাইনা মকোক্তা থোম্লুবদা শোয়বদগী শিখি। অদুগা ত্রেজিক এন্দিং অমনা মোনিকানা অরোইবদা কনফেসন তৌদুনা ফাদোক তাখি। মচা অপিকপা অনিগী খল্লগা সিবা ঙমদে। সুসাইদ তৌগে তৌই ফেল ওইখি। ৱারী অসিগী প্লোট শাগৎলকপদা চৈরাপ কোর্টকি সিন, লুখ্রাবীশিংনা হিংলিবা পুন্সি মহিং, কৈথেল লুক্মাই পানবগী মশিং হেনগৎলক্লিবা, শোকচিল্লবা ইকনোমী, খুনাই অসিদা থোক্লিবা দোমেস্তিক ভাইওলেন্স হেনগৎলক্লিবা মশিং অমদি খুনাই অসিনা শোকচীল্লক্লীবা ফীভম নাকোয়না ফোঙদোক্লি।
লাইরিক্কী মিংথোল ওইরিবা ‘ইমাগী শালুঙাংবা ফনেক’ ভৎসল্যা রসতা য়ুম্ফম ওইবা ৱারীমচানি। মীওইবগী পুন্সি খোঙচৎ কায়নবা থুংনবা, অৱা-নুংঙাইগী মচূনা ময়ুং মফেল লাক্লগা শারিবা চরৈ ফিনি। থম্মোয়গী লংলা তত্তনবা, নুংশিবগী লিপুন চেৎশিন্নবা পুন্সিগী ৱাহন্থোক মপুং ফানবা চাংয়েং কয়াদি থেংনদবা নত্তে মীওইবনা। “থোইথোইনা চহী তরেৎ চঙলকপগী অদুৱাইদা মমা জামিনি লিভরগী অনাবা অমদগী কনবা ঙমহৌদনা লৈখিদ্রে…” ফিরোই লোইরকপদা মপা চাউভলনা মমা অতোনবী অমা মনেশিংনা শিন্দুনা কৈন্যা কৎতুনা পুরকখি। ফিভম্না মতম্না য়াদদুনা নুপী অতোনবী থিবদা চাউভল য়াম্না নুংঙাইখিদে মচাগী খনবদা। থোইথোইসু মমাবু ইতৎ তত্তনা নিংশিংলগা কপ্পি। “মমানা শেৎলম ইল্লম্বা ফিরোল কোন্দুনা হিক হিক কলম্বদা মপানা কোনশিনবীদুনা থেমখি” (লাঃ ৪৫) থোইথোইগী মমা অতোনবী বিনারানিনা মমাগী মহূৎ শিন্দুনা য়ূমগী কুপ্নোম, মাগী স্কুল চৎনবা, অতৈ অতৈ থবক কয়া তৌবদু থোইথোইনা কয়া হৈনদে। থোইথোইনা খ্বাইদগী ফজৈ খঞ্জবা মমানা “শেৎলম্বা শালুঙাংবা মচুগী ফনেক্তু অনৌবীদুনা নোংমা শেৎলগা থোরকপদা থোইথোইনা মুল্লি” অদুগা হায়রকই, “ ইমাগী ফনেকনি শেৎকনু, নঙগী ফনেক পুজরকপা য়াদ্রা?” বিনারানি ইঙক ঙকখি অদুবু করিসু নুংঙাইতবা তৌদে। অহোইনদুম থোইথোইবু লুনা নুংশিনা তৌই। “থোইথোই নঙ ‘ইমা’ হায়না অমুক্তা কৌদনা ঐঙোন্দা” মমা অতোনবীনা হায়। লূনা লোয়নবী, নুংশিনা ঙাংই। অৱাৎ অপা পুম্বা য়েংশিনবী। নোংমা স্কুলগী “ইমাগী নুমিৎ”কি থৌরম পাঙথোকনবা শেম শারকপদা থোইথোই মপুকনিং য়াম্না নুংশিখি। নুমিৎ অসিগী মমঙদা থোইথোইগী মমানা মচাবু নুংশিনা কোণবীরমখি। নোংঙাল্লগা মিকপ থোক্লকপদা মমা উদবদা য়াম্না কপখি। থোইথোইনা স্কুল লাকপদা ওজানা হায়রকখিবা পোৎলম অমত্তসু পুরক্তনা লাকখি। মরমদি মাগীদি মমা লৈখিদ্রে। স্কুলনা শিন্দুনা ওজা নুপীশিংনা মমাগী মহুৎ শিন্দুনা থৌরম পরেং অদু মপুং ফানা পাংথোকনবা হোৎনখি। স্কুলনা শিল্লিবা থৌরমদু “ইমাগী নুমিৎ” তা মাগী মাগী অপোকপী মমাদা খুরুমজদুনা য়াইফ-মঙ্গোল নিজগদবা নুমিৎনি। থোইথোইগী মমানা ফমগদবা চৌক্রিদা নুপী অমা লাক্লগা ফমখি। থোইথোইদি মরু লুকথরগা লৈবনা কনানো খঙদে। অদুবু মমা শারিবীদুদা খুরুম্লগা নোনখৎলক্তুনা লদু ইনগে তৌরকপদা থোইথোইগী মমাতোন বিনারানি ওইরমখি। থোইথোইনা মমাতোন্দা লদু ইনখি অদুগা বিনারানিনসু থোইথোইদা লদু ইনবীখি। “ থোইথোইবু মথানুংদা চেৎনা কোনবীদুনা হায়রকই, “ঐদি ইমা-ইপা মশক খঙহৌদে, ওরফানেজগী ইমা ময়ামদুনা ঐবু নুংশিনা য়োকপিরকপনি” ৱাহৈশিং অসিনা ফুমদুনা লৈরম্বা ভৎসল্যা রস অদু চিংজুম লাইজ ইফুৎকুম ঈহৌহল্লকখি। মমাতোননা মহাকপু কয়া য়াম্না নুংশিনা তৌবীবা পুম্নমক মরি মরি মিৎমাংদা উরকখি। মসিদনি ৱারীসিনা ফজরিবসিসু। স্কুলদগী হেক হল্লকপগা থোইথোইনা চেকশিন্না থমজবা মমাগী শালুঙাংবা ফনেক অদু লৌথোক্লগা নুংশিনা মমাতোন্দা পিরগা হায়রকই, “ইমা সিগী ফনেকসি শেৎলু”। মমাতোনবী খুদিংমক ফত্তবা নত্তে। নুংশি হৈবা, মীনুংশি চাওবা থম্মোয়না পুন্সিবু চেৎনা পুন্দুনা থম্লি হায়বদু উৎলি। মিংথোলগা ৱারীগী থিমসিদা য়াম্না চুনৈ।
লাইরিক লাইশু হৈরবা, মীরক তিল্লবা অদুগুম্বা মচা মমৌশিংনা মমা মপা মনেম মকুগী সেবা তৌবীগী মহুত্তা অহল মতম ওইশিল্লক্লগা তাথি তা-ওইনা তৌবীবা, নিংথিজনা লোয়নবীদবা, য়েংশিনবীদবা থৌদোকশিংগী ৱারী ইতৼ তত্তনা তারি। ঈশিং খুয়া অমনা ফৌ শংবাই অমনা চাওরকপা কনাসু লৈরম্লোই। মমা মপানা মচাশিংগীদমক হোৼনরকপা, ৱাজরকপা পুম্নমক মমা মপা ওইবশিংনা খঙই। মচা মমৌশিংদা মখোয় ৱারৌবা নুংঙাইতবা লৈতে। অদুবু মীওইবগী লীচৼ শাজৼতি শাথিনা অহোংবা লৈরে ঙসিগী খুনাইসিদা হিংলিবা মীওইশিংগী মরক্তা। মশা মশাগীতা খনবনা ইমুং মনুং কৈরোই লৈকাই, লৈবাক খূনাই নুংশিবা হায়বদু লাপ্না থম্নখ্রে। মমা অমত্তনা পোকপা মচাশিংগী মরক্তা লৌ ঈংখোল, লন-থুমগী খৼনবা, চেকপল খাগৎনবা, কেস তৌনবা অসিবু অফবা খুদম্লা? অহল ওইরবা মমা মপাশিংবু ওল্ড এজ হোমদা থমজিনবা অমদি ওল্ড এজ হোম মশিং হেনগৎলকপসিবু পুকনিং থৌগৎনিংঙাই ওইরিব্রা? মসি য়াম্না লূবা সোসিয়েল ইসু অমা ওইরক্লি মণিপুরদসু। অসিগুম্বা ফিভম অসিদা য়ুম্ফম ওইদুনা মীওইবগী লীচৎপু নুং-পান ফাওনা নৈনরকপা ৱারী মচানি ‘পোলোইদা’। মচাশিং মমৌশিংনা মপাগী পেন্সনদা মীকানরকখি। অহল ওইরবী মমা অশোনবীনা করি চারি থক্লি হায়বদি নোংমতা য়েংলুদে। মসি মতমসিগী লায়না মখল অমা ওইরক্লব্রা হায়বসি হংনিংঙাই ওইরক্লি। মচা নিপাল পোকপী চান্দনি ধর্ম্ম কায়জদে। মচা নুপা অহল অমেরিকাদা থবক তৌদুনা লৈখি। কৈরোই লৈকাইনা শোন্নৈ মচাশিং মতিক চানা শেম্বগী। চান্দনিগী মপুরোইবা সনাতোন কেরানি ওইরম্মি। মপা “লৈখিদবা মতুং ফিরোই য়ৌদ্রিঙৈদা মচাশিং লম য়েন্নবগী ঙ্রঙ ঙ্রঙ ঙংনরকই…” (লাঃ৫৮) মসি হার্দ রিএলিতি অদুনি। “পেন্সনগী পৈশা ময়ামদুনা করি তৌগে হায়দুনা তুংশিল্লগা থম্লিবনো? ইপানা তৌরম্বা থবক্কী পেন্সন্নী, ঐখোয় ময়ামগী শরুকসু য়াওরিবনি। অহলগী লিচৎ চৎতে, নোংমফাও মচাগি ময়ুমদা লাক্তুনা করি চারিবা, করম পাল্লিবা হংলদে” অসুম্না মমা অশোনবীদা বদনাম পিশিল্লি। হায়রিবসি “চহী মরিফুতরা চঙলক্লবা চান্দনিদি অয়াম্বা মতমদা ফমুংদা নত্রগা চৌক্রিদা ফমদুনা পোত্থাদুনা লৈরবা মতাংনি…” “তুরেলগী ঈশিংনা হঙ্গৎনা চেনদে হায়নবদুদি মঙোন্দা অচুম্বগুম্না থোক্লে” (লাঃ ৫৯) মচানুপা অহলনা শিন্দুনা অহল ওইরবী মমাবু শেন্ননবা হায়দুনা থবক ইনখাং মতেং পাংনবা লাকখিবী ইবেমুসু মচা মমৌশিংনা ইন্থোকপীরবী মীয়ায় চল্লবী লাইবক থিরবী অমনি। ভিক্তিম ওইরিবসি নুপীনি, মমানি অদুগা অহল ওইরবীশিংনি হায়বসি ৱারী মচা অসিনা ফোংদোকনবা হোৎনরি। ইবেমুগা চান্দনিগা য়াম্না চান্নজবগী মতাংশিং উৎলি। চান্দনিনা লৈখিদবা থোক্লবদি ইবেমুনা কনাগীদা লৈহৌগনি খনবদা চান্দনি য়াম্না ৱাজখি। নোংমা নুমিদাং অমা চান্দনিগা ইবেমুগা নুংঙাইরবা ৱারী কয়া শাদুনা নোকমিন্নখি অদুগা তুম্থখিবদগী নোংঙাল্লকপদা চান্দনি অদুমুক হৌদোকপা তাখিদ্রে। মমা লৈতবগী মথৌ মঙম পাঙথোকনবা হোৎনবদা ইবেমুনা কপচবা নত্তনা চান্দনিগী মচা মমৌশিংদি উপু ফাক্লদুনা করি করিনো থিবদনা হেন্না পুকনিং লুপনখি। পোলোইদা উরিবা শক্তম অসিবু হৌনরিব্রা? মসিগীদমক্তরা ইচা ইশু শেম্নরিবসিবো হায়বা ৱাহং অমা হংলি অইবিনা। ৱারীসিগী পাউজেলদি অপাবশিংগী থম্মোয়না খল ওনসনু। হৌজীক হৌজীক্কী কনতেমপররি ইসু অমা ওইরিবনি।
মনিপুরী খোরিলোলদা মশিং খরা লিকনা লৈরিবা ৱারীমচাগী পুক্কৈদা অসুম্না লাইরিক অমা খুদোল তম্লকপসি থাগৎচরি। ৱারীমচা লেপ্তনা ইবীরক্কনি হায়না থাজবা থমজরি। ৱারীমচা ফজবা কয়াসু লাইরিক অসিদা য়াওরি। ময়ামসু পাবীয়ু।
0 কমেন্ট:
কমেন্ট তৌবিয়ু