পিএদল্লিয়ুএফনা ত্রিপুরাদা মণিপুরী লোলগী নুমিৎকা মরী লৈননা ইমালোনগী কুহ্মৈ পাংথোক্কদৌরি
"ইমালোনবু নুংশিবীয়ু
ইমালোনবু য়োকখৎপীয়ু
ইমালোনবু ঙাংবীয়ু"
আগরতলা, আগষ্ট ২৬ : পেত্রিওটিক রাইটর্স ফোরম (পিএদল্লিয়ুএফ) ত্রিপুরা অমদি পিএদল্লিয়এফ মণিপুর অনিনা খুৎশম্নদুনা লাক্লিবা আগষ্ট চৈচৎ ২৯ গী নুংখিল পুং ৩ তাবা মতমদা অগরতালাগী মুক্তধারা - ওদিটোরিয়মদা ৩৫ শুবা ইমালোন নুমিৎকা মরি লৈননা 'ইমালোনগী কুহ্মৈ' মণিপুর লেঙ্গোইজ ফেষ্টিবেল ২০২৬ পাঙথোক্লগনি হায়না পিএদব্লিয়ুএফকী চেরোল অমনা হায়রক্লি।
চেরোল অসিনা হায়, থৌরম অসি মণিপুরগী এমএলএ থাংজম অরুনকুমারনা অথোইবা মীথুংলেন ওইদুনা পাঙথোক্কনি হায়রি। থৌরম অসিগী মনুং চন্না ত্রিপুরাদা খুন্দারিবা মণিপুরীশিং মরু ওইনা মীতৈ ইচিল ইনাওশিংগী অখন্নবা পুং, ঈশৈ, জগোয় অমদি ম্যুজিকেল কন্সর্টকী থৌরমশিং পাঙথোক্কনি। ইমালোন শৈথাবা অইবা অইবীশিংগী অখন্নবা শৈরেং পাথোকপা, ফোরম অসিগী গুৱাহতি, আসাম ব্রাঞ্চকী মেম্বর মোইরাংথেম রাজকুমারনা ইবা - শৈরেং লাইরিক 'অহিংবা মীতম' ফোঙবা অমদি অতৈ নাৎকী ওইবা থৌরম কয়াসু পাঙথোক্কনি।
থৌরম অসিদা পিএদল্লিয়ুএফ, মণিপুরগী প্রসিদেন্ট নাওরোইবম খন্বা লুৱাং অমদি পিএদল্লিয়ুএফ, ত্রিপুরাগী পেত্রোন মেম্বর ডা: অনুরধা নোংমাইথেম অনিনা পুন্না প্রসিদিয়ম মেম্বরশিং ওইনা শরুক য়াগনি। লোয়ননা পিএদল্লিয়ুএফ মণিপুরগী ফোর্মর প্রসিদেন্ট এন্দ পেত্রোন মেম্বর য়াইস্কুল খ্বাইরাকপম, মণিপুরী সাহিত্য পরিষদ, ত্রিপুরাগী প্রসিদেন্ট এল বিরমঙ্গল সিংহ অমদি ত্রিপুরাগী শক্নাইরবা অইবা অমদি স্কোলর ৱাংখেম বিরমঙ্গলনা পুন্না অখন্নবা মীথুংলেন ওইনা শরুক য়াগনি। থৌরম অসিগী মনুং চন্না পিএদল্লিয়ুএফ, মণিপুরগী এসিষ্টেন্ট সেক্রেটরি লাইমুজম প্রতাপ সিংহ অমদি ত্রিপুরা ব্রাঞ্চকী এদভাইজর গুরুময়ুম বিপ্লব শর্ম্মা মীথুংলেনশিংগী মফমদা খুদোলপোৎশিং তমদুনা ইকায়খুম্নবা উৎকনি।
আগষ্ট ২৯ দা পাঙথোক্কদৌরিবা থৌরম অসিগী মাংওইননা ঙসিদগী ফেষ্টিবেল অসিগী পোষ্টর কেম্পেন হৌদোকখিবগা লোয়ননা মীতৈ ময়েকনা চাওনা থাবা পোষ্টরশিং ত্রিপুরাগী মফম কয়াদা থেৎখ্রে। ফোরমগী সেক্রেটরি নিঙোম্বম প্রনয়না পোষ্টর কেম্পেন অদু হৌদোকখি। থৌরম অদুদা পিএদল্লিয়ুএফ ত্রিপুরাগী নহা ওইরিবা থৌমী কয়াসু শরুক য়াখি।
নিংশিংবা য়াবদি পেত্রিওটিক রাইটর্স ফোরম ত্রিপুরা ব্রাঞ্চ কুমজা ২০১৩ দা লিংখৎখিবা লিটরেরি ফোরম অমনি। ফোরম অসি লিংখৎখ্রবা মতুং ত্রিপুরাদা অহানবা ওইনা মীতৈ ময়েক তন্বীবগী ত্রেনিং প্রোগ্রাম পাঙথোকখি। ২০১৩ গী সেপ্টেম্বর ৩০ দা লালশিংমুরাদা লময়ানবা হিজম ইরাবতকী মীতম অমা খিনখি। মণিপুরী লেঙ্গোইজ, লিটরেচর এন্দ কলচরগী মতাংদা সিম্পোজিয়ম, সেমিনার পাঙথোকপা য়াওনা লিটরেরি এৱার্দ লান্থোকপগী থৌরমশিং পাঙথোকখ্রে।
সোর্স : পান্দম
0 কমেন্ট:
কমেন্ট তৌবিয়ু