ইম্ফাল, আগস্ত ২৫ : ঙসি অয়ুক নিউ দিল্লীদা লৈবা য়ুনিয়ন হোম মিনিস্তর অমিত শাহগা মহাক্কী ওফিসিয়েল রেসিদেন্সতা কোকোমি (কোওর্দিনেটিং কমিটি ওব মণিপুর ইন্তিগ্রিতি) গী মীহুৎশিংদা উনদুনা ৱারী শানবদা হোম মিনিস্তরনা মণিপুরদা সেপরেত এদমিনিস্ত্রেসনগী অয়াবা পীরোই হায়বা ৱাফম থম্লকখ্রে হায়রি।

কোকোমিগী মিদিয়া কোওর্দিনেটরনা থাদোক্লকপা চেরোল অমনা হায়, ঙসি অয়ুক পুং ১০.৩০ তাবদা কোকোমিগী মীহুৎশিংগা য়ুনিয়ন হোম মিনিস্তর অমিত শাহগা উনদুনা হৌজিক লমদম অসিদা থোক্লিবা ঈরাং অসিগা মরী লৈনবা ৱারোইশিন পুরক্নবগী মতাঙদা ৱারী শানবগা লোয়ননা কোকোমিগী মায়কৈদগী অইবা চেরোল অমসু য়ুনিয়ন হোম মিনিস্তরদা পীশিনখি। মখা তানা হোম মিনিস্তরগী পাওতাক মতুং ইন্না ইন্তিলিজেন্স ব্যুরোগী মকোক থোংবা অফিসিয়েলশিংগসু উনদুনা ৱারী শানখি।

মপূং ওইনা য়ুনিয়ন হোম মিনি্তির অমিত শাহগা উনখিবা অদুদা মহাক্না স্তেত অসিদা কাঙলূফ অমনা তোঙানবা এদমিনিস্ত্রেসন অমা তাল্লিবা অসিগী অয়াবা পীরোই হায়না ফোঙদোরকখি। মণিপুরগী লম মনুংদা নারোন্দা মী চঙশিল্লকপশিং থিংননবা চপ চাবা থবক পায়খৎলি। বাইওমেট্রিক্স, রেতিনা স্কেন তৌদুনা ইমিগেন্তশিং রেজিস্তার তৌবা হৌরে। মণিপুরগী মনুংদা নারোন্দা চঙলকপা মীশিংগী মথক্তা অকনবা এক্সন লৌখৎকনি।  মণিপুর অমসুং ম্যান্মাগা তাইনরিবা বোর্দর অসিদা ফেন্সিং তৌদবনা মরম ওইরগা মী কয়া অমা আইন কায়না চঙশিল্লক্লিবা অসি থিংনবা বোর্দর ফেন্সিং তৌবগী থবক অসি হেন্না য়াঙশিন্নবা থবক হৌরে হায়বা ৱাফম থম্লকখি হায়রি।

স্তেত অসিদা শান্তি থম্ননবা মণিপুর মীয়ামদা আপিল তৌরকপগা লোয়ননা মণিপুর মীয়ামদা শান্তিগী পাউজেল অসি কোকোমিনা শন্দোক্নবসু মহাক্না ফোঙদোরকখি। তঙাইফদনা চঙবা পোৎলমশিং ফংহন্নবা হোৎনবদা স্তেত অসিদা লৈরিবা কাঙলূপ অনীগী মীশিংনা মতেঙ পাংবীয়ু নেসনেল হায়ওয়েশিংদা পোৎ পুশিল্লক্লিবা গাড়ীশিংদা অপনবা পীদনবা মথৌ তাবা কনভোইশিংসু নুমিৎ খরনি অসিদা পীরগনি হায়বগী থাজবসু হোম মিনিস্তরনা ফোঙদোক্লকখি হায়রি।

কোকোমিগী মায়কৈদগী দায়িত্ব লৈবা কুকিগী লুচিংবশিংগা ৱারী শাননবগী ৱাফম হৌদোক্নবা অমদি হায়রিবা কাঙলূফশিং অদুনা লমদম অসিদা শান্তি হঞ্জিলহন্নবগী থৌরাং পায়খৎনবসু খঙহল্লকখি হায়রি।  কোকোমীগী মায়কৈদগী ঙসি পীশিনখিবা অইবা চেরোল অদু মহাক্না য়ুনিয়ন হোম সেক্রেটরিদা পীথদুনা মখা তাবশিং নৈনবসু খঙহনখি হায়বা ৱাফম চেরোল অসিদা পল্লি।
য়ুনিয়ন হোম মিনিস্তর অমিত শাহগা উনরবা মতুংদা কোকোমিগী মীহুৎশিং অদুনা ইন্তিলিজেন্স ব্যুরোগী দিরেক্তর অমসুং নোর্থ ইস্তকী সেক্যুরিতি এদভাইজর এ কে মিশ্রগা উনদুনা হৌজিক মণিপুরদা ইলিগেল ইমিগেন্তশিং, ক্রোস বোর্দর নার্কো-টেরোরিজমনা শোকহল্লিবশিং অমদি উমংগী শরুক কয়া অমদি উমংগী রিসোর্ছ কয়া অমা মাঙহল্লিবা লোয়ননা সম্পেন্সন ওব ওপেরসন্দা লৈরিবা খূৎলায় পায়বশিংনা গ্রাউন্দ রুলশিং থুগায়রগা তৌরিবা কয়াগী মতাঙদা কূপ্ন খন্নখি। ৱাফমশিং অদু মিনিস্ত্রি ওব হোম এফিয়ার্সকী ওফিসিয়েলশিংনা তাবগা লোয়ননা অরুবা ৱাফমশিং নোট তৌখি হায়রি।

ইন্তিলিজেন্স ব্যুরোগী দিরেক্তরনা মণিপুরদা হৌজিক থোক্লিবা ঈরাং অসিগী মতাঙদা অশেঙবা ৱাফম অদু ৱাখল তামিন্নখি। কোকোমিনা অইবা চেরোলদা ফোঙদোক্লিবা ৱাফমশিং অদু হকচিন্না লৌবগা লোয়ননা থোক্লিবা ঈরাং অসি য়ারিমখৈ অতুবা মতমদা লোইশিন্নবা হোৎনবদা মখা তানা গবর্নমেন্ততা মতেঙ পাংননবসু খঙহল্লকখি হায়রি। ঙসিগী য়ুনিয়ন হোম মিনিস্তর অমিত শাহ অমসুং ইন্তিলিজেন্স ব্যুরোগী মীহুৎশিং উনখিবা অদুদা কোকোমিগী কোওর্দিনেটর জিতেন্দ্র নিঙোম্বনা লুচিংবা মীহুৎ ১৩ না শরুক য়াখি। মীহুৎশিং অদুদা কন্সলতেতিব মেম্বার য়ূম্নামচা দিলিপকুমার, এ কে সেথাজিৎ, কে মহারাবী, তিঐচ ভারত, খোমদ্রাম রতন অমসুং কোকোমিগী এসিস্তেন্ত কোওর্দিনেতরশিং জয়চন্দ্র কোন্থৌজম, লোংজম রতনকুমার, সোমেন্দ্রো থোকচোম, খুরাইজম অথৌবা, পিঐচ শ্যামচান্দ, ৱাই সুরজিৎ কুমার অমসুং এল জয়ন্ত য়াওখি হায়রি।

সোর্স: পোক্নফম