ইম্ফাল, আগস্ত ২৫ : মীলাল (মীতৈ ইরোল ইয়েক লোইনশিল্লোন অপূনবা লূপ) অমদি দিরেক্তোরেত ওব লেংগ্বেজ প্লানিং এন্দ ইমপ্লিমেন্তেসন, গবর্ণমেন্ত ওব মণিপুর অনী পূন্না খুৎশম্নরগা মীপুম খুদীংমক মৈতৈ ময়েক হৈহন্নবগী পান্দমদা পরীং নাইনা চত্থদুনা লাকপা খোঙজংগী মনুং চন্না ঙরাং নুংথিল পূং ১ তাবা মতমদা লমাংদোং পানা মীলালগা মোইরাংগী ইবুধৌ থাংজিং গেস্ত হাউসতা হৌজিক লাঞ্জেন্নরক্তুনা চঙজফম লৌরিবা চুরাচান্দপুর অমদি ফৌগাকচাও ইখায়গী মীওই ২৮৫ রোমদা মৈতৈ ময়েক তম্বীবগী থৌরম হৌদোকখ্রে।

থৌরম অসিদা মীলালগী প্রেসিদেন্ত খাইদেম ইঙোচা ৱাকিং প্রেসিদেন্ত শাদোকপম তোম্বা মঙাং, চুরাচান্দপুর খুমুজাম্বা লৈকায়দগী পেবম ইবোহল, ফৌগাকচাও ইখায়দগী থোকচোম জাতি অমসুং লৌরেম্বম বিলাসিনিনা প্রেসিদিয়াম মেম্বরশিং ওেইনা শরুক য়াখি। 

থৌরম অদুগা মরী লৈননা মীলালগী সেক্রেটারি জেনারেল এল নোংমাইলেম্বীনা থৌরম অসিগী নুংগী ওইবা ৱারোল পীখি। লোয়ননা হৌখিবা মে ৩ দগী লেপ্তনা ঙসি ফাওবা থা ৩ হেঞ্জিল্লক্লবা ঈরাং অসিদা কুকি নার্কো টেরোরিস্তশিংনা ময়ূম-মকৈ মৈ থাদোকপীখ্রবা অমদি হাৎতোকপীখ্রবশিংগী মফমদা মিনিট ২ তুমীন্না লেপ্তুনা অৱাবা ফোঙদোকখিবগা লোয়ননা লৈখিদ্রবশিংগী থৱায়না মপুগী মনাক্তা ঈংনা চীক্না লৈরুনবগীদমক তাইবং শেম্বা মপুদা থৌনিখি। লোয়ননা থৌরম অদুদা শরুক য়াখিবা মীওইশিংদা মৈতৈ ময়েক্কী লাইরিকসু য়েন্থোকখি।

মীলালগী সেক্রেটারি এদজুকেসন পাওনম থাকাবানা হায়, হৌখিবা মে ৭ তা মহৈরোয়শিংগী মৈতৈ ময়েক্কী অথোয়-অহেনগী কম্পিটিসন অমা পাঙথোক্কনি তৌরম্বদু লৈবাক্কী ঈরাংসিনা মরম ওইগরা মতম কক্তনা য়ৈথোকখিবা অদু হৌজিক মহৈরোয়শিং স্কুল মপূং ফানা কানরবনিনা, লাক্লিবা সেপ্তেম্বরগি তাং ২৪, নোংমাইজিং নুমিৎতা হান্নগী সেন্টারশিংদা অদুমক পাঙথোক্লগনি। লোয়ননা কম্পিতিসন অসিগীদমক ফোর্ম থাজিনহৌদবশিংনা সেপ্তেম্বর ১৫ ফাওবগী মনুংদা মীলাল ময়ায় লোয়শঙদা থাজিনবীরক্নবসু মীয়ামদা লাউথোকখি।

সোর্স: পোক্নফম