ইম্ফাল, আগস্ত ২৬ : ফুরুপ অনীগী লাল অসিনা মরম ওইরগা লাঞ্জেন্নদুনা তম্পাক্কী রিলিফ সেন্তরশিংদা চঙজফম লৌরগা লৈরিবা মীয়ামদা মণিপুরগী অইবা অইবীশিংনা ঙসিদগী তেঙবাং পোৎলমশিং য়েন্থোকপা হৌখ্রে।

য়ুনিয়ন ওব এসোসিয়েসন্স ওব মণিপুর রাইটার্স (মণিপুরগী অইবা লূপশিংগী অপূনবা লূপ) অমসুং মণিপুরী মীতৈ এসোসিয়েসন বেঙ্গলুরুনা মপূং ওইবা থৌদাং লৌরগা তেঙবাং পোৎলমশিং য়েন্থোকপা হৌবগী ঙসি অহানবা নুমিৎতা থৌবাল দিস্ত্রিক্তকী খাঙবোক্তা লৈবা রাইচ রিসার্ছ সেন্তরদা হাংবা রিলিফ সেন্তর, লমদিং হায়ার সেকেন্দরি স্কুল রিলিফ সেন্তর অমসুং ককচীং দিস্ত্রিক্তকী কলয়ান আশ্রম ককচীং অমসুং ইন্দোর স্টেদিয়ম ককচীংদা হাংলিবা রিলিফ সেন্তরশিংগী ইনমেতশিংদা সেনিতরি পেদ, ফি শুনবা পাউদার অমসুং শেম্পুনচিংবা পোৎলমশিং য়েন্থোকখি।

ঙসিগী তেঙবাং পোৎলমশিং য়েন্থোকপা অদুদা য়ুনিয়ন ওব এসোসিয়েসন্স ওব মণিপুর রাইটার্সকী ভাইস প্রেসিদেন্ত সরতচান্দ থিয়াম, এসঐচ প্রহ্লাদ শর্ম্মা, জেনরেল সেক্রেটারি রাকেশ নাওরেম, একজিক্যুটিব মেম্বার ক্ষেত্রিময়ুম সুবদনি, মেম্বার দাঃ উমা ময়েংবম লোয়ননা অতৈ মেম্বারশিং অমসুং মণিপুরী মীতৈ এসোসিয়েসন বেঙ্গলুরুগী এদভাইজর সোইবম সুশিলনছিংবা কয়ানা শরুক য়াখি হায়রি।

সোর্স: পোক্নফম