ইম্ফাল, সেপ্তেম্বর ৩ : রাইটার্স ফোরাম, ইম্ফালগী ৩৬ শুবা মপোক কুমওন থৌরম ইম্ফালগী মণিপুর হিন্দী পরিষদকী হোলদা ঙসি পাঙথোকখ্রে, থৌরমগা মরী লৈননা লাইরিক মরিসু ফোঙখ্রে। লানগী লাংতক্নবা মতম ওইরগসু ঐখোয়গী লিতরেচরদি হিংলগা লৈ, শিদে হায়না সাহিত্য একাদেমি এৱার্দি য়ূমলেম্বম ইবোমচানা ফোঙদোকখ্রে। 

থৌরম অদুদা প্রেসিদিয়াম মেম্বার ওইনা শরুক য়াখিবা রাইটার্স ফোরাম অসিগী ফাউন্দর মেম্বারসু ওইরিবা সাহিত্য একাদেমি এৱার্দি য়ূমলেম্বম ইবোমচানা হায়খি, হৌজিক অসি য়াম্না নুংঙাইতবা মতম্নি। মে ৩ দগী থোরকখিবা ঈরাংদগী তূম্ফম-চাফম খঙদবা, পূক্নিং-ৱাখল চরাংনবা, নুংঙাইতবা থৌদোক কয়া থোরক্লি। থোরক্লিবা থৌদোকশিংগী ঈ-পাউশিং অসি তাবদসু শাওনিংবনা হেনবা মতাঙ অমা ওইরি। মসিমক ওইরগসু ঐখোয় থেঙ্গায়নরি।

ইবোমচনা হায়খি, ‘লাইরিক ইবনা লাইরিক ইবা তোকখ্রবা, লাইরিক ফোঙলক্ত্রবদি মণিপুরী লিটেরেচর শিরে হায়না লৌবা তাবনি। অদুবু হৌজিক লান থোক্লগসু ঐখোয়গী লিতেরেচর অসি শিদে, হিংদুনা লৈ’। মহাক্না হায়, লাংতক্নরবা মতম অসিদা লাইরিক ফোঙবগী থবক অসি হন্দক থা অমা-অনীসিদা কন্না তৌরক্লি। রাইটার্স ফোরাম অসি কন-কন লাওনা হিংবনিনা ফোরাম অসিগী ৩৬ শুবা মপোক কুমওন অসি মপূং ফানা পাঙথোক্তুনা লাইরিক মরি অমসু ফোঙলে। মসিগীদমক্তসু নুংঙাইবা ফাওই।

শক্নাইরবা কবি অমসুং অইবা য়ূমলেম্বম ইবোমচানা হায়খি, শৈরেং হায়বসি কলাগী পোৎ অমা ওইগদবনি। লাইরিক ইবশিং অসি থিবগী খোঙচৎ অমদা শুংলেপ লেপ্তনা  চৎলিবনি। থিরিবা অদুসু মপূং ওইনা চুম্লবা পোৎ অমা থিদুনা লৈবনি। থিবদুদা পোৎ অদু ফংবা য়াই, ফংদবসু য়াই। অদুবু থিরিবদুগী খোঙচত্তুদা মহাক্কী নুংদা ইখঙ খঙহৌদনা করিবো হায়না ফাওরকপা, খঞ্জবা মীকুপ খরা থেংনৈ। মদুগী খঙহৌদবা ফাওরকপা মীকুপ অদু কেপচর তৌহৌরগা মদুদগী মহৈ য়াল্লগা হৌগৎলকপা পোৎ অদু শৈরেং, দ্রামা অমসুং নোবেল ওইবা য়াই ময়াম মাঙদা পুথোক্তুনা থেংনরিবা পোৎ অদু খঙমিন্নবা, শেয়ার তৌমিন্ননবা পুথোরকপা পোৎ অদু লিতরেচরগী অশেংবা পোৎ ওইগদৌরিবনি। কনাগুম্বা অইবা অমনা অশেংবা মপূক্নিংদা থেংনবা অশেংবা এক্সপরিয়েন্স অদুদগী থোরকপা অদু ফজবা লিতরেচর ওইরক্কদৌরিবনি।

মণিপুরী লিতরেচরদা নুপী ওইবীশিংনা হেন্না থৱায় য়াওখৎলকপা, নুপী অইবী মশীং য়ামখৎলকপা অসিমক পূক্নিং থৌগৎনিংঙাই ওইবা মতাঙ অমনি লৌই। লাইরিক ইবা, ফোঙবদা নত্তনা লাইরিক নৈনবগী থবকশিংদা নুপীশিং হেন্না য়াওখৎলকপা অসিমকসু য়াম্না নুংঙাইবা ফাওই হায়না সাহিত্য একাদেমি এৱার্দি য়ূমলেম্বম ইবোমচানা নুপী অইবীশিংবুসু পূক্নিং থৌগৎখি। রাইটার্স ফোরম, ইম্ফালগী ভাইস প্রেসিদেন্ট ইরুংবম বসন্তুসু থৌরম অদুদা প্রেসিদিয়াম মেম্বার ওইনা শরুক য়াখি।

থৌরমগা মরী লৈননা হুইদ্রোম ওথেল্লোগী শৈরেং লাইরিক ‘চীংনুং খোংগী মপাউ’, ৱাংখৈময়ুম জয়ন্তকুমারগী ৱারী লিশাং ‘অহীং অমগী খোঙলোয়’ , দোনেস্বর কোন্সমগী শৈরেং লাইরিক ‘নুংশিবগী মশাইকোন’ অমসুং ‘অচিকপগী মরানয়াই’ ফোঙখি। ফোঙলিবা লাইরিকশিং অদুগী মরমদা দাঃ সঙ্গিতা দেবী অমসুং হাওরোংবম সুনিতা দেবী অনীনা নৈনরোয় ওইনা ৱা ঙাঙখি। থৌরম অদুদা শরুক য়াখিবশিংনা রাইটার্স ফোরাম অসিগী লৈখিদ্রবা মেম্বরশিংগী মফমদা লৈ কত্তুনা ইকায়খুম্নবা ঊৎখি অমসুং মিনিট অনী তুমিন্ন লেপ্তুনা অৱাবা ফোঙদোকখি।

সোর্স: পোক্নফম