নিউ দিল্লী, সেপ্টেম্বর ০২ : লৈবাক অসিনা নুমিৎ খরনিগী মমাঙদা ‘চন্দ্রয়ান-থ্রী’ বু মায় পাক্না থাগৎতুনা থাগী লৈমায়দা তাহনবা ঙমদুনা মালেমগী স্পেসকী খোঙচৎতা মশক নাইবা লৈবাক অমা ওইহনবা ঙমখ্রবা মতুংদা লৈবাক অসিগী ওইনা নুমিৎকী মরমদা থিজিন্নবগীদমক অহানবা সোলার মিসন ‘আদিত্য এল-১’ মায় পাক্না থাগৎপা ঙমখ্রে।

নুমিৎকী মরমদা স্টাদি চত্থনবগীদমক ওবজার্ভেটরি ক্লাসতা য়ূম্ফম ওইবা লৈবাক অসিগী অহানবা সোলার মিসন অসি ঙসি অয়ূক পুং ১১.৫০ তারকপদা অন্ধ্র প্রদেশকী শ্রীহরিকোটাদা লৈবা ছটিশধাৱন সেন্টরদগী ইন্দিয়ান স্পেস রিসার্স ওর্গানাইজেসন (আই এস আর ও) না পোলার সেটিলাইট লাঞ্চ ভেহিকল (পি এস এল ভি-সী ৫৭) গী মতেং লৌদুনা মায় পাক্না থাগৎখিবনি। পূন্না কিলোগ্রাম ১,৪৮০৭.৭ রোম লূম্বা অদিত্য এল-১ অসিনা নুমিৎকী মরমদা থিজিনবগী থবক চত্থবা য়াগদবা এল-১ পোইন্ট হায়না খঙনরিবা মালেমদগী ১.৫ মিলিয়ন কিলোমিটার (৯,৩০,০০০ মাইলস) লকপা মফম অসি য়ৌবগা নুমিৎ ১২৫ নি চঙগনি। অদুম ওইনমক স্পেস ক্রাফ্ট অসিনা নুমিৎকী লৈমায়দা তারোই অমসুং নুমিৎলোমদসু য়াম্না নকশিল্লোই হায়রি।

স্পেস ক্রাফ্ট অসিবু ঙসি ময়া পাক্না থাগৎখিবদা মসিগী প্রোজেক্ট দিরেক্টর নিগার শাজিনা ফোঙদোকখিবদা মঙলান অমগুম্বা ঙসিগী থৌদোক অসি মঙফাওনরে হায়খিবগা লোয়ননা মিসন অসিবু মায় পাক্নবা হোৎনবদা শরুক য়াখিবা সাইন্টিস্ট অমসুং ইঞ্জিনিয়ারশিং য়াওনা শরুক য়াখিবা পূম্নমকপু থাগৎপা ফোঙদোকখি। হৌজিক্তি স্পেস ক্রাফ্ট অসি লৈবাক অসিগীদা নত্তনা গ্লোবেল সাইন্টিফিক ফ্রেটর্নিটিগীসু লন অমা ওইরগনি হায়খি। অদিত্য এল-১ মায় পাক্না থাগৎখিবদা য়ুনিয়ন স্টেট মিনিষ্টার (সাইন্স এন্দ টেক্নোলোজি) ডা. জিতেন্দ্র সিংহ য়াওনা য়ুনিয়ন হোম মিনিষ্টার অমিট শাহ খক্তা নত্তনা প্রাইম মিনিষ্টর নরেন্দ্র মোদিনসু লৈবাক অসিনা স্পেসকী খোঙচৎ লেপ্তনা চত্থরক্লি হায়বগা লোয়ননা মিসন অসিগীদমক ইসরোবুসু থাগৎপা ফোঙদোকখ্রে।

 সোর্স: হুইয়েন লানপাউ