ইম্ফাল, আগস্ত ৩০ : ‘মণিপুরগী সি এস ওশিং অমত্তা ওইনা পূনশিন্দুনা লিচিং অমখক্তদা চিংদ্রিবা ফাওবা অমসুং মণিপুরগী এসেমব্লিদা মণিপুর কন্নবা অকনবা ৱারেপ অমা লৌদ্রিবা ফাওবা মমা ওইবী ঐখোয়না চরা হেনবগী খোঙজং চঙশিনগনি’ হায়দুনা থৱায় মিরেল ৱুমেন ৱীংনা চত্থরকখিবা খোঙজংগী মখা চত্থরকপা ওইনা ঙসিদগী নুপী অনীনা শীংজমৈ ৱাংমা ক্ষেত্রি লৈকায় থোংখোংদা শিদ্রিবা ফাওবা চরা হেনবগী খোঙজং চঙশিনবা হৌখ্রে।

থা অসিগী ২১দগী হৌদুনা থৱায় মিরেল ৱুমেন ৱীংনা তোঙান তোঙানবা মফমশিংদা খূত্থাং চরা হেনবগী খোঙজং অসি চঙশিন্দুনা লাকখি। অদুবু ঙরাং চত্থখিবা এসেমব্লিদা মণিপুর কন্নবগী করিগুম্বা ৱারেপ অমত্তা লৌখিদবদা য়ানিংদবা উত্তুনা ঙসিদগী শিদ্রিবা ফাওবা চরা হেনবগী খোঙজং অসি চঙশিল্লকখিবনি।

চরা হেন্দুনা খোঙজং চঙশিল্লিবী গঙ্গানা হায়, মহাক শীংজমৈ কৈথেলদা এঞ্ছাং-নাপী য়োন্দুনা ইমুং-মনুং পুরবনি। অদুবু লৈবাক অসিদা থোক্লিবা ঈরাং অসিদা মীয়াম অৱাবা কয়া মায়োক্নরে। মীয়ামগী অৱাবা অসি লৈঙাক অসিনা তাবীদনা লৈথোকপদগী অমসুং লৈরিবা সি এস ওশিং পূনশিন্দনা লৈবদগী শিদ্রিবা ফাওবা চরা হেনবগী খোঙজং অসি চঙশিন্নবা ফীরেপ লৌরকপনি।

নোংমগী অফং-অফংবা থবক শূদুনা ইমুং-মনুং পুরিবী প্রমোনা হায়, লমদম অসিদা অমনা ঙাঙবা অমনা তাদবগী ফীবমদা লৈরে। পূনশিনবীরো হায়রবসু তাবদীদনা লৈরে। মসিদগী শিদ্রিবা ফাওবা চরা হেনবগী খোঙজং চঙশিন্নবগী ফীরেপ অসি লৌরকখিবনি। মরকসিদা, থৱায়মিরেলগী খোঙজং শৌগৎলদুনা খুরায় হৈগ্রুমখোঙ অপুনবা নুপী লুপ্না চঙশিল্লকপা খূত্থাং চরা হেনবগী খোঙজং অদু মখা তানসু অদুম্মক চঙশিনখিগনি হায়না ঙরাং ফোঙদোকখ্রে।

খুরাই হৈগ্রুমখোঙদা চত্থরিবা খূত্থাং চরা হেনবগী খোঙজং অদুগা মরী লৈননা নুপী লূপ অসিগী মেম্বার লাইতোঞ্জম ওংবী আশালতানা হায়, ঙরাং ফমখিবা মণিপুর লেজিসলেটিব এসেমব্লিগী মীফম অদুনা করিগুম্বা মীয়ামগী অপাম্বা অসিগা মরী লৈননা থবক তৌরক্কদ্রা হায়না খন্দুনা ঈশ্বরগী মফমদা লাই খুরুম্লগা লাকপনি। অদুবু মসিগী ওন্ন-তৈনবদা এসেমব্লিদা তৌথোরক্লিবা মওং অসিনা মীয়ামদা পেন্দবা অমদি খোইরাং খোইশাওনবা হেনগৎহল্লে। মরম অদুনা লূপ অশিনসু থৱায় মিরেলনা চঙশিল্লকপা খোঙজংশিংদা মখা তানা শৌগৎখিগনি।

সোর্স: পোক্নফম