• 485
• ৪ঠা মার্চ ২০২১ ইং
• Share on:

পুয়াম অচৌ খুমনচাগী ৱারীমচা ‘মীনুংশি ‘

তাম্লবা খুঙ্গং অমদা লুখ্রাবী অমগী মচানুপা রবৈ কৌবা অমা লৈরম্মী। লাইরবনা লায়না নারবা মীশক অমনি। মমানা নোংমগী অফংবা থবক শুদুনা হিংনবগী লানফমদা লান্থেংনরি। অঙাং ওইরিঙেদা L.P school অমদা মহৈতম্লকখি। বুধি লৌশিং চংখোনবনা ক্লাস তেন ফাওবা রোল ১ তাদুনা লাকখি। ক্লাস 8গী সরকারনা লৌবা স্কোলারসিপ এক্সামদ তোপ তাখি অমদি মীয়াম্না শক খংবা হৌরকখি। মহাক্কীদমক খুঙ্গং অদুগী মীয়াম্না মতেং পিবা হৌরকখি। মচাতবু ডোক্তর ওইরবদি খন্দুনা ইনাকখুনবা কনাগী থোংজিন্দা লেপ্তুনা থবক শুজখি। হুমাংমননা শুদুনা মচাবু চাওনবা য়োকপা মহৈ তম্বগী থবক তৌরকখি। মেট্রিক থারে মনিপুর পুম্বগী ৭ শুবা পোজিসন ফংজখি। খুঙ্গংগী প্রজা কয়া হরাওজখি। মনা মথুম পীদুনা রবৈ পুক্নিং য়োকখৎপিখি।

মতমগী খোংচৎ তুংওইনা ক্লাস ১২ এক্সাম পিখি। এক্সাম হাইদোকপদা মনিপুর পুম্বগী ২ শুবা পোজিসন ফংবা ঙমখি। মেডিকেল এক্সাম পাস তৌদুনা ডোক্তর তিপুরদা মহৈ তমখি। মমা লাইরবীনা চাবা মচেৎ তুম্বা মচেৎ থিদনা মচাগী শেল থাখি। ত্রেনিং লোইরবা মতুং ইকুই কুইদনা রিমসতা সরকারগী জোব ফংখি। মতমগী খোংচৎ তা রবৈ নুংশি নুংওন য়ুম্বান কৈবালগী ৱাখল লাকখি। শেল থুমসু নিংথিনা পাইবা হৌরকখি। মমা লুখ্রাবীনা মতম লৈবা খিবিক্তা হায়জৈ, ইমাগী ইবুংঙো রাবৈ- নঙ খুঙ্গং অসিগী প্রজাশিং তোল্ল তারবা কয়াবু খক কাওগনু। নংনা ঙসি ডোক্তর অমা ওইবা ঙমজবসি খুঙ্গংঅসিগী চমজরবা প্রজা ক্লব সংন্থান কয়াগী তৌবিমলননি।

রবৈ না মমা থম্বালশংদা হায়জৈ,

ইমানা খুঙ্গংদা ঐনা ক্বাতরদা, ইমা ইচা লাপ্না লৈম্মীনরে; নুংঙাইত্তে।

ইমা ইম্ফালদা লম অমা লৈরাসিরা?  মমানা ৱাফম অদু য়াখিদে।

মতমগী খোংল্লৈ তুংইন্না রবৈ ইম্ফাল কৈশামপাৎ জংক্সনদগী থিকাদার রনধিরগী মচানুপী রিনাগা লুহোংখি। রিনা নাইতোম পোকচবী কোইবা লাংবা পামজবী লাইরিক লাইশু মপুংফাদবী ইমুংগী মৌনি। রবৈনা রিনাগী ফজাবদা ঙাওরুবা থিকাদার রনধিরগী হৈ শিংলবা খুজিন থৌরাংদগীনি।

ঙশিদি ফজবনা চাবা য়াদে হায়বা রবৈ খংলকলে।

মমা অমদি মাগীনুপীগা তৎতনা খৎন চৈন্নৈ।। মচা পোকচবগী মহৈ কলেন নুশা মৈশালক্তা নুং লৈঙোই থুগাইদুনা চরাম চদৎনাদুনা মাবু মহৈ তমহলকখিবগী মহৈদুননি ঙশি থম্বালশংনা ৱাজরিবা। ফজবী মমৌ নুপীগী অরা তিতি দা চৎখ্রে রবৈ। খুঙ্গংগী প্রজা মাবু পুক্নিং থৌগৎপিরকখিবা কয়া ঙম্নমক কাওখ্রে।

মীওইবগী লাইবক অঙকপানি; খুদোংথিবগি লোয়িননি। থম্বালশং লম্বীদা চৎলিঙৈদা তাতা ত্রক অমনা থোমদুনা পুন্সি লোমখি।। রবৈ থম্মোয়নুংদা নুংঙাইতবদি ফাওয়ি অদুবূ মাগীনুপীগী কোল্লুনা শুমদোকখ্রবা কোক অদুনা মপাল থোকপদি ঙমখিদে।

মমাগী মথৌ মঙম পাংথোক্লবা তুংদা রবৈ মকুবোক রনধিরগী য়ুমদা লৈখ্রে। হৌজিক্তি রিনাগী মনিং থুংলে। মকে শেম্বা পর্টি তৌবা নোংমাগী তৌদ্রবা য়াদ্রবা মথৌনি। ফিজেৎ কোম্বা মতৎ শেৎপা উরগা নহা অহল কয়ানা রিনাদা মীৎয়েং তাজৈ। মকুবোক্না রবৈগী “ইম্ফাল RRR Clinic অমা হাংদোকপীরে। মসি Gynocology hospital নি। RRR অহুমদি রনধির রবৈ রিনা হায়বনি। ঙশিদি ক্লিনিক অসি মমিং চতলে।। শেল থুম য়াম্না লৌয়ি হিশাপ পুম্নমক রনধিরনা তৌয়ি।

নুমিদাংদা পর্টি হেক হেক তৌই,  রবৈ  য়ুঙাঙ নিংথিনা থকপা হৈরে। মহৌশাগা মানদ্রে, মমাবূসু নিশিংবা হৌরক্লে। হৌখ্রবা ৱারী কয়া মথং মথং চিথদনা নিঙশিংলকপা হৌরকখি। মমানা খুৎ শমদুনা L P school থিনবীরকখিবা, চদুম ইনবিরকখিবা, এক্সাম চ‍ৎলমদাইদা নুংশিনা মনম নমবিখিবা কাওবা য়াদে ঙসি। য়ুঙাং পেগ অমদগী পেগ অমা,  মমৈথংদা তুমথখিরম্মী। অমরোমদা মসিগী খুদোংচবা লৌরগা ডোক্তর নিরমল  অমসুং রিনা অরোনবা মরি লৈনরকখি। রবৈবু রিনানা মপুরোইবা ওইনা খনবা ঙমশিল্লত্রে।

নোংমা রবৈগী খুঙ্গং অদুদগী লাইরবা চাবোকপী অমা পুখৎলকখি। শেল লৈতে অদুবু খুঙ্গংগী মবুং ডোক্তর অমা লৈরি হায়বগী অশাদনি তম্লবা খুঙ্গংদগী ক্লিনিক অসিদা লাক্লিবা। ইম্ফাল RRR হোস্পিটাল য়ৌরে। অহানবদা কাউন্টার টিকেট কাকপগি লুপা ৫০০ দরকার ওইরি। মদু পেশন্টগী ইমুংদা অৱাবা অমা ওইরি। ডোক্তর রবৈ উন্নজগে হায়জৈ অদুবু হোস্পিটাল অদুগী ওথোরিতিনা তাবীরমদে। টিকেট ককলে হোস্পিটাল বেদ নং: ১০৮ নি। ডোক্তর রবৈনা পেশন্ট অদু য়েংলমলে। লুপা লিশিং ৩০ দিপোজিট তৌবা মথৌ তাই হৌজিক OT তৌরসি হায়রমলগা থোকখি।

মহৌশাগী খুঙ্গংগী পুন্সিদো ওলমলে ইম্ফাল সহরগী পুন্সি ওইরমলে রবৈগী পুন্সি। মহাকপু খুঙ্গংগী প্রজানা ওকখিবগী মহৈদুরা? লাইরবগী চৈনানা মৈশা লাংলবা চাবোকপী করি ওইখি? দিপোজিট তৌবা ঙমদবদগী বেদ নং ১০৮ ফমুংথক্তা অঙাং নুপি অমা পোক্লমলগা শকখিতোম্বী সংসারদগী বিদাই লৌখি। ডোক্তরনা চেকশিনদবদগী থোকখিবিনী হায়বদগী খোইশাওনরবা মীয়াম্না হোপ্সিটাল গী অমাং অতা থোকখি।। ডোক্তর রবৈ ফুরুবগী মরালদা শকখিতোম্বীগী মপুরোইবা কুমার পুলিসনা ফাজিনখি। ঈরাং নমশিনখি। JAC না কুমার condition য়াওদনা থাদোকপা Ex Gratia লাখ ৫ পিহন্দুনা ৱারোইশিন পুরকখি।

মমাদি চৎখ্রে কুমার মচানুপী কোন্দুনা কপলি। কুমারগী ৱাহংদি কনাগী মরালনো?

লাইরবগিরা হায়বসিনি।

খংহৌদবা মীৎকুপ অমদা রিনা ডোক্তর নিরমলদা ময়ূম পানথোকখি। অশাওবনা য়োম্লবা রবৈ মখুত্তা লাইন্সেস গন পাইদুনা রিনা ডোক্তর নিরমল গী খোঙ্গুল লিখী অমদি ফংসু ফংখি। মখুৎমকনা মীনুংশি মচেৎ অমত্তা য়াওদনা নোংমৈনা তমথিনা কাপতুনা হাৎখি। পুলিসনা মহাকপু ফাখি অমদি র্কোট না চহি ১০গী মীহাৎ কৈশুমশংদা পীখি।

চেকপল মরিনা কোইশিল্লবা ফক্লাংনুদা অঙাওবা অমা ওইনা রবৈ পুন্সি লেনখি।

“মমাগী মীনুংশি প্রজাগী মীনুশি ৱাতলবদা অরেম্বানি পুম্নমক লাইরিক হৈরুবগী”।