• 903
• ৯ই অক্টোবর ২০২২ ইং
• Share on:

রাজকুমারী এম কে বিনোদিনিগী ফিল্ম উৎলগা নৈনখ্রে

ইম্ফাল, অক্টোবর ০৮ :লৈমরোল খোর্জৈকোল (লৈকোল) না চহী অমা চুপ্না চত্থরকখিবা মহারাজকুমারি বিনোদিনি (ইমাশি বিনোদিনি) গী চহী ১০০ শুরকপগী মপোক কুমওন থৌরমগী মনুং চন্না লৈখিদ্রবীনা ইরম্বা ফিল্ম উৎপগা লোয়ননা খন্ন-নৈনবা মীফম পাঙথোকখ্রে। ঙসিগী থৌরম অসি কোনুং লাম্পাক্তা লৈবা এম এস দি এফ এসগী প্রিভিয়ু থিয়েটারগী হোলদা পাঙথোকখিবনি। থৌরম অসিনা অরিবম শ্যাম শর্ম্মা আর্কাইবস অমসুং এম এস দি এফ এস না খূৎশম্নদুনা শিনবনি। থৌরমগী মনুং চন্না লৈখিদ্রবীগী মফমদা হৈকৎ লৈকৎ তমদুনা ইকায়খুম্নখি।

থৌরমগা মরী লৈননা অরিবম শ্যামনা ফোঙদোকখিবদা সানা ইবেম্মাগী ফিল্মসি মহাক্কী পুন্সিদা য়ূম্ফম ওইবা ফিল্মনি। সাহিত্য একাদেমী (দিল্লী) না নম্বীয়ু হায়রকপদগী নমখিবনি। মখোয়না নম্লকপদা পুঙ্খায় অমখক্তগীনি অদুবু মহাক্না শাংনা অমখক্তগীনি অদুবু মহাক্না শাংনা নমহৌবনি। মসিদা শীজিন্নদবা অশোয়বা, নোকপনচিংবা হন্না হন্না নমখিবশিং অদুসু উৎপনি। ঐখোয়না নম্লিঙৈদা অতোপ্পা কেমেরা অমনসু নম্বগী ৱার্কিং ভিডিওগী শরুকসু ঙসিগী নৈনবা অসিদা য়াওনা উৎপনি। লোয়ননা লৈখিদ্রবীনা ইরম্বা ফিল্ম ‘পাউখুম অমা’ সু উৎপনি হায়খি।

লৈখিদ্রবগী মতাংদা নমহৌবা অশোয়বসু শোয়দবসু অদুগা ফজবা-ফজবদা লোইনমক খোমজিন্দুনা ফংলকপশিং উৎথোকপনি। কুমজা ১৯৮৩দা নম্বা ফিল্ম ‘পাউখুম অমা’ হায়বা ফিল্মসিসু হৌজিক ফাওবদা উৎখিদ্রিবা ফিল্মনি। মতমদুদা চীং-তমগী লৈনবা মরীদা উখ্রুলদা নমখিবা ফিল্মনি। অহানবা মণিপুর ফিল্ম ফেষ্টিবেলদা য়েংখোম রোমানা বেষ্ট এক্ট্রেস ফংখিবনি।

ফিল্ম অসি কুমজা ১৯৮৩ গী মতুংদা ঙসি উৎলিবসিনা অহানবনি হায়খি। ফিল্ম দিভিজননা নম্বা ফিল্ম ওইবনিনা উৎফমসু লৈত্রে অদুগা টিকেট লৌবসু য়াদবা অমসুং উৎপসু য়াদবনি। অদুবু হন্দক পবননা পুথোকপীরকপদগী ঙসি উৎপা ঙম্লবনিনা মতুংদসু উৎপা য়ারগনি খল্লি হায়খি।

সোর্স: হুইয়েন লানপাউ