নেশনেল গেমসতা মোনোরমানা সাইক্লিংদা গোল্ড, নুংশিথোই অমদি বেমবেমনা জুদোদা ব্রোঞ্জ লৌখ্রে
ইম্ফাল, অক্টোবর ০৮: গুজরাটনা য়ূম্বু ওইদুনা চত্থরিবা ৩৬ শুবা নেসনেল গেমসকী ঙসি তরানি শুবা নুমিৎতা মণিপুরনা সাইক্লিং মশান্নদা গোল্ড ১ অমদি জুদো মশান্নদা ব্রোঞ্জ ২ পূন্না মেদেল ৩ লৌবা ঙমখ্রে। মণিপুরনা হৌজিকফাওবদা গোল্ড ১৫, সিলভার ৫, ব্রোঞ্জ ১৪ পূন্না মেদেল ৩৪ ফংবা ঙমখ্রে। অদুগা ইরাই নুমিৎ ফাওবদা মণিপুরনা মেদেল ৩১ ফংদুনা মেদেল টেলিগী ৯ শুবা মফমদা লৈরি।
দিল্লীগী সাইকেল ভেলোদ্রোমদা ঙসি পাঙথোকখিবা নুপীগী কিলোমিটার ৮৫ গী মাস ষ্টার্ট ইভেন্টতা ষ্টেটকী সাইক্লিষ্ট তোংব্রম মোনোরমানা গোল্ড মেদেল ফংবা ঙমখি। আসামগী চনক্যা গোগোইনা সিলভার অমদি মহারাষ্ট্রগী পুজা পবন দোনোলেনা ব্রোঞ্জ মেদেল ফংখি।
অমরোমদা, গান্ধীনগরগী মহাত্মা মন্দির এগজিবিসন হোল ৱানদা জুদো মশান্নগী ঙসি শান্নখিবা নুপীগী কেজি ৫২ অমদি ৫৭ মখাগী কাঙলূপকী ব্রোঞ্জ মেদেল মেটচ অনীদা মায় পাক্তুনা এল নুংশিথোই চনু অমদি এল বেমবেমনা ব্রোঞ্জ মেদেলশিং ফংবা ঙমখি।
অমরেমাদা নুপী ফুটবোলগী ঙশি শান্নখিবা সেমিফাইনেল মেটচ অমদা মণিপুরনা আসামবু লাকচনা ৫-০ দা মায়থীবা পীদুনা ফাইনেল চঙবা ঙমখ্রে। ঙাঙোম বালানা শান্নবগী ২৩ শুবা মিনিটতা মণিপুরগী অহানবা গোল চনবা ঙমখি। মহাক্না মখা তানা শান্নবগী ৪০ শুবা মিনিটতা গোল ১গা হাপচিন্দুনা আসামবু ২-০ দা অহানবা হাফ লোইবা ফাওবদা মাংজিল থাখি।
মণিপুরগী নুপীমচাশিংগী খূদুম চনবা মখা চত্থরকপা ওইনা অনীশুবা হাফতা প্রমেশ্বরীনা শান্নবগী ৫৬ শুবা মিনিটতা গোল ১ হাপচিনবা ঙমখি মিনিটতা গোল ১গা হাপচিন্দুনা স্কোর ৪-০দা লৈহনখি। মেটচ লোইগদবা মিনিট ১ ৱাৎলিঙৈ সুলতানানা শান্নবগী ৮৯ শুবা মিনিটতা মণিপুরগী মায় পাকপগী ৫ শুবা গোল চনবা ঙমখি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু