মণিপুর কালচারেল ফেষ্টিবেল ২০২২ হৌদোকখ্রে
ইম্ফাল, মে ১১ : চনা লুখোই আর্ট সেন্টার (সিএলএসি), চনা ময়াই লৈকাই অমদি পেট্রিওটিক রাইটার্স ফোরাম (পিএদব্লিয়ুএফ) মণিপুর অনিনা পুন্না শীন্দুনা পাঙথোকপা ‘৩ দেস মণিপুরী কালচারেল ফেষ্টিবেল ২০২২’ ঙসি নুংথিল পুং ১ তাবদা ইম্ফাল ইষ্ট ডিষ্ট্রিক্টকী চনা পুখ্রিমপালদা হৌদোকখ্রে। হৌদোকপগী থৌরম অদুদা ইরুংবম রবিচন্দ্র, জিলা পরিষদ মেম্বার সওম্বুংনা অথোইবা মীথুংলেন অমদি পেট্রোটিক রাইটার্স ফোরাম মণিপুরগী প্রেসিডেন্ট নাওরোইবম খম্বা লুৱাংনা থৌরম মপু ওইনা শরুক য়াখি।
সাহিত্য একাডেমি এৱার্দি সরতচান্দ থিয়ামনা অখন্নবা মীথুংলেন ওইনা শরুক য়াখি। শক্নাইরবা প্লোরাইত অমদি মীতৈ পুয়াগী ৱারি লীবা ওজা চনা লুখোইস থৌরম অদুদা শরুক য়াখি।
হৌদোকপগী থৌরম অদুগী মনুং চন্না শক্নাইরবা কোনুংগী পেনা শৈশকপা লাইওইখ্রবা ওজা খাইদেম মণিবু নিংশিংবগা লোয়ননা মহাক্কী ফোটোদা হৈকৎ লৈকৎ তমদুনা অৱাংবা থাক্তা ইকায়খুম্নবা উৎখি। লোয়ননা ওজা খাইদেম মণিদা কত্থোকপা পেনা ফমশক অমদি পুং চোলোমগী থৌরমসু পাঙথোকখি। পিএদব্লিয়ুএফ মণিপুরগী লাইফ মেম্বার ৱাইখোম বিহারিনা তরাম্না ওকপগী ৱারোল থমখি। সিএলএসিগী সেক্রেটারি চনা লেম্বীনা নুমিৎ হুম্নি চুপ্না পাঙথোক্কদৌরিবা কালচারেল ফেষ্টিবেল অসিগী নুংগী ওইবা ৱারোল খমখি।
থৌরম অদুদা শরুক য়াখিবা প্লেরাইট চনা লুখোইনা ফোঙদোকখিবদা মীতৈ ঐখোয়গী ইপা ইপুশিংনা থম্বীরম্লিবা নাৎ অমদি শক্তমশিং অসি ঙসিগী মীরোল অসিনা ঙাক্তুনা থমহৌদ্রবদি লমদম অসিদা মীতৈ ফুরুপ অমা লমদম অসিদা লৈরম্মী হায়বসি তুংগী মীরোলনা খক নিংশিংহৌরোই। মরম অসিনা ঙসিগী মীরৈাল অসিনা তুংগী মীরোলগীদমক ঐখোয়গী নাৎ অমদি শক্তমশিং ঙাক্তুনা থমহৌনবা হোৎনমিন্নসি।
থৌরমগী অথোইবা মীথুংলেন ওইনা শরুক য়াখিবা জেদপি মেম্বার ইরুংবম রবিচন্দ্রনা ফোঙদোকখিবদা নুমিৎ হুম্নি চুপ্না মণিপুরী কালচারেল ফেষ্টিবেল অমা লম্লাই মায়কৈরোমদা পাঙথোক্নরকপা অসিনা মায়কৈ অসোমগী হৌরক্লিবা ইচা ইনাওশিংদা মীতৈ ঐখোয়গী ইনাৎ নুংশিবগী চাং হেনগৎহনবদা চাওনা মতেং পাংলগনি। ঐখোয়গী কালচার অসি ঐখোয়না য়োকখৎতবা অতোপ্পা ফুরুপ অমত্তনা খক য়োখৎলোই। ফুরুপ অমা হিংলি হায়বসি ফুরুপ অদুগী ফজরবা কালচার অদুনা মশক তাক্লিবনি।
থৌরম মপু ওইনা শরুক য়াখিবা পিএদব্লিয়ুএফ মণিপুরগী প্রেসিডেন্ট নাওরোইবম খম্বা লুৱাংনা ফোঙদোকখিবদা পেট্রিওটিক রাইটার্স ফোরামনা হৌখিবা চহী কয়াগী মমাঙদগী মণিপুরদা নত্তনা বাংলাদেশতা ফাওবা মণিপুরী কালচারেল ফেষ্টিবেল পাঙথোকখ্রে। ঙসিদগী হৌদোকখিবা কালচারেল ফেষ্টিবেল অসিনা হৌরক্লিবা লমদমসিগী ইনাৎপু নুংশিজবা আর্টিষ্টশিংদা থৌনা অমদি শোয়দনা পীরগনি। অইবশিংগী আর্টিষ্টশিংগগী মরক্তগীসু অচৌবা মরী অমা শোয়দনা থম্লগনি।
সোর্স: সঙাই এক্সপ্রেস
0 কমেন্ট:
কমেন্ট তৌবিয়ু