ইম্ফাল আগস্ত ৩০ : মণিপুর হায় কোর্ত অমসুং সুপ্রিম কোর্ত ওব ইন্দিয়াগী জজমেন্তশিং মৈতৈ ময়েক অমসুং রোমান ময়েক (মণিপুরী) দা হন্দোক্নবগীদমক্তা মণিপুর সরকারনা লুপা ৮৯,৮৪,৭৫৯ কাইথোক্লে হায়রি। মণিপুর হায় কোর্তকী জোইন্ত রেজিস্ত্রার (জুদিসিয়েল) না থাদোরকপা চেরোল অমনা হায়, মণিপুর হায় কোর্তকী জস্তিস অমসুং এ আই-এসিস্তেন্ত লিগেল ত্রান্সলেসন এদভাইজরি কমিতিগী চেয়ারপার্সন এ বিমোল সিংহগী চেয়ারমেনসিপকী মখাদা কমিটি অসিগী মেম্বার জাস্তিস এ গুনেশ্বর শর্ম্মানা থৌদাং লৌদুনা হায় কোর্ত ওব মণিপুর অমসুং সুপ্রিম কোর্ত ওব ইন্দিয়াগী জজমেন্তশিং মৈতৈ ময়েক অমসুং রোমান ময়েক (মণিপুরী) দা ত্রান্সলেসন তৌনবা থবক পায়খৎলকখি। খোঙথাং অসিগী শরুক অমা ওইনা মণিপুর সরকারনসু লুপা ৮৯,৮৪,৭৫৯ এলাকেত তৌরক্লে। এলোকেত তৌরক্লবা শেনফম অসি লিগেল তার্মিনোলোজি খঙবা অমদি ত্রান্সলেসন্দা হৈথোই শিংথোইবা ত্রান্সলেতরশিং এঙ্গেজ তৌবদা শীজিন্নগনি হায়রি।

হায় কোর্ত ওব মণিপুরনা হন্দক্তা এন আই তি মণিপুরগা এম ও য়ু সাইন তৌনদুনা ইংলিসতগী মণিপুর-মৈতৈ ময়েক অমসুং রোমান ময়েক্তা ত্রান্সলেত তৌবা য়াবা সোফ্তৱায়র শেম্নবা থবক পায়খৎলি। মসিগী মথক্তা দিস্ত্রিক্ত জজগী রেঙ্ককা মান্নবা মণিপুর হায় কোর্তকী রেজিস্ত্রার (লিঙ্গুইস্তিক) কী পোস্ত অমসুং জুনিয়র ত্রান্সলেতরগী পোস্ত ৭ হাংদোক্নবা ৱাফমসু পুখৎতুনা লাকখি। মসিগা লোয়ননা সুপ্রিম কোর্ত অমসুং হায় কোর্তকী জজমেন্তশিং ইংলিস, মৈতৈ ময়েক অমদি রোমান ময়েক (মণিপুরী) দা ফোঙনবা ওনলাইন জার্নেল অমসু হৌদোক্নবা খোঙথাং কমিতিনা পায়খৎপা হৌখ্রবনি হায়রি।

সোর্স: পোক্নফম