ইম্ফাল, আগস্ত ৩০  : বিষ্ণুপুর দিস্ক্রিতকী মোইরাং পি এসকী মনুং চনবা নরানসৈনা মনীংদা ঙরাংদগী হৌদুনা কুকি লালহৌবশিংনা বোম য়াওনা লেপ্তনা এতেক তৌরকপদগী আই আর বি পার্সনেল ২ য়াওনা মীওই ৮ শোক্লে হায়রি।

প্রেসনা ফংবা পাউনা হায়, ঙসি অয়ূক পূং ৮ লোম তাবদা নরানসৈনাদা মনীংগী লৌবূক অমদি চুরাচান্দপুর দিস্ত্রিক্তকী চীংগী মফমশিংদগী কুকি লালিহৌবশিংনা মৈতৈ খুল তম্না বোম য়াওনা নোংমৈ রাউন্দ কয়া কাপশিল্লকখিবা মোর্তার সেল অমা নরাসৈনাদা লৈবা ২শুবা আই আর বিগী কেম্পাস মনুংদা তাশিল্লক্তুনা পোকখায়বদা বেটালিয়ন অসিগী পার্সনেল ২ শোকখি। মসিগা লোয়ননা কুকি লালহৌবশিংনা কাপ্লকখিবা নোংমৈশিং অদুগী মরুনা পানবদগী খুল ঙাকপা ভোলুন্তিয়ার ৬ সু অশোক-অপন নংখি।

শোক্লবশিং অদুগী মনুংদা কোক্তা নোংমৈ মরুনা পানবা অমা য়াওনা ৩ না রাজ মেদিসিতদা পুখৎতুনা লায়কন্নখি অমদি অতৈনা ইম্ফালগী তোঙান-তোঙানবা হোস্পিতালশিং দা পুখৎতুনা লায়কন্নখি হায়রি।

মশীং য়াম্লবা মীওই কয়া নোংমৈ কাপ্নফম অদুদা চঙশিন্নরক্তুনা কুকি লালহৌবিশংনা এতক তৌরকখিবা অদু লান্থেংনখি। ঙসি নুমিদাং অথেঙবা ফাওবা স্তেত ফোর্স, খুল ঙাক্লিবা ভোলুন্তিয়ার অমসুং কুকি লালহৌবশিংগী মরক্তা নোংমৈ কাপ্নবগী থৌদোক চত্থরি।   থৌদোক অদুদা কুকি লালহৌবশিংগী মায়কৈদা মীওই কয়া শিবা অমসুং অশোক-অপন কয়াসু নংলম্বা য়াই হাযরি।

নরানসৈনা মনীংদা কুকি লালহৌবাশিংনা বোম অমদি নোংমৈ কাপশিন্দুনা এতেক তৌরকখিবা অদুগী পাউ ফংবদগী তম্পাক্কী তোঙান-তোঙানবা মফমশিংদগী মশীং য়াম্লবা নুপী অমদি নুপাশিং থৌদোক থোক্লিবা মফম অদুদা চঙশিন্দুনা ঈরাং অদুবু কন্ত্রোল তৌনবা অমদি মীচম মীয়াম মফম অদুদা চঙশিল্লকপদা থিংবগী থবক চত্থখি হায়রি।

সোর্স: পোক্নফম