লাইশ্রম সমরেন্দ্রগী চহী ১০০ শুবা মপোক-কুমওন থৌরম লোইশিনখ্রে
ইম্ফাল, জুলাই ২০ঃ লমদম অসিগী শক্নায়রবা লাইশ্রম সমরেমন্দ্রগী কুমজা ২০২৫ গী জুলাই ২০ দগী হৌদুনা চহী অমা চুপ্না চথরকপা লাইশ্রম সমরেন্দ্রগী চহী ১০০ শুবা মপোক কুমওন থৌরম ঙসি মণিপুর প্রেস ক্লবতা লোইশিনখ্রে।
লাইশ্রম সমরেন্দ্র বার্থ সেন্তিনরি সেলেব্রেসন কমিতি, ইম্ফালনা শীন্দুনা পাঙথোকথিবা থৌরম অদুদা সাহিত্য একাদমি এৱার্দি রাজকুমার ভুবোনসনা, রাইতর্স য়ুনিয়ন মণিপুরগী এদভাইজর এস এম শৈখ, কবুই লিতরেচর এন্দ রিসার্চ একাদমিগী প্রসিদেন্ত লনবোন কবুই, নেপালি সাহিত্য পরিষদ মণিপুরগী এদভাইজর ভৱানি অধিকারি, সেলেব্রেসন কমিতিগী চেয়রমেন য়েংখোম অনিলকুমার অমসুং সেলেব্রেসন কমিতিগী কনভেনর শরতচান্দ থিয়াম্না প্রেসিদিয়ম মেম্বরশিং ওইনা শরুক য়াখি।
থৌরম অদুগী মরি লৈননা সেলেব্রেসন কমিতিগী কনভেনর শরতচান্দ থিয়াম্না হায়, লমদমসিগী মশক নাইবা অইবা-অইবীশিং শীংথাবা অমদি মখোয়বু নীংশিংবা হায়বসি ঙসিগী মীরোলশিংগী অচৌবা থৌদাং অমনি। অসিগুম্বা ৱাখল্লোন অসিনা মাঙ থারগা লাইশ্রম সমরেন্দ্র বার্থ সেন্তিনরি সেলেব্রেসন কমিতিনা লমদম অসিগী শক্নায়রবা অইবা অসি নীংশিংদুনা থৌরম অসি পাঙথোকপনি।
মমাঙ ইং ২০২৫ দগী ঙসি ফাওবা চহী অমা চুপ্না চত্থরক্লিবা থৌরম অসিগী মনুং চন্ন মণিপুর অমদি মপান দা লৈরিবা মণিপুরীশিংনা অইবা অসিনা ইরম্বা শৈরেংশিং পাথোক্তুন অমদি নৈনদুনা থৌরম কয়া পাঙথোক্তুনা লাকপনি। লাইশ্রম সমরেন্দ্র গুম্না মশক নাইবা অইবা অমা ইরমদম অসিদা পোকখিবা অসি ঐখোয় পূম্নমক্কী চাউথোকচনিংঙাইনি।
লমদম অসিগী অইবশিংনা থম্বীরম্বা খোরিরোলগী পূক্কৈশিং অসি ঙসিগী মীরোলনা মপুং ফানা খঙদ্রিবা অসিগী মতাঙদা পল্লদুনা মহাক্লা হায়, লমদম অসিগী হৌখ্রবা মীরোলনা লমদম অসিগী থবক থৌরম কয়া তৌরমখি। লাই ওইবা অইবা কয়ানা লমদম অসিগী খোরিরোলদা অচৌবা খুদোল কয়া তৌরম্বনি। মখোয়না ইরম্বা খোরিরোলগী পুক্কৈ অদুগী মহৈনা ঙসি লমদম অসিগী হৌরক্লিবা মীরোলনা য়ু পি এস সিগী একজামিনেসন মণিপুরী সবজেক্ত লৌদুনা একজাম থাবা য়াবগী খুদোংচাবা ফংলিবা অসিনি। ঙসিগী মীরোলনা মমাঙঙৈগী অইবশিংনা থম্বীরম্বা খোরিরোলগী পূক্কৈশিং অসি খঙবা মথৌ তাই। হৌখিবা অইবশিংনা ইরম্বা লাইরিকশিং অসি অয়াম্বনা বেঙ্গলি ময়েক্তা ইরম্বা ঙাক্তনি। মসিনা ঙসিগী মীরোলনা মমাঙঙৈগী অইবশিংনা ইরম্বা লাইরিক অমদি শৈরেংনচিংবশিং অসি খঙদ্রি। মসি খঙহনগে হায়রবদি মীতে ময়েক্তা অমুক ইথোক্তুনা ফোঙবা চঙই হায়নসু মহাক্লা ফোঙদোকখি।
লাইশ্রম সমরেন্দ্রগী চহী ১০০ শুবা মপোক কুমওন থৌরম লোইশিনবগা মরী লৈননা লাইশ্রম সমরেন্দ্রনা ইবা শৈরেংশিং লমদম অসিগী তোঙান-তোঙানবা হীরমশিংদা মমীং লৈরিবশিংনা পাথোক্তুনা শৈরেং শৈদিন্নবগী থৌরম পাঙথোকখি।
ঙসিগী শৈরেং শৈদিন্নবা অদুদা শুমাঙ লীলাগী মমীং লৈরবা এক্তর নরেন্দ্র নিংঙোন্বম, আর্জুন এৱার্দি নামৈরাকপম কুঞ্জরানি, মমীং লৈরবা শৈশকপা সদানন্দ হামোম, খুনুং ঈশৈ শৈশকপী বেনিতা লাইশ্রম অমদি এক্ট্রেস চনম লিলাবতিনচিংবশিংনা শরুক য়াদুনা শৈরেং পাথোকখি।
সোর্স: পোক্নফম
0 কমেন্ট:
কমেন্ট তৌবিয়ু