মণিপুরী লোল আসাম লৈঙাক্কী এসোসিয়েট ওফিসেল লোল ওইহন্নবগীদমক লক্ষিপুর ত্রাইবেল মার্কেটতা ৱাকৎ মীফম ফমখ্রে
ইম্ফাল, সেপ্টেম্বর ২৭ :মণিপুরী য়ুথস ফ্রন্ট ওফ আসাম (এম ৱাই এফ এ) না শীন্দুনা মণিপুরী লোলবু আসাম লৈঙাক্কী এসোসিয়েট ওফিসেল লোল ওইহন্নবগীদমক ঙসি লক্ষিপুর বাজারগী ত্রাইবেল মার্কেট সেদতা মীয়ামগী ওইবা ৱাকৎ মীফম ফমখ্রে।
ঙসি অয়ুক পুং ১০ দগী ফম্বা হৌখিবা ৱাকৎ মীফম অদুদা মণিপুরী লেংঙ্গুয়েজ দিভেলপমেন্ট সোসাইটিগী প্রেসিদেন্ট ইঙুদম বিনোদনা ফোঙদোকখিবদা, মণিপুরী লোল অসি আসাম লৈঙাক্কী এসোসিয়েট অফিসিয়েল লোল ওইহন্নবগীদমক ঐখোয় অকনবা খোঙজং কয়ামরুম চঙশিনবা মথৌ তারি। ঐখোয়না ঐখোয়গী ইমালোলবু কনবা ঙমদ্রবদি ঐখোয়গী আসামদা মণিপুরী লোল অসি শোয়দনা মুৎখিবগনি। আসাম লৈঙাক্কী থবক চঙবদা মণিপুরী লোলনা ইন্টারভিউ পীবা হায়বসি ঐখোয়গী ইচা-ইনাওশিংগী য়াম্না কান্নবা ওইরক্কনি হায়নসু মহাক্না ফোঙদোকখি।
এম এস পি এগী হান্নগী ভাইস প্রেসিদেন্ট কৈশাম বিদ্যাপতিনা ৱাকৎ মীফম অদুগা মরী লৈননা ফোঙদোকখিবদা, এম ৱাই এফ এ গা লোয়ননা তোঙান তোঙানবা সী এস ওশিংনা শরুক য়াদুনা চঙশিল্লক্লিবা ইমালোল মণিপুরীবু আসাম লৈঙাক্কী এসোসিয়েট ওফিসিয়েল লোল ওইহন্নবগীদমক চঙশিল্লিবা খোঙজংশিংগী মহয়নি ঙসি এ পি এ সীদগী লোলগী খেন্নবা থম্লম্বদু লৌথোকখিবসি।
মরম অদুনা ঐখোয়না খরা কন্না খোঙজং চঙশিল্লবদি শোয়দনা মায় পাক্কনি। ওল মণিপুরী মুসলিম মৈরা পায়বী সংস্থানগী প্রেসিডেন্ট জুবেদা বেগমনা মণিপুরী লোলগীদমক চঙশিল্লকপা খোঙজং খূদিংমক্তা মৈতৈ পাঙল মৈরা পায়বীশিংনা থৱায় য়াওনা শরুক য়াগনি হায়াব ৱাফমসু ৱাকৎ মীফম অদুগা মরী লৈননা ফোঙদোকখি।
এ এ এম দব্লিয়ু এম সী ও সীগী প্রেসিদেন্ট অরুনাননসু আসাম মণিপুরী লোল কন্নবগীদমক ইমাশিংনা লৌখৎপা য়অবা থৌদাং লৌখৎকনি। এ এম এম ৱাই এফকী কালচারেল সেক্রেটারি সলাউদ্দিননা ঐখোয় পুম্নমক লাইনিং-লাইশোলগী খেন্নবা থমদনা ঐখোয়গী ইমালোল মণিপুরী আসামদা কন্দবা য়াদে হায়বনচিংবা ৱাফমশিংসু ফোঙদোকখি।
মণিপুরী লোলবু আসাম লৈঙাক্কী এসোসিয়েট ওফিসিয়েল লোল ওইহন্নবগীদমক লক্ষিপুর বাজারগী ত্রাইবেল মার্কেট সেদতা পাঙথোকখিবা ৱাকৎ মীফম অদুদা এ এম এম এম পি এসকী প্রেসিদেন্ট সঙ্গিতা বেগম; এ এম এম পি এ এলগী প্রেসিদেন্ট সনাথোইবী, তোন সিংহ, সেরাম হেরাজিৎ অমদি এম ৱাই এফ এগী প্রেসিদেন্ট থাংজিং ব্রোজেননচিংবনসু ইমালোল মণিপুরী কন্নবগীদমক ৱাফম কয়া ফোঙদোকখি। ৱাকৎ মীফম অদুগী মনুংচন্না আসামগী চীফ মিনিষ্টার ডা. হেমন্ত বিশ্ব শর্ম্মাদা অইবা মেমোরেনদাম অমসু লক্ষিপুর সাব-দিভিজনেল ওফিস খুত্থাংদা পীশিনখি।
সোর্স: হুইয়েন লানপাউ
অতৈসু পাবীয়ু :
মীতৈ ময়েক চৎনহনবগী মতাংদা আসাম এডুকেশন মিনিষ্টার উন্নখ্রে
0 কমেন্ট:
কমেন্ট তৌবিয়ু