• 800
• ৩রা ডিসেম্বর ২০২২ ইং
• Share on:

মণিপুরদা চাওনা অহোংবা লাকপা উবদা য়াম্না নুংঙাই টেলেন্টশিংবু ফাজিন-পুনশিনবিরোইসি: লাইশ্রম মেম্মা

ইম্ফাল, নভেম্বর ৩০ : চহী খরা অসিগী মনুংসিদা চাওনা অহোংবা লাকপা উবদা য়াম্না নুংঙাইবা ফাওই। পূম্নমক অসি মণিপুরগী মীয়াম্না ৱাখল তারকপদগী ওইথোকপা ঙম্বনি। লোয়ননা লমদম অসিগী টেলেন্টশিংবু মরম অমা নৎত্রগা অমনা ফাজিন-পুনশিনবিদুনা থম্বিরোইসি হায়না মেলোদি ক্যুন ওফ মনিপুর অমদি নাইটিঙ্গল ওফ নোর্থইষ্ট ইন্দিয়া হায়না শকখঙলবী লমদম অসিগী শক্নাইরবী শৈশকপী লাইশ্রম মেম্মনা ফোঙদোরক্লি।

মশাগী চহী ৭৪ শুরবী শক্নাইরবী শৈশকপী লাইশ্রম মেম্মগা পাউচে অসিগা অখন্ননা উনরুবদা মহাক্না মখা তানা ফোঙদোরকখিবদা ঙসিগী হৌরক্লিবা মীরোলশিং অসি মালেমগী অতৈ লৈবাকশিংগী নহাশিংদগী টেলেন্ট য়াম্না লৈবা হেল্লি হায়বদা হায়মনবা থোক্লোই। অদুবু মখোয়বু অমুক্কা হেন্না মশক নাইবা অমদি লমদম অসিগী মীংচৎ পুরকপা ঙম্নবা ঐখোয় পূম্নমক্না কম্ম্যুনিকেসন স্কিল হেনগৎহন্নবা তঙাইফদনা ইন্দিয়াগী অমদি মালেমগী মীওইশিংগা কম্ম্যুনিকেট তৌনরিবা লোলশিং ময়েক শেংনা করম্না প্রনাউন্স তৌগনি হায়বনচিংবা তাকপী-তম্বিবগী তঙাইফদবা লৈ। মখোয়বু ফাজিন-পুনশিনবিরোইদবনি। হীরম খুদিংমক্তা লমদম অসিগী নহাশিং অতোপ্পা মালেমগী মীওইশিংদগী অমত্তা তাদে। অদুবু করিগুম্বা পোৎশক খরনা মখোয়গী টেলেন্টশিং অদুবু মপান থোক্না শক তাক্নবা হোৎনবদা অৱাবা অমদি খুদোংচাদবা কয়া মায়োক্নহল্লি। মসি ঐখোয় পেরেন্টস অমা ওইনা অথিংবা অমদি ফাজিন-পুনশিনবিবা মানবা থৌওং অসি তৌবিরোইদবনি।

লোয়ননা চহী খরগী মমাংদা য়ূমথংনরিবা ষ্টেটশিংদগী মণিপুরনা ঈশৈ নোংমাইগী মতাংদা থাক য়াম্না ৱাংনা লৈরম্মী। ঙসিসু অদুমক থাক ৱাংনা লৈরি। অদুবু শুরদা, খোঞ্জেলদা, তালদা পূম্নমক্তা অৱাৎপা লৈত্রে অতোপ্পা ষ্টেটশিংগা চাংদম্নবদা তাথররোই হায়না খঙলবসু ঙসি করিগীদমক নেসনেল লেভেলগী থাক্তা লমদম অসিগী শৈশকপা-শৈশকপীশিংনা ফীদা অমা কনবা ঙমদ্রিবনো অমদি ঙমদ্রিবা অসিগী মরম্না করিনো হায়বসি ঐখোয় পূম্নমক্না কুপ্না থিগৎলবা মতুংদা হৌরক্লিবা নহাশিংদা মপুং ফানা সার্পোট তৌবিবগা লোয়ননা ফাজিন-পুনশিনবিবগী থৌওং মানবা থবকশিং তৌররোইসি।

ঙসিগী নহা ওইরিবা শৈশকপা-শৈশকপীশিং য়াম্না ফজনা ক্লাস য়াওনা তোপ-তোপ্পা শৈহক্তা ঈশৈ কয়া শক্লি। লোয়ননা মখোয়নসু অয়াম্বা মতমদা মতম পুম্নমক্তা ইভারগ্রিন ওইনা লৈহৌগদবা অঙাং-নহা-অহল খাক্তনা তাবা য়াবা ঈশৈ পুথোক্নবা হোৎনহন্নিংই। চহী ৩০-৪০ মুক্কী মমাংদা শক্নাইরবা শৈশকপা-শৈশকপী কয়ানা শক্লম্বা ঈশৈশিং ঙসিসু অঙাং-অহল খাক্তনা হৌজিক ফাওবা শক্না-শোন্নরি অমদি মখা তানা চহী কয়াসু অদুমক শক্ন শোনখিগনি। মরম অদুনা ঈশৈ পুথোক্লিবা অমদি ঈশৈ শক্লিবা আর্টিষ্টশিংনা মতম শাংনা চৎকদবা ঈশৈ পুথোকহন্নিংই। মরমদি ঈশৈনা লৈবাক অমগা লৈবাক অমগা, কম্ম্যুনিটি অমগা কম্ম্যুনিটি অমগা লোয়ননা মীওইবগী মরক্তা হেন্না নুংশিনহনবা অমদি অপুনবগী শক্তম শাগৎপা ঙম্বগী থৌনা য়াওরিবনি। মতম অমদা লৈবাক মীয়াম্না মাঙখিবা য়াই হায়না মীপাইনরম্বা লমদম অসিগী ফোক ঈশৈগী ঈহৈৗ অমা লাক্তুনা নহা ওইরিবী শৈশকপী কয়ানা লৈশি-লৈথোনগা লোয়ননা শুপ্নগী ঈশৈ শকপা খক্তা নত্তনা পীক্লিবী অঙাং কায়দসু লমদম অসিগী ফজরবা ফোক ঈশৈবু তাকপী-তম্বিবগী থবক পাঙথোরকপা উবদা অদুক্কী মতিক অপেনবা ফাওই। হৌরক্লিবা শৈশকপা-শৈশকপীশিংনসু থাইনাগী ঈশৈশিং অমুক নৌহৌননা অনৌবা মহাও অমা পীবগা লোয়ননা য়াম্না ফজবা মওংদা শকহন্নিংই।

লোয়ননা লমদম অসিগী মাগী-মাগী শিনফমশিংদা শক্নাইরবা-শক্নাইরবী ওইরবী আর্টিষ্টশিংনা ফংফম থোকপা চাকথুংশিং অমদি লৈবাক অসিগী অৱাংবা থাক্কী এৱার্দশিংসু কনা-কনা ফংবা য়াবা লৈরি হায়বনচিংবা থীদোকপরিগা ফংহন্নবা লৈঙাক্না শিহন্নিংই। লোয়ননা লৈঙাক্নসু পূম্নমকপু নীংবা থুংহনবা ঙম্বা হায়বসি ওইথোকপা ৱাগনি। অদুবু তঙাইফদবা তৌদবা য়াদ্রবা থবকশিং শোয়দনা লৈঙাক্না তৌরক্কনি হায়বগী চপচাবা থাজবুস লৈ। তশেংনা হায়রবদা মণিপুরদা অচৌবা অহোংবা লাক্লিবা অসি উবদা য়াম্না চাওথোকচাবা ফাওই। হেন্না চাওখৎপা ঈং-তপ্পা লমদম অমা ওইরক্লগনি হায়নসু মহাক্না মখা তানা পাউচে অসিদা ফোঙদোরকখি।

সোর্স: হুইয়েন লানপাউ