এটেরেকনা মাইবম গীতাদা বেষ্ট লিরিসিষ্ট এৱার্দ ২০২২ পীরগনি
ইম্ফাল, ডিসেম্বর ০২: আর্টিষ্ট ট্রেনিং কাম এদ্যুকেসনেল রিছার্স সেন্টার (এটেরেক) ইম্ফালনা চহী খূদিংগী লমদম অসিগী শৈরেংবশিংদা পীবা বেষ্ট লিরিসিষ্ট এৱার্দ ২০২২ চহী অসিগী ওইনা হিয়াংলম অৱাং লৈকায়দা লৈবা মাইবম গীতানা ইবা মেরাগী থাবলনা কৈদৌরুনি কৌবা ঈশৈ ময়েক অসিদা পীরগনি হায়না এটেরেককী সেক্রেটারি ওকেন্দ্রো খুন্দোংবমনা থাদোরকপা চেরোল অমনা ফোঙদোরক্লি।
লমদম অসিগী তোঙান তোঙানবা শৈরেংবা ১৭কী ময়েকশিংদগী জুরি অহুম্না শরুক য়ারদুনা পাঙথোকখিবা অথোই-অহেন তান্নবদা মাইবম গীতাগী ময়েক অসি খনখিবনি। মাইবম গীতা তোঙান তোঙানবা ঈশৈ ময়েক কয়া ইদুনা লমদম অসিগী শক্নাইরবা শৈশকপা কয়ানা শকখ্রে। হৌখিবা কুমজা ২০১৯ দা জিএম হোলদা মহাক্কী নাইট পাঙথোক্তুনা মহাক্না ইবা ঈশৈশিং লমদম অসিগী লেমজনিংঙাই ওইরবা মনা অসি লাক্লিবা দিসেম্বর ৪দা জি এম হোলদা পাঙথোক্কদবা ৯শুবা ষ্টেট লেভেল মণিপুরী সোং কম্পিটিসনগী গ্রান্দ ফিনালে হৌদোকপগী থৌরমদা কেফ এন্দ পি দি মিনিষ্টার এল সুশিন্দ্রোনা অথোইবা মীথুং ওইদুনা খুৎশিন্নগনি।
থৌরম অদুদা এটেরেককী প্রেসিদেন্ট সোবিতা সৌবামনা থৌরম মপু ওইগনি। লোয়ননা স্পেসল কন্ট্রেক্টর নিংথৌজম বিমোল অমদি ওল ইন্দিয়া রেদিও ইম্ফালগী হান্নগী এনাওন্সর কে কে ৱাহেংবমনা অখন্নবা মীথুং ওইনা শরুক য়াগনি হায়রি। হৌখিবা নভেম্বর ১১দা জি এম হোলদা লমদমসিগী শৈশকপা/শৈশকপী ৪৭ না শরুক য়াদুনা পাঙথোকখিবা লাইশোল ঈশৈগী চাংদম্নবদা খনগৎলবা টোপ ২০ না লাক্লিবা দিসেম্বর ৪দা পাঙথোক্কদৌরিবা নুংওন ঈশৈদা য়ূম্ফম ওইবা ঈশৈ চাংদম্নবদা শরুক য়াগনি। চাংদম্নবা অসিদা অহানবা, অনীশুবা অমদি অহুমশুবা পোজিসন তারক্লবশিংদা মথংশিৎনা লুপা লিশিং ১০, লুপা লিশিং ৭ অমদি লুপা লিশিং ৫গা লোয়ননা শকখঙচে য়াওনা মমেন্টো পীজগনি।
লোয়ননা মরিদগী তরেৎশুবা ফাওবা তারক্লবশিংদনা কন্সোলেসন প্রাইজ ওইনা লুপা লিশিং ১/১ গা শকখঙচেগা পীগনি। অথোই অহেন তারবশিং অসি নুমীৎ অসিদা মতম ঈশৈবু পামজবা অমদি নুংশিবীবশিংনা শরুক য়াবীয়ু হায়নসু চেরোলদুনা মখা তারি।
সোর্স: পোক্নফম
0 কমেন্ট:
কমেন্ট তৌবিয়ু