ইম্ফাল, আগস্ত ২৬ : রোমি মীতৈগী ‘ঐখোয়গী য়ূম’ হায়না মিংথোনবা মণিপুরী ফিল্ম অসিনা ৬৯ শুবা নেসনেল ফিল্ম এৱার্দস (বেস্ত মীতৈলোল ফিল্ম) অমসুং সাইখোম রতননা দিরেক্সন পীবা ‘বিয়োন্দ ব্লাস্ত’ না ৬৯ শুবা নেসনেল ফিল্ম এৱার্দসতা বেস্ত বাইওগ্রাফিকেল ফিল্ম (নন-ফিচর) এৱার্দ ফংলে।

ঐখোয়গী য়ূমনা ফিচর ফিল্ম কেতাগোরিদা বেস্ত মণিপুরী ফিল্ম এৱার্দস অমসুং বিয়োন্দ ব্লাস্তনা নন-ফিচার কেতাগোরিদা বেস্ত বাইওগ্রাফিকেল ফিল্ম এৱার্দ ফংখিবনি। রোমি মীতৈগী ঐখোয়গী য়ূম হায়রিবা ফিল্ম অসি চিংশুবম শিতল মীতৈনা পুথোকপনি। ফিল্ম অসি মমাঙদা য়ু এস এদা বেস্ত নেরেতিব ফিচর, রাসিয়াদা বেস্ত সিনেমাতোগ্রাফি, স্পেন্দা বেস্ত ফিচর লাইভ সেক্সন, ইন্টারনেসনেল ক্রিতিক ফেদরেসনগী ফিপ্রেসসি এৱার্দ অমসুং মণিপুর স্তেত ফিল্ম এৱার্দসতা বেস্ত ফিল্মগী মনাশিং ফংখিবা লৈখ্রে।

                                                                   রোমি মীতৈ

ফিল্ম অসিনা ইন্দিয়াগী অৱাং নোংপোক্তা লৈবা খ্বাইদগী চাউবা ফ্রেশৱার্তর লেক লোক্তাক পাৎতা লৈবা অপিকপা খুল অসিনা গ্লোবেলাইজেসনগী শাফু ফংখিবগী ৱারীদা য়ূম্ফম ওইবনি। খুল অসিদা লৈরিবা ঙামীশিং ইভিক্সন তৌবদগী মখোয়গী হিংবগী পুন্সিদা চৈথেং ফংখি। বিয়োন্দ ব্লাস্ত হায়না মিংথোনবা মিনিট ৫২ শাংবা বাইওগ্রাফিকেল দোকুমেন্তরি ফিল্ম অসি লুৱাং অপোকপা মমিকোলগী বেন্নার মখাদা সাইখোম রতননা দিরেক্সন পীরগা কোঞ্জেংবম সুশিলা লৈমনা পুথোকপনি।

ফিল্ম অসি গোৱাদা পাঙথোকপা ৫৩ শুবা ইফি ইন্দিয়ান পেনোরামা য়াওনা নেসনেল অমসুং ইন্তরনেসনেল ফিল্ম ফেস্তিবেল কয়ানা তোঙান তোঙানবা মনা কয়া ফংখ্রে। ইম্ফালদা থোকখিবা বোম পোকখায়বগী থৌদোক অমদা মখোং অনীমক ককখ্রবা কোন্থৌজম মাইকেল মীতৈ কৌবা লাই য়েকপা অমগী পুন্সিদা য়ূম্ফম ওইরগা পুথোকপনি।

 সাইখোম রতন

মণিপুরী ফিল্ম অনীনা নেসনেল এৱার্দ ফংলকপদা মণিপুর স্তেত ফিল্ম দিবেলপমেন্ত সোসাইতিনা নুংঙাইবা ফোঙদোরকপগা লোয়ননা মণিপুরী সিনেমাবু মালেমগী মীয়ামদা মশক তাকপদা লৌরিবা থৌদাংবু থাগৎলক্লি। নেসনেল ফিল্ম এৱার্দ অসি লাক্লিবা সেপ্তেম্বর থাদা নিউ দিল্লীগী বিজ্ঞান ভবন্দা পাঙথোক্কদবা থৌরম অমদা ইন্দিয়াগী প্রেসিদেন্ট দ্রৌপদি মুরমুনা লান্থোক্কনি হায়রি।

সোর্স: পোক্নফম