ইম্ফাল, সেপ্টেম্বর ৫ : লৈখিদ্রবা মণিপুরগী শক্নাইরবা থিয়েতার দিরেক্টর সনখ্য ইবোতোম্বী হাওরোকচমগী ৮ শুবগী নীংশিং থৌরম পেলেস কম্পাউন্দদা লৈবা থোকচোম ইবোয়াইমা শুমাঙ লীলা শঙলেন্দা ঙসি পাঙথোকখ্রে। মণিপুরী স্তেত শুমাঙ লীলা কাউন্সিলগী মীৎয়েং মখাদা লৈখ্রিদবা থিয়েটার দিরেক্তর অসিগী ইমুং-মনুং অমসুং মহৈরোয়শিংনা শীন্দুনা পাঙথোকখিবা থৌরম অদুগী মনুং চন্না শুমাঙ লীলাগী লীলারোই ওইনাম প্রফুল্লোচন্দ্রদা চৎলিবা চহী অসিগী সনখ্য ইবোতোম্বী মীংশিং মনা, ২০২৩ লান্থোক্তুনা ইকায়-খুম্নবা ঊৎখি।

থৌরম অদুদা মণিপুর স্তেত লীলা কাউন্সিলগী লাইফটাইম সেক্রেটারি সৌগ্রাকপম হেমন্তনা হায়, কাউন্সিলনা লৈখিদ্রবা ওজা অসিগী নীংশিং থৌরম অসি মহাক্কী মপোক নুমিৎ ওইরিবা সেপ্টেম্বর ৫ দা চহী খুদীংগী পাঙথোক্নবা ইমুং-মনুংগা তান্নরগা লেপখিবনি। মণিপুরগী কলা-সংস্কৃতি মরু ওইনা থিয়েটারগী লমদা লৈখিদ্রবা ওজা অসিনা অচৌবা কন্ত্রিব্যুসন তৌরম্মী। মহাক্না লৈখিদবা অসি থিয়েটারখক্কী নত্তনা লমদম অসিগী ওইনা অচৌবা মাঙজবনি হায়না নুংনাংবা ফোঙদোকখি।

ঙসিগী থৌরম অদুদা শরুক য়াখিবা মণিপুর স্তেত শুমাঙ লীলা কাউন্সিলগী লাইফটাইম প্রেসিদেন্ত পিঐচ গুনচন্দ্র শর্ম্মা, ফিল্ম ফোরাম মণিপুরগী চেয়ারমেন এল সূর্যকান্ত শর্ম্মা, থিয়েতার দিরেক্তর নিলধ্বজ খুমন অমসুং ৱা ঙাঙখি। লোয়ননা লৈখিদ্রবগী ফোটোদা থৌরম অদুদা শরুক য়াখিবশিংনা হৈকৎ-লৈকৎ তমদুনা ইকায়-খুম্নবসু ঊৎখি।

সোর্স: পোক্নফম