মীতৈ অমসুং অহোম অনীগী নুংশি মরীদা অহোম কোনুংগী মহারাণী কুরুঙ্গনয়নী
আগরতলা, মে ২৮ : ঙসিদগী চাওরাক্না চহী ২৬০ রোমগী মমাংদা মণিপুরগী রাজকুমারী কুরঙ্গনয়নী না অহোম কোনুংদা মহারাণী ওইখিবগী ৱারীবু নীংশিংবগা লোয়ননা আসাম অমসুং মণিপুরগী মৈতৈ অমসুং অহোম খুন্নাই অনীগী মরক্তা লৈনরিবা পুৱারী অমসুং চৎন-লোনচৎকী অচেৎপা মরী অদু হৌরক্লিবা মীরোলশিংনা কাওদনবা অমদি মখোয়বু খঙহন্নবগী পান্দমদা গুৱাহাটিদা সিম্পোজিয়াম অমা চীংলেম্না পাঙথোকখ্রে।
সাহিত্য একাডেমি নিউ দিল্লীনা মণিপুরী সাহিত্য পরিষদ আসামগী কামরূপ ডিস্ট্রিক্টগা খুৎশম্নরগা মে ২৪, গুৱাহাটি উলুবাড়ীদা 'কুরুঙ্গনয়নী এ্যন্ড হার সিগ্নিফিকেন্স ইন মণিপুরী সোসাইটি ইন আসাম' হায়বসিদা সিম্পোজিয়ম হৌদোকপগী থৌরমদা সাহিত্য একাডেমি মণিপুরী ল্যাঙ্গুয়েজ বোর্ডকী কনভেনর রাজেন তোইজাম্বা, কলকাতা রিজনেলগী এসিষ্টেন্ট ইডিটর ক্ষেত্রিবাসী নায়েক শরুক য়াখি। মণিপুরী সাহিত্য পরিষদ, কামরূপ ডিস্ট্রিক্ট প্রেসিডেন্ট ৱাহেংবম হেলেনসানানা থৌরম মপু ওইখি। অদুগা ডিস্ট্রিক্ট সেক্রেটারী টিএইচ গৌরব শর্মা না নুংগী ওইবা ৱারোলদা মহাক্না অহোম কোনুংদা মহারাণী ওইনা কুরঙ্গনয়নীনা মীতৈ অমসুং অহোম খুন্নাই অনীগী মরক্তা নুংশিনবগী অচেৎপা মরী কয়াবু নীংশিংহন্দুনা হৌরক্লিবা মীরোলদা খঙহনবগী পান্দমনি হায়না পনখি। কামরূপকী ভাইস প্রেসিডেন্ট য়েংখোম উপেন্দ্রনা থাগৎ-ৱাহৈ থমখি।
সেসন অনীথোক্না পাঙথোকখিবা সিম্পোজিয়মগী অহানবা সেসনদা মণিপুরী সাহিত্য পরিষদ আসামগী প্রেসিডেন্ট ড. ফুরিৎসাবম বীরমনিনা মোডেরেটর ওইরগা লাইশ্রম জ্ঞনেন্দ্র সিংহ, লাইশ্রম তরনীকান্ত, মেমচাতোন সিংহ অদুগা অনীশুবা সেসন্দা রাজেন তোইজাম্বানা মোডেরেটর ওইরগা ৱাই কুঞ্জলাল সিংহ, দ্বীজমণি শর্মা অমসুং এন অমরজিৎ সিংহনা পেপার পাখি। থৌরমদা আসাম গী তোঙান তোঙানবা মফম শিংদগী মহৈরোই কয়াসু শরুক য়াদুনা থৌরম অদু মায় পাক্না লোইশিনখি হায়রি।
সোর্স - মরূপ
0 কমেন্ট:
কমেন্ট তৌবিয়ু