ইন্দিয়ানা থাদা য়ৌবা ঙমখ্রে, ইসরোনা পুৱারী শেমখ্রে, প্রাইম মিনিস্তর মোদিনা চন্দ্রয়ান-৩না থাদা তাখিবা অদু অনৌবা ইন্দিয়াগী ফ্লাইত অমনি হায়না শীংথাখ্রে
বেঙ্গলুরু, আগসট ২৩ : ইন্দিয়ানা মালেমগী অতৈ লৈবাক অমত্তনা য়ৌবা ঙমদ্রিবা থাগী খা থংবা মেরুদা শোক্তুনা পুৱারী শেমখ্রে। ইন্দিয়াগী থাগী মিসন চন্দ্রয়ান-৩ না ঙসি য়ূমকৈশা নুমিৎকী নুংথিল পূং ৬.০৪ তাবদা থাগী লৈমায়দা তাবা ঙমখ্রে, মসিনা লৈবাক অসি থাগী লৈমায়দা তাবা ঙম্বা লৈবাক মরিগী ক্লাবতা য়াওবা ঙম্লে অমসুং মালেমগী অহানবা কনামক্তনা চৎনদ্রিবা থাগী মফমদা য়ৌবা অহানবা লৈবাক ওইরে।
নুমিৎ ৪১ গী লেপ্পা লৈতনা চৎখিবা থাগী খোঙচৎ অদুনা পুৱারী অমা শেমখ্রে অমসুং চয়োল অমা ফাদ্রিঙৈদা রাশিয়ানা লেন্দর অমা থাগী খা থংবা মেরুদা কায়দুনা তাশিনখ্রবনি। য়ু এস, চাইনা অমসুং হান্নগী সোভিয়েত য়ুনিয়নগী মথংদা ইন্দিয়ানা থাগী লৈমায়দা তপ্না তাবা ঙম্বগী টেক্নোলোজি পুথোকপা মরিশুবা লৈবাক ওইরে।
অদুবু থাগী খা থংবা মেরুদা তাবা লৈবাক্তি অমত্তা লৈত্রি, সাইন্তিস্তশিংনা ফমজিন্দুনা লৈবা ঈশিং অমসুং মমল য়াম্লবা ইলিমেন্তশিং মফম অসিদা লৈ হায়না থাজনরি। রাশিয়াগী থাগী খা থংবা মেরুদা তানবা চৎখিবা লুনা-২৫ স্পেসক্রাফ অদু হৌখিবা নোংমাইজিং নুমিত্তা কায়দুনা থাদা তাশিনখ্রবনি।
থাগী লৈমায়দা তানবা মঙলানগী শরুক অমা ওইনা চহী মরিগী মতুংদা ইন্দিয়াগী অনীশুবা চন্দ্রয়ান-৩ অসি মাগী মখোঙ মরি পানবা বিক্রম অমদি কেজি ২৬ লুম্বা রোবর প্রগ্যান পুদুনা থা তম্না চৎখিবনি, মাগী খোঙচৎ অদুগী পন্থুং ওইনা ঙসি অয়ুক পূং ৬.০৪ তাবদা লৈবাক অসিনা তাগে খল্লিবা থাগী খা থংবা মেরুদা চপ চানা তাবা ঙমখি। মতম অদুদা ইসরোগী সাইন্তিস্তশিংনা নুংথিল পূং ৫.৪৪ তাবদগী হৌরকখিবা অরুবা খোঙথাং অদুদা ‘মদু মিনিট ২০গী অকি তুজুংবা অমনি’ হায়না ফোঙদোকখি।
থাদা লেন্দরনা হেক তাবগা অথুবা মতমদা ইন্দিয়ান স্পেস রিসার্ছ ওর্গানাইজেসন (ইসোর) না হায়, ঙসি নুমিদাং লেন্দর অমসুং স্পেস এজেন্সি অসিগী বেঙ্গলুরুদা লৈবা মিসনা ওপারেশন কমপ্লেক্স (মোক্স) কা পাউ ফাওনবা ঙম্লে।
স্পেস এজেন্সি অসিনা থাগী লৈমায়দা তারকপা মতম অদুগী ইমেজ কয়া লেন্দর হোরাইজোন্তেল ভেলোসিতি কেমেরা (এল ঐচ ভি সি) দগী থাদোরকখি। মোক্সতা লৈবা সাইন্তিস্তশিংনা মায় পাকপগী হরাও-তয়াম্বা ফোঙদোক্নখিবা মতৌ অদুদা প্রাইম মিনিস্তর নরেন্দ্র মোদিনা হৌজিক্তি ইন্দিয়া অসি থাদা য়ৌবা ঙম্লে অমসুং মসিগী মায় পাকপা অসি মীওইবা খুন্নাই পূম্বগীনি হায়না ফোঙদোকখি।
মোদিনা সাউথ আফ্রিকাদগী ভিডিও কনফারেন্সকী খূত্থাংদা থা য়ৌনা চৎখিবা চন্দ্রয়ানগী খোঙচৎ অদু য়েংখি, লোয়ননা মায় পাকপগী পুংজা অদুদা সাইস্তিস্তশিংনা হোৎনখিবা অদুগী মায় পাকপা অদুদা মখোয়বু থাগৎখি অমসুং মদুনা ইন্দিয়া অসি চাওখৎপা লৈবাক অমা ওইরক্লবগী লম্বীদা চঙশিল্লে হায়খি।
প্রেসিদেন্ত দ্রৌপদি মুর্মু, য়ুনিয়ন মিনিস্তরশিং, চীফ মিনিস্তরশিং, সাইন্তিস্তশিং অমসুং ফিল্ম ফ্রেতরনিতি অমদি পোলিটিকেল পার্তিগী হায়বা থিদনা লুচিংবা পূম্বনা ঙসি ইন্দিয়ানা থাগী লৈমায়দা শোকপা ঙম্বা অদু থাগৎনখি, অমসুং লৈবাক অসিগী স্পেস সাইন্তিস্তশিংনা হোৎনখিবা অদু ঙমখৈ লৈতনা শীংথানখি।
ব্রিক্স সম্মিত শরুক য়াবগী জোহেন্সবার্গতা লৈরিবা মোদিনা ইসরোগী সাইন্তিস্তশিংদা ইন্দিয়ানা মালেম পৃথিবীদা লৌখিবা ৱারেপ থাদা শোকপা ঙম্বা অদু মপুং ফারে হায়খি। ঙসিগী মীৎকুপ অসি মতম চুপ্পগী নীংশিংদুনা লৈরগনি। ইন্দিয়া অসি হৌজিক্তি থা য়ৌরো অমসুং হৌজিক্তি থাদা খোঙনা চৎনবগী লম্বী থিবগী মতম অদু লাক্লে হায়না প্রাইম মিনিস্তরনা হায়খি।
ঐখোয়না অনৌবা ইন্দিয়াগী অনৌবা ফ্লাইট অদু উবা ফংলে। অনৌবা পুৱারী অমা শেম্লে হায়খি। ইন্দিয়ানা অতিয়া মকোয় অসিগী ঙমখৈ লৈতে হায়বদু প্রমাণ হঞ্জিন হঞ্জিন তৌরে হায়না মোদিনা নুমিৎকী মিসন ‘অদিত্যা-১১’ অমসুং প্লানেত ভেনসকী খোঙ থাবা হৌখ্রবা ইসরোদা হায়খি।
ইসরোগী চীফ এস সোম্নাথনা হায়, চন্দ্রয়ান-৩না মায় পাকখিবসি ইন্দিয়ান স্পেস সাইন্তিস্তশিংনা অচেৎপা থাজবা অমগা লোয়ননা শীংনবা কয়া নমখায়দুনা থবক তৌখিবা অদুগী মহৈনি হায়খি। ‘ঐখোয়না থাগী লেমায়দা তপ্না তাবা ঙম্লে। ইন্দিয়া অসি থা য়ৌরে হায়না মহাক্না ইসরোনা মাগী পান্দম অদু ফংখিবা মিনিট খরগী মতুং দা হায়খি।
চন্দ্রয়ান-৩ না থাগী লৈমায়দা তারকপদা ইন্দিয়ান পূম্বনা স্বর থিংবমখৈ পূক্নিংদা থক থক নিক্তুনা মাগী মাগী নিংজবা ঈশ্বর খুরুম্নদুনা লৈনখি। ইন্দিয়া মচাশিংনা তেম্পলশিং, দরগাহ্, মসজিদ, গীর্জা অমসুং গুরুদ্বারশিংদা মিসন অসি মায় পাক্নবা ঈশ্বর খুরম্নখি।
চন্দ্রয়ান-৩ অসি চন্দ্রয়ান-২ গী মতুঙদা লাকপনি অমসুং মসিগী পান্দমদি পৃথিবীদগী কিলোমিটার ৩৮৪,০০০ লাপ্পা খোঙচৎ অসি শোই ঙাংদনা চত্তুনা থাগী লৈমায়দা তপ্না তাবা, অমসুং মাগী রোবর্টনা থাদা চৎপনি, অদুগা ইন-সিতু সাইন্তিফিক এক্সপরিমেন্ত চত্থবনি।
চন্দ্রয়ান-৩ মিসন অসি জুলাই ১৪দা লোঞ্চ ভেহিকল মার্ক-থ্রি (এল ভি এম-৩) রোকেটনা পুখৎখিবনি। মসিগী খোঙচৎ অসিদা ওর্বিট ৱাংখৎপগী থবক ১৩ চত্থখি। লেন্দর অসিনা আগস্ত ১৭ তা প্রোপলসন মোদুল (পিএম) দগী খাঙদোকখি। চন্দ্রয়ান-২ গী ওইনদি ইং ২০১৯ গী সেপ্তেম্বর ৭তা মাগী লেন্দর বিক্রম্না থাগী লৈমায়াদ তানবা হোৎনবদা থাগী লৈমায়দা তাশিন্দুনা কায়খিবদগী ফেল ওইখি। চন্দ্রয়ানগী অহানবা মিসন্না ইং ২০০৮ তা তৌখিবনি।
সোর্স: পোক্নফম
0 কমেন্ট:
কমেন্ট তৌবিয়ু