মায় পাক্লবা চন্দ্রয়ান-৩ মিসনদা মৈতৈ মচা রঘু নিংথৌজমসু অচৌবা থৌদাং লৌরি
ইম্ফাল, আগস্ত ২৩ : লৈবাক অসিগী য়াম্না চাউথোকচনিংঙাই ওইনা পুৱারীদা লৈহৌরগদবা ইসরো (ইন্দিয়ান স্পেস রিসার্ছ ওর্গানাইজেসন) না মায় পাক্না চন্দ্রয়ান-৩ মিসন মায় পাক্না থাগী মখাথংবা পোলদা লেন্দর বিক্রম তাবা ঙমখ্রে। অসিগুম্বা মায় পাক্লবা মিসন অসিদা ইসরো হেদ কোয়াটার, বেঙ্গলুরুগী দি তি দি আই (দিরেক্টোরেট ওব টেক্নোলোজি দিবেলপমেন্ট এন্ড ইনোভেশন) দা ডিপুটি দিরেক্টর ওইনা লৈরিবা বিষ্ণুপুর দিস্ত্রিক্টকী মনুং চনবা থাঙ্গ ওইনাম লৈকায়দগী রঘু নিংথৌজমসু অচৌবা থৌদাং লৌরি।
ঙসি চন্দ্রয়ান-৩ মিসন অসিগী বিক্রম লেন্দরনা থাগী লৈমায়দা মায় পাক্না তাবা ঙমখিবা অদুদা হকথেংননা শরুক য়াখিবা রঘু নিংথৌজমগা তেলিফোনগী খূত্থাংদা ৱারী শান্নবদা মহাক্না পোক্নফমদা হায়, লৈবাক অসিগী পুৱারীদা লৈহৌরগদবা চন্দ্রয়ান-৩গী মিসনর মায় পাকপা অসিদা মণিপুরদগী মৈতৈ মচা অমনা ইসরোদ সাইন্তিস্ত ওইনা লৈদুনা শরুক য়াবা ঙমখিবা অসিগীদমক্তা য়াম্না নুংঙাইবা ফাওই। মহাক ইসরোদ সাইন্তিস্ত ওইনা লৈরকপা চহী ১৮ শুরক্লে।
থাঙ্গগী অমুসনা হায় স্কুলদগী মহৈ তম্বা হৌরকখিবা রঘু নিংথৌজম মখা তাবা মহৈ অসি সি সি হায়ার সেকেন্দরি স্কুলদা ক্লাস তুয়েল্ব ফাওবা তম্লকখি। মখা তানা দি এম কলেজ ওব সাইন্সতা ফিজিক্স ওনার্সতা গ্রেজুয়েশন লোইরবা মতুং মণিপুর য়ুনিবার্সিতিদা ফিজিক্সতা এম এসসি তমদুনা সেকেন্দ পোজিসন ফংখি। মদুগী মতুংদা গুৱাহাতিদা লৈবা ইন্দিয়ান ইনস্তিত্যুত ওব টেক্নোলোজিদা ফিজিক্সতা গোল্ড মেদেল ফংবা ঙমখি।
সাইন্তিস্ত রঘুনা হায়, চন্দ্রয়ান-৩ অসি চন্দ্রয়ান-২ গী মখা তারকপা মিসননি। চন্দ্রয়ান-১ গী ওইনদি রিমোট সেন্সিং টেক্নোলোজি শীজিন্নরগা থাগী লৈমায়দা কিলোমিটর ১০০ গী মথক্তা লৈবা ওর্বিত্তা থম্লগা থাবু স্টাদি তৌবনি। অদুগা চন্দ্রয়ান-২দনা হান্নগী চন্দ্রয়ান-১ দা তৌখিবা মিসন ওর্বিত্তা থম্বা অদুদগী মখা তাবা ওইনা থাগী লৈমায়দা লেন্দিং টেক্নোলোজি অদু মায় পাক্নবা হোৎনবনি। চন্দ্রয়ান-২ গী মিসন অসি হৌনবগীদমক্তা অহানবা ওইনা শেমখিবা মী ১২ না শাবা কোর কমিটি অদুদা মহাক মশামক সাইন্তিস্ত ওইনা য়াওরকখি।
ঙসি মায় পাক্লবা চন্দ্রয়ান-৩ গী পেয়লোদতা য়াওরিবা বিক্রম লেন্দর ক্রাফ্ট অমসুং বিক্রমগী মনুংদা য়াওরিবা থাগী লৈমায়দা চৎকদৌরিবা প্রজ্ঞান রোভারকী প্রোজেক্ত মেনেজার ওইনসু থৌ পুরগা লাক্লি। হায়রিবা থবক খুদীংমক অসি মহাক খক্তগী নত্তে। সাইন্তিস্ত ময়াম অমগী টিম ৱার্কনি। চন্দ্রয়ান-৩গী মরুওইবা ওবজেক্টিবতি অহুম্নি। অহনাবদা থাগী লৈমায়দা লেন্দরনা সোফ্ট ওইনা তাবগী টেক্নোলোজি ঊৎপা, অনীশুবদা থাগী লৈমায়দা রোভারনা লেন্দরদগী কুমথরগা লৈমায়দা চৎহনবগী টেক্নোলোজিশিংগী মতেঙনা থাগী লৈমায়দা লৈরিবা লৈবাক, নুঙগী কম্পোন্তেশিংদা করি য়াওরিবগে হায়বদু এ পি এক্স এস (আলফা পার্তিকেল ইন্দ্যুস এক্সরে স্পেসক্তোমিতর) কী মতেঙনা থিজিনবা য়াওরি। থাগী লৈমায়গী ফিজিকেল প্রোপার্তিশিং অঈং-অশা অমসুং মালেম পৃথিবীগুম্না থাদসু য়ুহা হাবা থোকই হায়বগী রিপোর্ট লৈরিবা অসিসু য়েংশিন্নবা টেক্নোলোজিশিং য়াওরি হায়না মহাক্না ফোঙদোক্লি।
য়েন্দ্রম্বম বিশাল সিংহ, শিলচর, কাছার, আসাম
ঙসিগী মায় পাক্লবা মিসন অসিনা থাগী লৈমায়দা থিজিনগদৌরিবা অসিনা মালেমগী ওইনা য়াম্না কান্নবা অমদি হান্না খঙলমদবা কয়া অমসু খঙবা ঙম্লগনি। নুমিৎতগী পৃথিবীনা লৈরিবা মফম অসিগা চপ মান্ননা লাপ্না লৈমিন্নরিবা থাদা করিগী মীওইবা অমদি জীব পানবশিং লৈবা ঙমদ্রিবনো হায়বগী মরম্নচিংবসু থিদোকপদা অচৌবা মতেঙ ওইবা ঙম্লগনি হায়না রঘুনা ফোঙদোক্লি।
অমরোমদা, ঙসিগী চন্দ্রয়ান-৩গী মিসন অসিদা ইসরোগী থার্মেল কন্ত্রোল টিমদা সিলচরদগী য়েন্দ্রম্বম বিশাল সিংহ কৌবা মৈতৈ মচা অমসু য়াওরি। মসিগীদমক্তা আসামগী বরাক ভেল্লিদা তারিবা মৈতৈ মচাশিংনা চাউথোকচবা অমসুং নুংঙাইবা ফোঙদোক্নবগী ৱাফম অসি সোসিয়েল মিদিয়িাদা থাগৎনরক্লি।
সোর্স: পোক্নফম
0 কমেন্ট:
কমেন্ট তৌবিয়ু