নোহাখোলগী খোরিরোল মনা লান্থোকখ্রে
ইম্ফাল, এপ্রিল ২১ : নোহাখোল (নোংচুপ হারম খোর্জৈ লূপ), য়ূরেম্বম বাজারগী ৩৪ শুবা মপোক কুমওন থৌরম ঙসি নুংথিল য়ূরেম্বম অৱাং লৈকায়দা লৈবা দাঃ এল শশীকুমারগী য়ূমদা পাঙথোকখ্রে।
নিংথেমচা সনা য়াইমানা অথোইবা মীথুংলেন, লূপকী প্রেসিদেন্ত গৌরো থোঙামচানা থৌরম মপু অমসুং দি এম য়ুনিবার্সিতিগী প্রোঃ দাঃ শরতচন্দ্র লোংজোম্বা অমদি কলচরেল ফোরামগী প্রেসিদেন্ত, দাঃ কে শান্তিবালানা অখন্নবা মীথুংলেন ওইদুনা পাঙথোকখিবা থৌরম অদুদা ময়াংলম্বম সুমতীদা মহাক্কী ‘পুন্সিগা লৈচিলগা’ হায়বা ৱারীমচাগী লাইরিক্কীদমক শেল ওইনা লুপা লীশীং ৫, সাইতেসন ১ অমদি সোল ১ য়াওবা ‘ইমা লাইশ্রম লৈহাওবী নীংশিং খোরিরোল মনা ২০২৪’ লান্থোকপগা লোয়ননা লূপকী (নোহাখোলগী) চেফোঙ ‘ঈচেল’ অমসুং তোঙান-তোঙানবা লাইরিক ৬ সু ফোঙখি। ফোঙখিবা লাইরিশিং অদুদি– দাঃ এল শশীকুমারনা ইবা ‘তমগী ওজা’ (শুমাঙ লীলা), ‘তমগী ইবুং নুংশিবা’ (শুমাঙ লীলা), ‘স্বর্গগী গোলাপ’ (শুমাঙ লীলা), ‘নুঙহিক্না মপাউ’ (ঈশৈ শৈরেং), শাদোকপম বিরজিৎ মঙাংনা ইবা ‘নীংশীহল্লি খোঙচৎতা দেল্লী’ (লমকোয় ৱারী) অমসুং কেশো লুৱাংনা ইবা ‘কুমুদিনী মহারানী’ (শৈরেং) নি।
সোর্স: পোক্নফম
0 কমেন্ট:
কমেন্ট তৌবিয়ু