মহারাজ নরসিংহ লৈখিদবগী ১৭৪ শুবা নীংশিং থৌরম পাঙথোকখ্রে
ইম্ফাল, এপ্রিল ১২ : মহারাজ নরসিংহদা চেল্লিবশিং মরৈবাক নুংশিবগী ৱাখল্লোন অসি হৌরক্রিবা নহাশিংনা মতৌ তম্বা মথৌ তাই হায়না আর্ত এন্দ কলচরগী কমিস্নার এম জয়না ফোঙদোকখ্রে।
ৱাফম অসি স্তেত আর্কিওলোজি দিপার্তমেন্ত ওব আর্ত এন্দ কলচর, গবর্নমেন্ত ওব মণিপুরনা শীন্দুনা ঙরাং মহারাজ নরসিংহ লৈখিদবগী ১৭৪ শুবা নীংশিং থৌরমদা ফোঙদোকখিবনি।
মহারাজ নরসিংহ
স্তেতকী থাক্তা ইম্ফালগী শেংলবা কংলাদা লাইনিং লাইশোলগা লোয়ননা পাঙথোকখিবা থৌরম অদুদা চীফ গেস্ত ওইনা শরুক য়াখিবা আর্ত এন্দ কলচরগী কমিস্নার এম জয়না লুচিংদুনা কংলাদা লৈবা মহারাজ নরসিংহগী নীংশিং খুভমদা লৈ কৎপগা লোয়ননা গন সেলুত পীদুনা অৱাংবা থাক্তা ইকায়খুম্নবা ঊৎখি। তুংদা নুংজেং পুখ্রিদা হৈকৎ-লৈকৎসু তমখি।
আর্ত এন্দ কলচরগী কমিস্নার এম জয়
থৌরম অদুগা মরী লৈননা কমিস্নার জয়না হায়, মহারাজ নরসিংহ অসি মমা লৈবাক মণিপুরবু থম্মোয় শেংনা নুংশিজবা, মরৈবাক্কীদমক থৱায় কত্থোকখিবা নিংথৌ অমনি। চহী তরেৎ খুন্তাকপা (১৮১৯-২৬) মতমদা মহারাজ অসিনা কছারদা চত্তুনা লান্মীশিং শেমগৎলগা মণিপুরদগী বর্মিজ তান্থোকখিনবা গম্ভীর সিংহ মহারাজগা পূন্না হোৎনখি। আসামগী কছারদা লৈবা খোইরি পাৎতা নিংথৌ অসিনা লেং ওন্দুনা শিৎখিবগী ‘লেং ওন্দবী পাৎ’ অসিনা মমিং থোনখিবগী ৱারী লৈ।
গন সেলুত পীদুনা অৱাংবা থাক্তা ইকায়খুম্নবা ঊৎপা
মণিপুরদগী বর্মিজ তান্থোকপা ঙমখ্রবা তুংদা মহারাজ নরসিংহনা নিংথৌ ওইদুনা কাঞ্চিপুরদা লৈরম্বা কোনুং অসি ইম্ফারগী কংলাদা অমুক হন্না পুরক্তুনা নৌহৌননা শেমগৎ-শাগৎখি অমসুং চীং-তম অমত্তা ওইনা পূনশিন্দুনা নুংশি-চান্ননা লৈমিন্নদুনা মৈরা হৌ চোংবগী থৌরম অমুক হন্না পাঙথোকপা হৌখিবনি। অসিগুম্বা মরৈবাক মরমদমবু মনীং মখা তম্না অমসুং ফুরুপ কাঙলূপ খূদীংমক নুংশি-চান্ননা হিংমিন্নহল্লম্বগী ৱাখল্লোন অসি ঙসিগী মীরোলনা তুং ইন্দু চৎপা মথৌ তাই হায়না জয়না ফোঙদোকখি।
থৌরম অদুদা আর্ত এন্দ কালচারগী দিরেক্তর কে দীনমণি সিংহ, এম এন এম সিগী দিরেক্তোরেত ওব এনবাইরোনমেন্ত এন্দ ক্লাইমেত চেঞ্জগী দিরেক্তর দাঃ তি ব্রজকুমার, গবর্নমেন্তকী ওফিসিয়েলশিং অমসুং মহারাজ নরসিংহগী মরী-মতাশিংসু শরুক য়াখি।
সোর্স: পোক্নফম
0 কমেন্ট:
কমেন্ট তৌবিয়ু