মণিপুরগী জুদোকা দিপাপতিনা গোল্ড লৌরে
ইম্ফাল, এপ্রিল ২৮: জোর্জিয়ানা য়ূম্বু ওইদুনা লৈবাক অদুগী তেলাভিদা ঙসি লোইশিনখিবা তেলাফি কেদেত য়ুরোপিয়ান কপ ২০২৪ দা ইন্দিয়াগী রিপ্রেজেন্ত তৌরিবী মণিপুরগী জুদোকা ঙাঙবম দিপাপতি দেবীনা গোল্ড লৌখ্রে।
মফম অসিদা ফংবা পাউনা হায়, মণিপুরগী দিপাপতি দেবীনা নুপীমচাগী কেজি ৭০গী কাংলূপ্তা গোল্ড মেদল লৌখি। ঙসি মহাক্না ফাইনেল বাউত্তা লূজেম্বর্গকী ওয়েল্টর লেনিবু ২-০ দা মায়থীবা পীদুনা মহাক্কী সনা মচুগী মেদল অদু তানবা ঙমখি।
মহাক্কী মেদল অদু তান্নবা হোৎনবাদ ক্বার্তরফাইনেলদগী কেম্পেন চত্থবা হৌখি। ক্বার্তরফাইনেলদা য়ূম্বু জোর্জিয়াগী মর্খভাইদজলিজিবু ১-০ দা মায়থীবা পীদুনা সেমিফাইনেল য়ৌশিনখি অমসুং সেমিফাইনেলদা য়ূম্বুগী অতোপ্পা জুদোকা জাগনিয় নিনিবু ১-০ দা মায়থীবা পীদুনা ফাইনেল চঙদুনা লুজেম্বর্গকী লেনিগা লম্বা তৌনখি। দিপাপতিগী গোল্ড অদুদা নত্তনা মণিপুরগী হুইদ্রোম ওলিভিয়ানা সিলভর মেদল অমসু ইন্দিয়াগী মেদল তেলিদা কন্ত্রিব্যুত তৌবা ঙমখি।
ওলিভিয়ানা নুপীমচাগী কেজি ৪৮ গী কাংলূপ্তা কম্পিত তৌদুনা সিলভর মেদল অমা লৌখি। মহাক্না ফাইনেল বাউত্ত ইজরেলগী শলেফর লিয়াগা লম্বা তৌনখিবদা মায়থীদুনা সিলভর মেদল ফংহৌখিবনি। ওলিভিয়ানা ফাইনেল ফাওবা য়ৌশিন্নবা হোৎনবদা প্রি-ক্বার্তরফাইনেল বাউত্তা য়ূম্বু জোর্জিয়াগী ইভানিশভিলি তমারবু মায়থীবা পীদুনা ক্বার্তরফাইনেল য়ৌীশনখি। ক্বার্তরফাইনেলদা মহাক্না অতোপ্পা য়ুম্বূগী জুদোকা। তুমানিশভিলি মরিয়ামিবু মায়থীবা পীদুনা সেমিফাইনেল চঙখিবগা লোয়ননা অতোপ্পা জোর্জিয়াগী শান্নরোয় জিউনাশভিলি সোপিওগা ফাইনেলগী মফম অমগীদমক লম্বা তৌনখিবদা মায় পাক্তুনা ফাইনেল চঙদুনা ইজরেলগী শলেফরগা লম্বা তৌনখি।
অদুমওইনমক, ইভেন্ড অদুদা মণিপুরগী ৱাংথোই মৈতৈনা নুপামচাগী কেজি ৬৬ কী কাংলূপ্তা কম্পিত তৌখিবদা রাউন্দ ওব সিক্সতিনগী বাউত্তা য়ূম্বু জোর্জিয়াগী বাবুতসিজ জিওর্জিগী মখুত্তা মায়থীদুনা লৈহৌখি।
সোর্স: পোক্নফম
0 কমেন্ট:
কমেন্ট তৌবিয়ু