বাংলাদেশ মণিপুরী ছাত্র সমিতিগী কনভেশন-২০২৪ পাঙথোকখ্রে
সিলেট, 20 এপ্রিল: বাংলাদেশকী মৈতৈ মহৈরোয়শিংগী লূপ বাংলাদেশ মণিপুরী ছাত্র সমিতি (বামছাস) হৌদোকখিবগী চহী ৪০ শুবা রুবি জুবীলিগা মরি লৈননা নোংমগী ওইবা কনভেশন অমা ঙরাং ১৯ এপ্রিল, ইরাই নুমিৎ সিলেট সিটিদা লৈবা কেন্দ্রীয় মুসলিম সাহিত্য সংসদ হোল দা পাঙথোকখ্রে। কনভেনশন অদুদা খন্না নৈনবগী থৌরমপরেংগা লোয়ননা "নুংশিবা খোঞ্জেল" হায়বা ঈশৈ হৈদান্নবা অমসুং স্কোলারশিপ ( মহৈরোয়শিংগী মনুংদগী অথোয় অহেনবা শিংদা) মনা পিবগী থৌরমসু পাংথেকখি।
অয়ুক্তা নেশনেল ফ্লেগ অমসুং বামছাসকী ফিরাল চিংখৎপগা লোয়ননা নেশনেল এন্থেম শক্না থৌরম হৌদোকখি। মথংদা বাংলাদেশকি মনুংদা মহৈরোয়শিংবু মাল্টিটেলেন্টেড পান্দম ওইহন্নবা মরিশুবা "নুংশিবা খোঞ্জেল" হায়বা মিংথোনদা ঈশৈ হৈদান্নবগী থৌরম পাঙথোকখি।
গ্রপ অনি থোক্না পাঙথোকখিবা থৌরম অদুদা [ ক ] গ্রুপতগী চেম্পিয়ন ওইখি সুপ্রভা সিনহা, ফার্স্ট রানার্সআপ স্পৃহা সিনহা অমদি সেকেন্ড রানার্সআপ সানারিকা সিনহানা ওইখি।। [ খ ] গ্রুপ তগী চেম্পিয়ন ওইখি বিথীকা সিনহা বৃন্তি, ফার্স্ট রানার্সআপ ইচেল থোইবা অমসুং সেকেন্ড রানার্সআপনা সজল সিনহানা তাখি।
চহি অনীগী থৌ পুগদবা নৌনা শেম্বা এক্সিকিউটিভ কমিটিগী শরুক অমা
নুংথিলগী কাউন্সিল সেশনদা ময়েংবম মুকেশ না সমিতি অসিগী অনৌবা প্রেসিডেন্ট অমসুং সিদ্ধার্থ সিংহনা জেনারেল সেক্রেটারি ওইনা মীওই ২৭ য়াওবা চহি অনীগী থৌ পুবিনবা এক্সিকিউটিভ কমিটি অমা শেমখি।
মথংদা ওইনাম সত্যজিৎ সিংহনা কন্ডাক্ট তৌখিবা নৈনবা মিফমদা থৌরম মপু ওইনা অনৌবা কমিটিগী প্রেসিদেন্ট ময়াংলম্বম মুকেশ অমসুং অথোইবা মীথুংলেন ওইনা সিলেট সিটি কর্পোরেশনগী মেয়র মিস্টার আনোয়ারুজ্জামান চৌধুরীনা শরুক য়াখি।
নৈনবা মীফম অদুদা, মেয়র মিস্টার আনোয়ারুজ্জামান চৌধুরীনা মশাগী হিস্ট্রি-কালচার লৈজবা মৈতৈ খুন্নায়বু ইকায়খুম্নদুনা ৱাহৈ কয়া ফোংদোকখিবগা লোয়ননা বামছাসকী মায়কৈদগী কুইরবা মংলান অমসং ডিমান্ড অমা ওইরিবা সিলেট সিটি মনুংদা মৈতৈ মহৈরোয় ২০০ লৈবগী হোস্টেল অমা শাবিগনি হায়না ফোংদোকখি।
"নুংশিবা খোঞ্জেল" হায়বা মিংথোনদা ঈশৈ হৈদান্নবা থৌরমগী মতাং অমা
নৈনবা মীফমগী থৌরম অদুদা অখন্নবা মীথুংলেন ওইনা সিলেট জেলা যুবলীগকী ভাইস প্রেসিডেন্ট এডভোকেট আব্দুল মতিন, হলিসিটি পাবলিক স্কুল এন্ড কলেজ ফাউন্ডার প্রিন্সিপাল মোঃ সাইফুল করিম চৌধুরী হায়াত, বাংলাদেশ পুজা উদযাপন পরিষদ শ্রীমঙ্গল শাখাগী এডভাইজর হিরন্ময় সিংহ অমসুং বামছাসকী ফাউন্ডার ট্রেজারার শেরাম প্রমোদনা শরুক য়াখি। মরু ওইবা ৱাঙাংলোয় ওইনা এন. এম এডুকেশন ট্রাষ্ট কী চেয়ারম্যান এল. নন্দলাল সিংহ না ৱা ঙাংখি। পনবা য়াবদি, থৌরম অসি পাংথোকপদা বাংলাদেশ মণিপুরী ছাত্র সমিতিগী ফাউন্দার সেক্রেটরি হৌজিক্না লূপ অসিগী চীফ এডভাইজর ওইরিবা আমেরিকাদা লৈবা অসেম সত্যজিৎ তেংবাং কয়া পিবিরকখি।
থৌরমগী অরোইবদা নুংশিবী খোঞ্জেলগী মাইপাক্লবা শৈশকপা শৈশকপী অমসুং বামছাস প্রাইমারী জুনিয়র টেলেন্টপুল স্কোলারশিপ এক্সামদা মায়পাকখিবা মহৈরোয়শিংদা ক্রেস্ট, সার্টিফিকেট অমসুং মনা য়েন্থোকখি।
0 কমেন্ট:
কমেন্ট তৌবিয়ু