ইরাবত ফাউন্দেসন মণিপুরনা পীরকপা কালেনগী মরূ-মরাংশিং ত্রিপুরাগী মীতৈ খুলশিংদা য়েন্থোকখ্রে
ইম্ফাল, এপ্রিল ০২ : মণিপুরগী লৌমীশিংগীদমক চহী কয়াগী মমাঙদগী তোঙান তোঙানবা থবক থৌরম কয়া পায়খৎতুনা লাক্লিবা ইরাবত ফাউন্দেসন মণিপুরনা ত্রিপুরাদা লৈরিবা মীতৈশিংগীদমক পীরকপা কালেনগী মরূ-মরাং কয়া ষ্টেট অদুগী উনাকোটি দিষ্ট্রিক্টকী মনুং চন্না লৈবা মীতৈ খুলশিংদা চৎতুনা লৌমীশিংদা হকথেংননা য়েন্থোক্লুরে।
মরূ-মরাংশিং য়েন্থোকখিবা মফমশিংগী মনুংদা ত্রিপুরাগী উনাকোটি দিষ্ট্রিক্টকী কৈলশহরগা নক্ননা বাংলাদেশ বোর্দর পরিংদা লৈরিবা খুলশিংদা য়েন্থোকখিবনি। বাংলাদেশকী ঙমখৈগা তাইননা লৈরিবা মীতৈ খুল অদুগী মমিং মোম্বুর কৌই অদুবু ত্রিপুরাগী বেঙ্গলিশিংনদি কমরকান্দি হায়রগা খঙনৈ হায়রি।
মোম্বুর ৱার্দ নম্বর ৩গী মেম্বর অৱাংতাবম বিরচন্দ্র (৬৫) অপোকপা এ মেরাদা মোম্বুর খুলদা লৈরিবা মীতৈগী য়ূম ৩৬ লোমগী মীওইশিংনা মখোয়গী লৌবুক অমসুং ইঙ্খোলদা থানবগীদমক তোঙান তোঙানবা কালেনগী এঞ্ছাং নাপীশিংগী মরূ-মরাংশিং য়েন্থোকখিবনি। মরূ মরাংশিং অসি মোম্বুর ময়ায় লৈকায়দা লৈবা অৱাংতাবম কোমোর (৪৫) অমসুং মোম্বুর অৱাং লৈকায়গী থোকচোম তোম্বী (৬০) অপোকপা টি ঐচ সেনাপতি অমদি কৈলাসহরগী মীতৈগী য়ূম অনীগী মীওইশিংদসু য়েন্থোকখি।
মমাঙ থাগী ২৫দগী হৌরদুনা ২৮ ফাওবা নুমিৎ ৪নিগী খোঙচৎতা ত্রিপুরাদা লৈবা মীতৈশিংগা নৌহৌননা ঈগী মরী চেৎশিলহন্নবা চৎখিবা খোঙচৎতা শরুক য়াখিবশিংনা মরূ-মরাংশিং অদু ইম্ফালদগী ইরাবত ফাউন্দেসন মণিপুরদগী লৌরগা খুৎশিন্নরম্বনি। খোঙচৎ অসিদা পাউচে অসিগী মীহুৎ অমসু শরুক য়াখি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু