ৱারীমচাগী লাইরিক ‘হুকখিদ্রবা কুন্দো পরেং’ ফোংখ্রে
সিলেট, ৩০ মার্চ :বাংলাদেশকী শক্নাইরবা অইবী থোকচোম ওংবী কৈনাহান দেবী’গী ‘হুকখিদ্রবা কুন্দো পরেং’ হায়না মিংথোনবা ৱারী মচাগী লাইরিক অমা হৌনবী মতুংইন্না ঙরাং ইরাই নুমিৎ অয়ুক পুং ১১ দা লালাদিঘীর পূর্ব পাড়, সিলেটতা লৈবা বাংলাদেশ মনিপুরী সাহিত্য সংসদ (বামসাস) কি অফিসতা ইচম চম্বা থৌরম অমদা মায়খুম হাংদুনা ফোংদোকখ্রে।
বামসাসকী জেনারেল সেক্রেটারি নামব্রম শংকর না কন্ডাক্ট তৌখিবা লূপ অসিগী শঙ্গাইদা পাংথোকখিবা থৌরম অদুদা বামসাসকী প্রেসিডেন্ট অইবা এ. কে শেরামনা থৌরম মপু ওইখি। কবি অমসুং নৈনরোই ওজা শেরাম নিরঞ্জননা ঙসি ফোংখিবা লাইরিক অসিগী মরমদা নৈন-ৱারেং অমা পাথোকখি অমসুং নৈনরোয় ওইনা শরুক য়াবিখিবা অইবা খোইরোম ইন্দ্রজিৎ, কবি সনাতন হামোম, অইবা অমসুং বামসাস ছোটধামাই ব্রাঞ্চকী প্রেসিডেন্ট অহৈবম রণজিৎ অমদি মণিপুরী ভাষা গবেষণা ও উন্নয়ন সংস্থাগী জেনারেল সেক্রেটারী এল. ইবুংহাল সিংহ শ্যামলসু লাইরিক অসিগী মতাংদা ৱাহৈ কয়া ফোংদোকখি। পনবা য়াবদি, লাইরিক অসি অইবি কৈনাহনগী অনিসুবা লাইরিক্নি, মমাং চহিদা "অমোৎপা পুন্সিগী অৱাবা" কৌবা শৈরেং লাইরিক অমসু ফোংখ্রবনি।
থৌরম অদুদা শরুক য়াবিখবাশিংগী মরক্তগী প্রশান্ত কুমার সিংহ, রওশন আরা বাঁশি খূৎহৈবম, অওয়াংতাবম সমরেন্দ্র, অয়েকপম অঞ্জু, কুঞ্জেশ্বর সিংহ, শিল্পী কন্থৌজম, হামোম প্রবিত, থোকচোম অনন্ত, রাধাবতী দেবী অমদি অনন্যা সিনহানা থাগৎ ৱাহৈ কয়া থমদুনা অইবিবু পুক্নিং থৌগৎখি।
0 কমেন্ট:
কমেন্ট তৌবিয়ু