ইম্ফাল, ওক্টোবর ২৮ : গোৱাদা পাঙথোক্লিবা ৩৭ শুবা নেসনেল গেমসকী ঙসি শান্নখিবা তোঙানবা-তোঙানবা দিসিপ্লিনশিংগী ওইনা মণিপুরগী শান্নরোয়শিংনা জিম্নাষ্টিক্সতা গোল্ড অমা; পেনকাক সিলাটতা গোল্ড অমা, ব্রোঞ্জ অনী অদুগা ফেন্সিংদা ব্রোঞ্জ অমা লৌবা ঙমখ্রে। পেনকাক সিলাটকী ওইনা অতোপ্পা নুপী শান্নরোয় অমসু ফাইনেল চঙবা ঙমখিবনা মেদল অমদি শোয়দনা ফংলগনি।

জিম্নাষ্টিক্সকী ওইনা মণিপুরনা হৌজিক ফাওবদা গোল্ড ৩, সিলভার ১ লৌবা ঙমখ্রে। ঙসিগী ওইনা পাঙথোকখিবা জিম্নাষ্ট ভোল্টতা মণিপুরগী রুবন মৈতৈনা পূন্না পোইন্ট ১৩.২২ ফংদুনা গোল্ড মেদল লৌবা ঙমখিবনি। ফ্লোর এক্সর্সাইজতসু রুবননা ঙরাং সিলভার মেদল লৌবা ঙমখিবনি। ইভেন্ট অসিগী ওইনা ওরিষ্যাগী মোহমদ অনানা পোইন্ট ১৩.০৩ অদুগা কর্নাটকাগী উজৱাল নাইদুনা পোইন্ট ১২.৯৮ ফংদুনা মথংশিৎনা সিলভার অমদি ব্রোঞ্জ লৌখিবনি।

অমরোমদা, পেনকাক সিলাটকী ওইনা নুপীগী কেজি ৫৫-৬০ কেটগোরিদা মণিপুরগী য়াইখোম অঞ্জলিনা গোল্ড মেদল লৌবা ঙমখ্রে। মহাক খক্তা নৎতনা নুপাগীদা য়াইখোম কিরননা কেজি ৫৫-৬০ কেটগোরিগী টেন্দিংদা ব্রোঞ্জ মেদল অদুগা হুইদ্রোম বিসন মীতৈনা কেজি ৬০-৬৫ গীদা ব্রোঞ্জ মেদল লৌবা ঙমখিবনি।

পেনকাক সিলাটকী ওইনা সনসম সোফিয়া চনু কেজি ৬৫-৭০ গী কেটগোরিদা ঙসি ফাইনেল চঙবা ঙমখ্রে। মহাক্না হয়েং ফাইনেলদা জন্মু অমসুং কাশ্মীরগা লম্বা তৌনরগনি। শোয়দনা মহাক্না গোল্ড লৌবা ঙমগনি হায়বগী থাজবা লৈ। অমরোমদা, ফেন্সিংগী ওইনা নুপীগী ইন্দিভিজ্যুয়েল ফোইলদা দব্লিয়ু সোনিয়ানা ব্রোঞ্জ মেদল লৌবা ঙমখ্রবনি।

সোর্স: হুইয়েন লানপাউ