বাংলাদেশতা '৯শুবা ইন্টারন্যাশনাল কনফারেন্স অন মণিপুরী লিটারেচার ২০২৬' অমসুং 'অ্যাৱার্ড য়েন্থোকপ'গী থৌরম পাঙথোকখ্রে
সিলেট, নভেম্বর ০৭ : মণিপুরী সাহিত্য, কলচর অমসুং ত্রেদিসনবু মালেমগী থাক্তা হেন্না চাওখৎহন্নবগী পান্দম থমদুনা মৌলভীবাজারগী কমলগঞ্জদা ‘৯শুবা ইন্টারন্যাশনাল কনফারেন্স অন মণিপুরী লিটারেচার ২০২৬’ মায় পাক্না পাঙথোকখ্রে। বাংলাদেশ মণিপুরী সাহিত্য সংসদ (বামসাস) সেন্ট্রাল কমিটিগী থৌরাংদা অমসুং কমলগঞ্জ ব্রাঞ্চকী মতেংনা ইরাই নুমিৎ (নভেম্বর ৬) নোংমগী ওইবা ইন্টরনেস্নেল কনফরেন্স অসি পাঙথোকখিবনি।
অইবা এল. বীরমঙ্গল সিংহনা কী-নোট পেপর পাথোকপা
কমলগঞ্জগী আদমপুরবাজার, তেতইগাঁওদা লৈবা মণিপুরী কালচারাল কমপ্লেক্সতা পাঙথোকখিবা কনফরেন্স অসিদা বাংলাদেশ নত্তনা ইন্দিয়াগী মণিপুর, আসাম অমসুং ত্রিপুরাদগী লাকপা মমিং লৈরবা সাহিত্যিক, রিসর্চর, কবি অমসুং শিল্পী কয়ানা শরুক য়াখি। নুমিৎ চুপ্পা পাঙথোকখিবা কনফরেন্স অসিগী অহানবা পর্বদা মমিং চৎপা সাহিত্যিক প্রোফেসর নোংমাইথেম তোম্বীগী সাহিত্যগী মতাংদা ইন্টরনেস্নেল সেমিনার অমা পাঙথোকখি। সেমিনার অসিগী মরু ওইবা থিমদি ‘প্রোফেসর নোংমাইথেম তোম্বী: অ্যা গ্রেট এক্সপোনেন্ট অব মণিপুরি লিটারেচার’ হায়বসিদনি।
বামসাস সেন্ট্রাল কমিটি, সিলেটকী ভাইস প্রেসিডেন্ট এল. প্রশান্ত কুমার সিংহনা থৌরম মপু অমসুং জেনারেল সেক্রেটারি নামব্রম শংকরনা কন্ডাক্ত তৌদুনা পাঙথোকখিবা সেমিনার অসিদা চিফ গেস্ট ওইনা বাংলাদেশ সরকারগী রিটায়র্দ এদিসনেল সেক্রেটারি শশী কুমার সিংহ শরুক য়াখি। স্পেসিয়েল গেস্ট ওইনা ত্রিপুরাগী মমিং লৈরবা কবি অমসুং প্লেরাইত এল. কুমার সিংহ, ভান্ডারীগাঁও হাইস্কুলগী রিটায়র্দ হেদমাস্তর মাইবম বীরেন্দ্র সিংহ অমসুং ইন্দিয়াগী মণিপুরদগী লাকপা রিসর্চর, প্রোফেসর নোংমাইথেম তোম্বীগী মচানুপী ড. অনুরাধা নোংমাইথেমসু ৱা ঙাংখি। সেমিনার অসিদা ত্রিপুরাগী মণিপুরী সাহিত্য পরিষদকী প্রেসিডেন্ট অমসুং অইবা এল. বীরমঙ্গল সিংহনা কী-নোট পেপর পাথোকখি। বামসাস সেন্ট্রাল কমিটিগী প্রেসিডেন্ট এ কে শেরামনা তরাম্না ওকপগী ৱাফম থমখি হায়রি।
অনীশুবা সেশন : কবি সম্মেলন অমসুং শৈরেং শৈদিন্নবা
নুমিৎ য়ুংবা পুং ২ তাবদা কবি রওশন আরা বাঁশী খুৎহৈবমনা প্রেসিদিয়ম লৌদুনা কবি সম্মেলন অমা পাঙথোকখি। কবি সম্মেলন অসিদা গেস্ট অব অনার ওইনা আসামগী কাছাড়দগী লাকপা কবি তাহির সাজবম অমসুং ত্রিপুরাগী আগরতলাদগী লাকপা কবি এল. মিনা দেবী অমসুং কবি থৌদাম নীলকুমার শরুক য়াখিবগা লোয়ননা ইন্ডিয়া অমসুং বাংলাদেশকী মফম কয়াদগী লাকখিবা কবি কয়াসু শরুক য়াখি।
বামসাস কমলগঞ্জ ব্রাঞ্চকী পাব্লিকেসন সেক্রেটারি কবি অয়েকপম অঞ্জুনা কন্ডাক্ত তৌদুনা পাঙথোকখিবা সেশন অসিদা কবিশিংনা মখোয় মশানা ইবা শৈরেংশিং পাথোকখি।
অহুমশুবা সেশন : নৈনবা মীফম অমসুং ‘নীলিমা সিনহা মেমোরিয়েল অ্যাওয়ার্ড ২০২৬’ মনা য়েন্থোকপা
নুংথিল পুং ৩.৩০ তাবদা অহুমশুবা সেশন পাঙথোকখি। সেশন অসিগী মরু ওইবা থৌদাংদি খোরিরোল নৈনবা অমসুং সাহিত্যগী লমদা অথোয়-অহেনবা থবক তৌরবা মীওইশিংবু ইকায়খুম্নবা উৎপা ওইরম্মি।
বামসাস সেন্ট্রাল কমিটিগী প্রেসিডেন্ট এ কে শেরামনা থৌরম মপু অমসুং ফাইনেন্স সেক্রেটারি নীহর রঞ্জন শর্মানা কন্ডাক্ত তৌদুনা পাঙথোকখিবা সেসন অসিদা চিফ গেস্ট ওইনা সিলেটকী মেট্রোপলিটন ইউনিভার্সিটিগী ভাইস চ্যান্সেলর প্রোফেসর ড. মোহাম্মদ জহিরুল হক শরুক য়াখি। স্পেসিয়েল গেস্ট ওইনা কমলগঞ্জ মণিপুরী কালচারাল কমপ্লেক্সকী প্রেসিডেন্ট এল. জয়ন্ত সিংহ শরুক য়াখি। থৌরাং অসিদা বামসাস কমলগঞ্জ ব্রাঞ্চকী প্রেসিডেন্ট এল. ইবুংহাল সিংহ শ্যামলনা থাগৎ ৱাহৈ থমখি।
চহী অসিগী কনফরেন্সতা মণিপুরী সাহিত্য অমসুং রিসর্চকী লমদা শিংথানিংঙাই ওইবা থবক থৌরম কয়াদা থৌদাংবু শকখঙবা ওইনা ইন্দিয়াগী আসাম ইউনিভার্সিটিগী মণিপুরী দিপার্তমেন্টকী এইচ ও ডি প্রোফেসর অমসুং মমিং লৈরবা অইবা ড. হাওরোংবাম রাজমনি সিংহদা ‘নীলিমা সিনহা মেমোরিয়েল অ্যাওয়ার্ড ২০২৬’ মনা খুৎশিন্নখি।
নুমিৎ চুপ্পা পাঙথোকখিবা কনফরেন্স অসিগী অরোইবা পর্বদা ফজরবা ঈশৈ-জগোয়গী কালচারেল প্রোগ্রাম অমসু পাঙথোকখি।
বামসাস সেন্ট্রাল কমিটিগী জয়েন্ট সেক্রেটারি খুন্দ্রাকপম সমেন্দ্র সিংহনা কন্ডাক্ত তৌদুনা পাঙথোকখিবা কালচারেল প্রোগ্রাম অসিদা ইন্দিয়া, সিলেট অমসুং ভানুগাছ লমদমগী শক্নাইরবা মমিং লৈরবা কলাকারশিংনা মণিপুরী ত্রেদিসনেল জাগোই অমদি মখল-মথেলগী ঈশৈ জগোয় কয়াসু পার্ফোম তৌখি হায়রি।
বাংলাদেশ অমসুং মপানদগী লাকখিবা খোরিরোলবু নুংশিবা ময়াম পুন্না শরুক য়াদুনা কনফারেন্স অসিবু মায় পাক্না পাংথোকখি অমসুং থৌরম অসিনা মফম কয়াদা চোইজাইননা খুন্দারিবা মণিপুরী খু্ন্নাইগী মনুংদা মরি চেৎশিনহনবগী থৌরম অমনি হায়দুনা শরুক য়াখিবা ময়াম্না শিংথানখি হায়রি।
0 কমেন্ট:
কমেন্ট তৌবিয়ু